ጌሻ ማፃፋ
ህዝቄላ 33
ህዝቄል ዎችያ አስ
ጎዳ ቃላይ ሀይሳዳ ያግሸ ታኮ ይስ። “አሳ ናአዉ፥ ነ ቢታ አሳስ ሀይሳዳ ያጋዳ ኦዳ፦ ‘ታ እስ ቢታ ቦላ ኦላ ኤህያ ዎደ ሄ ቢታ አሳይ ባንታ ቦላ ያባ ዎችያ አስ ዶሮ ባንታ ግዶፈ ዶሮ። ሄ ዎችያ ኡራይ ሞርከይ ይሽን በእድ፥ አሳይ ናገታና መላ ሞይዘ ፑንኮ፥ ኦንካ ሞይዘ ፑኑዋ ስእድ፥ ናገቶና እፅን፥ ኦል ይድ እያ ዎኮ፥ ሱ አጮይ እያ ኦይኮ። እ ሞይዘ ፑኑዋ ስእድ፥ ናገቶና እፅዳ ግሾ እያ ሱ አጮይ እያ ቦላና። እ ስእድ ናገትዳባ ግድያኮ ሀይቆፐ አታናሽን። ሽን ዎቸይስ ሞርከይ የይሳ በእሸ፥ ሞይዘ ፑንድ አሳ ኤርሶና አግኮ፥ ኦላይ ይድ፥ ሄ አሳፐ እስ አስ ዎኮ፥ ሄ ኡራይ ባ ናጋራን ሀይቄስ፤ ሽን ታኒ እያ ሱ ዎቸይሳ ኩሸፐ ኤካና’ ” ያጋ።
“አሳ ናአዉ፥ ታ ነና እስራኤለ አሳስ ዎችያ አስ ኦስ፤ ታ ነዉ ኦደይሳ ስአዳ አሳ አኬክሳ። ታኒ እስ ኢታ አስ፥ ‘ኔኒ ቱማ ሀይቃና’ ግያ ዎደ፥ እ ባ ናጋራፐ ስማና መላ ነ እያዉ ኦዶና እፅኮ፥ ሄ ኡራይ ባ ናጋራን ሀይቄስ፤ ሽን ታኒ እያ ሱ ግሾ ነና አቻና። ሽን ናጋራንቾይ ባ ናጋራፐ ስማና መላ ነ ኦድን፥ እ እፅኮ፥ እ ባ ናጋራን ሀይቄስ፤ ሽን ነ ነ ሸምፑዋ አሻሳ።”
“አሳ ናአዉ፥ እስራኤለ አሳስ ሀይሳዳ ያጋዳ ኦዳ፦ ‘ህንተ፥ ኑ ናጋራይ ኑ ቆሆይ ኑ ቦላ ደኤስ፤ ሄሳ ጋሶን ኑ ግልቅዳ። ያትን፥ ኑ ዋንድ ፓፃ ዳናዉ ዳንዳኦና?’ ” ያጌታ። ታኒ ኡባ ሃርያ ጎዳይ ታ ደኡዋን ጫቃይስ፦ “ናጋራንቾይ ባ ናጋራ አግድ፥ ደኦን ዳና መላ ኮያይስፐ አትሽን፥ ናጋራንቹዋ ሀይቁዋን ኡፋይትከ። ህንተኖ፥ እስራኤለ አሳዉ፥ ስምተ፤ ህንተ ኢታ ኦሱዋ አግተ! አይስ ሀይቃናዉ ኮዬቲ?” ያግስ።
አሳ ናአዉ፥ ነ ቢታ አሳስ ኦዳ። “ፅሎ አስ ናጋራ ኦኮ፥ እያ ካሰ ፅሎተይ እያ አሸና፤ ቃስ ናጋራንቾይ ባ ናጋራፐ ስምኮ፥ ካሰ ናጋራ ግሾ እ ፕርደተና። ፅሎ አስ ናጋራ ኦኮ፥ ካሰ ፅሎተ ግሾ ደኦን ዳናዉ ዳንዳኤና። ታኒ ፅሎ አሳኮ፥ ‘ኔኒ ቱማ ደኦን ዳና’ ያግዳ ዎደ፥ እ ባ ፅሎተን አማነትድ ናጋራ ኦኮ፥ ባ ኦዳ ናጋራን እ ሀይቃናፐ አትሽን፥ ካሰ ፅሎተይ እያው ቆፈተና። ቃስ ታኒ ናጋራንቾ አሳኮ፥ ‘ኔኒ ቱማ ሀይቃና’ ያግዳ ዎደ እ ባ ናጋራፐ ስሚድ፥ ቱማነ ሱረ ኦሶ ኦኮ፥ ሚሸ ታልአናዉ ኦይክዳባ ዛርኮ፥ ካይሶትዳባ ጉየ እምኮ፥ ናጋራ ኦሶ አግድ፥ ደኦ እምያ ህግያ ናግኮ፥ እ ቱማ ደኦን ዳናፐ አትሽን፥ ሀይቀና። እ ካሰ ኦዳ ናጋራይ እሶይ ቆፈተና፤ ሀእ ቱማነ ሱረ ኦሶ ኦዳ ግሾ፥ እ ቱማ ደኦን ዳና።
