ህዝቄላ 4

የሩሳላመ ተቀተ ሌምሶ

1“ነኖ አሳ ናአዉ፥ ቢታፈ መዳ ፁበ ኤካዳ፥ ነ ስንን ዎ፤ ያታዳ የሩሳላመ ካታማ ምስለ እያ ቦላ መ። 2ካታማ ዩሹዋ ድራ፤ እያ ቢታ ዶራ፤ ሚፃ ኬ፤ ኦላንቾት ኡትያ በሲ ጊግሳ፤ ግምብያ ላልያ ዱሩማ እያ ዩሾን ጊግሳ። 3ብራታ ባሸ ኤካዳ፥ ነ ግዶንነ ካታማ ግዶን ድርስ ኦዳ ኤሳ። ነ ሶምኡዋ እያኮ ዛራዳ ደሬቃ፤ ካታማ ዩሹዋ ተቃ፤ እያ ተቀይካ ነና፤ ሄስካ እስራኤለ አሳስ ማላ ግዳና።

4“እስራኤለ አሳ ሴረተስ ማላ ግዳና መላ ኔኒ ነ ሀድርሳ ምየን ዝንአ። ኔኒ ነ ሀድርሳ ምየን ዝንእያ ጋላሳታ ታይቡዋን እስራኤለ አሳይ ዋንድ ሴረታናዉ ደእያኮ በሳና። 5እስራኤለ አሳይ ዋንድ ሴረታናዉ ደእያኮ በሳናዉ ኔኒ ዝንአና መላ ሄ ፄታነ ኡዱፉን ታሙ ጋላስ ነዉ እማስ፤ እስ ጋላስ እስ ላይራ ግና ግዳና።

6“ኔኒ ሄ ጋላሳታ ፖልዳፐ ጉየ፥ ዛራዳ፥ ይሁዳ አሳይ ዋንድ ሴረታናዉ ደእያኮ በሳናዉ ነ ኡሻቻ ምየን ዝንአና መላ ኦይታሙ ጋላስ ነዉ እማስ። እስ ጋላስ እስ ላይራ ግና ግዳና። 7ነ ሶምኡዋ ተቀትዳ የሩሳላመኮ ዛራዳ፥ ነ ኩሽያ ደንዳ ማንዳሸ፥ የሩሳላመ ቦላ ትንብተ ኦዳ። 8ሄ ተቀይ ዉራና ጋካናዉ እስ ምየፐ ሀራ ምየ ሽረቶና መላ ታ ነና ዎዶሮን ቃቻና።

9“ኔኒ ግስተነ ባንጋ፥ ቆምኦሎነ ምስረ፥ ማልዶነ ሙርቃ ኤካዳ፥ ካ ዎያ ሚሸን ቆላዳ፥ ኔኒ ዝንእያ ሄ ፄታነ ኡዱፉን ታሙ ጋላስ እያፐ ካዳ ማና። 10ጋላስ ጋላስ ነ ምያ ካ ማዛና፤ እካ ናምኡ ፄታነ ሀስታሙ ግራመ ግዶ፤ ሄሳ እያ ዎደን ዎደን ማ። 11ጋላስ ጋላስ ነ ኡያ ሃይካ ልከራ ግዶ፤ እካ ናምኡ ኩባያ ግዶ፤ ሄሳ እያ ዎደን ዎደን ኡያ። 12ዎራ ሼሻ ከምኤለ ኤዳ፥ አሳይ ፄልሽን፥ ሄ ዋላክዳ ካ ባንጋ ኡይዳ ኡካዳ ማ። 13ሄስ እስራኤለ አሳይ ታ ኤንታ ላልያ ካዎተታ ግዶን ደእሸ፥ ቱንዳ ካ ማናዉ ደኤይሳስ ማላ” ያግስ።

14ታኒ፥ “ሀይእ! ኡባ ሃርያ ጎዳዉ፥ ሄስ ሀነና፤ ታኒ ቱናዳ ኤርከ። ታ ናአተፈ ዶማዳ ሀች ጋካናዉ፥ ባዉታ ዎይኮ ዶእ ዎዳባ ማ ኤርከ፤ ቱንዳ አሾይ ታ ዶናኮ ሺቅ ኤረና” ያጋስ።

15እ ዛሪድ፥ “ሎኦ፥ ያትኮ፥ ዎራ ሼሻ ከምኤለን ኡከይሳ አጋዳ፥ ኦሻ ከምኤለን ነ ኡይ ኡካ” ያግስ።

16እ ጉጅድ፥ “ነኖ፥ አሳ ናአዉ፥ አኬካ! የሩሳላመ ካታማ ካ ገሎና መላ ታኒ ተቃና ሀናይስ። አሳይ ካ ህርግሸ ማክድ ማና፤ ሃ ያይሸ ልክድ ኡያና። 17ህዛ፥ ኤንታዉ ደእያ ካይነ ሃይ ዉራና፤ ኤንቲ ዳጋማን እሶይ እሱዋ ፄላና፤ ባንታ ናጋራ ጋሶን ሴረትድ ግልቃና።