እሳያሳ 45

ቅሮሳ ዶረተ

1ጎዳይ ትይዳይሳስ፥

ካዎታ ዳንጮ ብልሳና መላ፥

ደርያ እያዉ ሃርሳና መላ፥

ፐንገት እያ ስንን ዶየታና መላ

እያ ኡሻቻ ኩሽያ ኦይክዳ ቅሮሳ

ጎዳይ ሀይሳዳ ያጌስ፦

2ታኒ ነ ስንራ ባና፤ ደረታ ደምባያና፤

ናሰ ብራታ ሳንቃታ መንና፤

ብራታ ኮበታ ቃንፃና።

3ነና ነ ሱንን ፄገይ ታና ጎዳ፥

እስራኤለ ፆሳ ግደይሳ ኔኒ ኤራና መላ

ታኒ ነዉ ማን ደእያ ሻሉዋ፥

ጌማን ቆሰትዳ ዱረተ እማና።

4ታ አይልያ ያይቆባ ግሾ፥

ታኒ ዶርዳ እስራኤለ ግሾ፥

ታኒ ነና ነ ሱንን ፄጋስ።

ኔኒ ታና ኤሮና እፅኮካ፥

ታኒ ነና ቦንቾ ሱንን ፄጋስ።

5ታኒ ጎዳ፤ ታፐ ሀራ ፆሰ ባዋ፤

ኔኒ ታና ኤሮና እፅኮካ

ታኒ ነዉ ዎልቃ እማና።

6ሄስካ አው ዶልያሶፐ ዉልያሶ ጋካናዉ

ታፐ ሀር ባይናይሳ አሳይ ኤራና መላሳ፤

ታኒ ጎዳ፤ ታፐ ሀራ ፆሲ ባዋ።

7ታኒ ፖኦነ ማ መስ፤

ሳሮተነ ዮ ኤሀይስ፤

ሀ ኡባ ታኒ ጎዳይ ኦይስ።

8ህንተኖ ሳሎቶ፥ ቦላፈ ፅሎተ ትግተ፤

ሻራት ቡክሶ።

ቢታይ ዶየቶ፥ አቶተ ፅሎተይ እስፈ ዶሎ፤

ታኒ ጎዳይ ሀይሳ መስ።

9ባና መዳይሳራ ፓላምያ ኡራ አየ!

እ ሳአን መቅድ ዎዳ

ኦቶፐ እሱዋ መላ።

ኦቶይ ባና መይሳኮ፥

ኔኒ፥ “አይ ኦይ?”

“ነዉ ኩሸይ ባዋ” ያግዬ?1

10ባ አዋ፥ “ታና አይስ የላዲ?” ግያ፥

ባ አይዉ፥ “ታና ሀይሳዳ አይስ ኢቀታዳ የላዲ?”

ግያ ኡራ አየ!

11ጎዳይ፥ እስራኤለ ጌሻይ፥

እያ መዳይስ ሀይሳዳ ያጌስ፦

“ስንፈ ሀናናባ፥

ህንተ ታና ታ ናይታባ ኦይቻናዉ፥

ታ ኩሸ ኦሶታባ ታና ኪታናዉ በሰቲ?

12ታኒ ሳኣ ኦስ፤

አሰካ እያ ቦላ መስ።

ሳሎታ ታኒ ታ ኩሸን ምጫስ፤

ኤንታ ቦላ ፆልንቶታ ኡባ ዎስ።

13ታኒ ቅሮሳ ፅሎተን ደንስ፤

እያ ኦግያ ኡባ ሱረ ኦና።

ሚሸ ቃንፆና ዎይኮ ዎይቶ እሞና

እ ታ ካታማ ኬፃና፤ ታ አሳ ድኦፐ ዛራና”

ያጌስ ኡባፈ ዎልቃማ ጎዳይ።

14“ጎዳይ ሀይሳዳ ያጌስ፦

ግብፀ ዱረተይነ ቶጰ ዛልኤይ፥

ጌሳይ አዱሳ ግድዳ ሳባ አሳት

ኔኮ ይድ፥ ነባ ግዳና፤

ኤንቲ ሳንላታን ቃሸትድ፥ ነና ካላና።

ኤንቲ ነዉ ጎይንሸ፥ ‘ፆሲ ኔራ ደኤስ፤

እያፐ አትሽን፥ ሀራ ፆሲ ባዋ’ ” ያጋና።

15“እስራኤለ አሽያ ጎዳ ፆሳዉ፥

ቱማ ኔኒ ነና ገንያ ፆሰ።

16ኤቃ መይሳት ኡባይ ዬላታናነ ካዉያና፤

ኤንቲ እስፈ ዬላ ማአና።

17ሽን ጎዳይ እስራኤለ መርና አቶተን አሻና፤

ህንተ መርናዉ ዬላተከታ ካዉየከታ።

18ሳሎታ መዳ ጎዳይ፥ ቢታ ጊግስድ ኦዳይ፥

አስ ዳና መላፐ አትሽን፥ ቢታ ጮ መቦና

ፆሳይ ሀይሳዳ ያጌስ፦

ታኒ ጎዳ፤ ታፐ ሀር ባዋ።

19ታኒ ጌማን፥

ዎይኮ ማ ቢታን ኡታዳ ኦዳብከ።

ያይቆባ ዘረኮ፥ ‘ታና ጮ በሳን ኮይተ’ ጋብከ፤

ታኒ ጎዳይ ቱማ ሃሳይስ፤ ልከ ግድዳባ ቆንጭሳይስ።

20ህንተኖ ካዎተታ ግዶፈ አትዳይሳቶ፥

እስፈ ሃ ማታ ሺቅተ።

ምፈ ኦሰትዳ ኤቃ ምስልያ ቶክ ዩየይሳታስ፥

አሻናዉ ዳንዳኦና ፆሳታ ዎሰይሳታስ ኤር ባዋ።

21አነ ፓላምት፤ ህንተ ሞቱዋስ ጋሶ ሺሽተ፤

እስፈ ዞረትተ።

ዳሮ ዎደፐ ካሰ ሀይሳ ኦድዳይ ኦኔ?

በንፐ ሀይሳ አዋጅዳይ ኦኔ?

ታና ጎዳ ግድክናዬ?

ታፐ አትሽን፥ ሀራ ፆሲ ባዋ።

ታፐ አትሽን፥ ሀር ፅሎይነ አሽያ ፆሲ ባዋ።

22ህንተኖ ቢታ ጋፃፐ ጋፃ ጋካናዉ ደኤይሳቶ፥

ታኮ ስሚድ አትተ፤ ታፐ አትሽን፥ ሀራ ፆሲ ባዋ።

23ታኒ ታናን ጫቃስ፤

ጉየ ስሞና ቃል

ታ ዶናፐ ፅሎተን ከይስ።

ጉልባት ኡባይ ታዉ ጉልባታና፤

እንፃርስ ኡባይ ታናን ጫቃና።2

24ኤንቲ ታባ ሃሳይሸ፥

‘ፅሎተነ ምኖተ

ጎዳ ፃላላን ደኤስ’ ያጋና።

እያ እፅያ ኡባይ እያኮ ይድ ዬላታና።

25ሽን እስራኤለ ዘረ ኡባይ፥

ጎዳን፥ ፆኖነ ቦንቾ ደማና።