እሳያሳ 34

ካዎተት ፕርደታና

1ህንተኖ፥ ካዎተቶ፥ ሺቅድ ስእተ! ህንተኖ፥ አሳዉ አኬክተ! ቢታይነ ቢታን ደእያባ ኡባይ፥ ሳእነ ሳአፐ ከያባ ኡባይ ስኦ። 2ጎዳይ ካዎተታ ኡባ ቦላ ሀንቀትስ፤ ኤንታ ቶራንቾታ ኡባ ቦላ ይሎትስ። እ፥ ኤንታ ኡባ ይሳና፤ ኤንታ ሹከይሳታስ አድ እማና። 3ኤንታ አሀይ ሆለትድ፥ አትድ ፅንቃና፤ ደረት ኤንታ ሱን ካመታና። 4ሳሎ ፆልንቶት ኡባይ ሴራና፤ ሳሎት ሳሌናዳ ፃፀታና። ዎይነ ሀይነ ባላሰ አይፈይ ቆቆፈተይሳዳ ፆልንቶት ኡባይ ቆቆፈታና።1

5ታ ማሻይ ሳሎታን አላና ጋካናዉ ኡይስ፤ ሄኮ ኤዶመ ቦላ፥ ታኒ ይስዳ አሳ ቦላ ፕርዳናዉ ዎና።2 6ጎዳ ማሻይ ሱን ሙከትስ። ያርሾስ ሹከትያ ዶርሳታነ ዴሻታ ሱን ማሽ ሙከተይሳዳነ ኤንታ ክላሆ ሞዋን ካመተይሳዳ ጎዳ ማሻይ ሱን ሙከትስ፤ ሞዋን ካመትስ። ጎዳይ ባሶራ ካታማን ያርሾ፥ ኤዶመ ቢታን ግታ ሹካ ጊግስስ። 7መንት፥ ዎፋኖትነ ቦራት ኤንታራ ኩንዳና። ኤንታ ጋደይ ሱ ፃላላ ግዳና፤ ኤንታ ቢታይ ሞን ሙኑቀታና። 8ጎዳይ ሀሎ ከያና ጋላስነ ፅዮነ ኦልዳ ሞርከታ ቦላ ኩሸ ዛርያ ላይ ጊግስስ።

9ኤዶመ ሻፋት መልድ ማደ ግድስ፤ እያ ባናይ ዲነ ላመታና፤ እያ ቢታይ ኤፅያ ማደ ግዳና። 10ቃማነ ጋላስ ታማይ ቶኤና፤ እያ ጩያይ መርናዉ ጩያና። ኤዶመ ቢታይ የለተፈ የለተ ጋካናዉ ባይሳ ግዳና፤ ኦንካ መርናዉ ያራ ካንና።3 11ሽን ፅሎይነ ቁፃረይ እያ ላታና፤ ጉቶይነ ቁሮይ ያን ዳና። ፆሳይ ኤዶመ ቦላ ላለ ዋ ዎዶሮነ ባይሳተ ቱምበ የዳና። 12ሄ ቢታ አይስያ ካዎይ ዴና፤ ሀላቃት ያፐ ክቻና። 13ካዎ ኬታ አጉን፥ ሚፃታ ኦህ ማአና፤ ዎርካናት አላትያ በስነ ያንቾት ደእያ ሶ ግዳና። 14ባዞ ዶአት ጎዳረታራ ጋሄታና፤ ቱና አያናት እሶይ እሱዋራ ፄገታና፤ ቃማ ቆለት ዎድ ያን ዳና። 15ጉቶት ያን ኬ ኬፅድ፥ ጱጱልድ ቆፃና። ባንታ ናይታ ባንታ ቀፈታ ጋርሳን ሀጳና፤ ጵርጮት ባንታ ላገታራ ያን ሺቃና።

16ጎዳ ማፃፋን ኮይድ ናባብተ። ጎዳ ዶናይ ኦድዳ ግሾነ እያ አያናይ ሺሽዳ ግሾ፥ ሀይሳታፐ እሶይካ ፓጨና፤ ቃስ እሶይካ ባ ላገይ ባይና ዴና። 17እ፥ ኤንታዉ ሳማ ከስስ፤ እያ ኩሸይ ቢታ ኤንታዉ ዎዶሮን ሻክስ፤ ኤንቲ እያ መርናዉ ላታና፤ የለተፈ የለተ ጋካናዉ ኤንቲ ያን ዳና።