“ግዶሽን፥ ነ ቢታ አሳይ፥ ‘ጎዳ ኦገይ ልከ ግደና’ ያጎሶና፤ ሽን ልከ ግዶናይ ኤንታ ኦግያ። ፅሎ አስ ባ ፅሎተ አግድ፥ ናጋራ ኦኮ፥ እ ባ ናጋራን ሀይቃና። ቃስ ናጋራንቾ አስ ባ ናጋራፐ ስሚድ፥ ቱማነ ሱረ ኦሶ ኦኮ፥ ሄ ኦሱዋን እ ደኦን ዳና። ሽን ህንተ፥ ‘ጎዳ ኦገ ልከ ግደና’ ያጌታ። እስራኤለ አሳዉ፥ ታ ህንተ እሱዋ እሱዋ ቦላ ህንተ ኦሱዋዳ ፕርዳና” ያግስ።
የሩሳላመ ኩንደ
ኑኒ ድኤትዳ ታማነ ናምአን ላይን፥ ታማን አጌናን፥ እቻሻን ጋላሳን፥ የሩሳላመፐ ከስ ኤክድ ይዳ እስ አስ ካታማይ ኩንድዳይሳ ታዉ ኦድስ። ሄ ኡራይ ያናፐ እስ ጋላስ ስን፥ ኦማርሳ ዎደ ጎዳ ኩሸይ ታ ቦላ ደኤስ፤ ታ ዶናይ ዶየትስ፤ ዎንተ ጋላስ ሄ ኡራይ ታኮ ጋክያ ዎደ ታኒ ኦዳ ዶማስ።
ጎዳ ቃላይ ሀይሳዳ ያግሸ ታኮ ይስ። “አሳ ናአዉ፥ እስራኤለ ቢታን ላለትዳ ካታማታን ደእያ አሳይ ሀይሳዳ ያጎሶና፦ ‘አብራሃመይ ባርካ ደእያ እስ አስ፤ እ ሀ ቢታ ላትስ፤ ሽን ኑኒ ዳሮ፤ ቢታይ ቱማ ኑስ ላታ ግድድ እመትስ’ ” ያጎሶና።
ሄሳ ግሾ፥ ኡባ ሃርያ ጎዳይ ሀይሳዳ ያጌስ ጋዳ ኤንታዉ ኦዳ። “ህንተ ሀእካ ሱራ ደእያ አሾ ሜታ፤ ኤቃ ጎይነታ፤ ሸምፖ ዎታ። ሀይሳ ኡባ ኦሸ ህንተ ቱማ ቢታ ላታኔ? ህንተ ህንተ ማሻን አማነተታ፤ ቱና ኦሶ ኦታ፤ ህንተ ኡባይ ህንተ ሾሩዋ ማቸታ ቱንሴታ። ሀይሳ ኡባ ኦሸ ህንተ ቱማ ቢታ ላታኔ?” ያጌስ።
ኡባ ሃርያ ጎዳይ ባ ደኡዋን ጫቅድ ሀይሳዳ ያጌስ፦ “ላለትዳ ካታማታን ደእያ አሳይ ማሻን ሀይቃና፤ ካታማፐ ጋፃን ደእያ አሳ ታኒ ባዞ ዶኣስ ካ ኦና፤ ደረ ቦላነ ጎንጎሎ ግዶን ደእያ አሳይ ኢታ ሀርገን ሀይቃና። ታ ሄ ቢታ ካሎነ ባይስ ከሳና፤ ኤንቲ ኦቶርትያ ዎልቃይ ዉራና፤ እስራኤለ ደረት አይ አስካ ያራ ካንና ባይስ ግዳና። ኤንቲ ኦዳ ቱና ጋሶን ታኒ ቢታ ካሎነ ባይስ ከስያ ዎደ፥ ታኒ ጎዳ ግደይሳ ኤንቲ ኤራና” ያጌስ።
“አሳ ናአዉ፥ አሳይ ካታማ ድርሳ ማታንነ ባንታ ኬታ ፐንገን ኤቅድ፥ እሶይ እሱዋራ ሀይሳዳ ያግድ፥ ነባ ኦደቴስ። ‘ሃይተ፤ ጎዳ ማታፐ ይዳ ቃላይ ዎይግያኮ አነ ስኦስ’ ያጎሶና። ኤንቲ ካሰ አሳይ የይሳዳ ኔኮ ዮሶና፤ ታ አሳዳ ነ ስንን ኡቶሶና፤ ነ ኦደይሳ ስኦሶና፤ ሽን ኦኮና። ኤንቲ ሲቆባ ሃሳዮሶና፤ ሽን ኤንታ ዎዛናይ ጎአ ፃላላ ያረቴስ። ነ ኤንታዉ እስ ሲቆ ማዝሙረ ሎኦ ግርሳን የፅያነ ዲ ሎይድ ዲፅያ አሳ መላ። ኤንቲ ነ ኦደይሳ ስኦሶና፤ ሽን ኦኮና። ሽን ነ ኦደይስ ቱማ ፖለታና፤ ፖለትያ ዎደ፥ ናበይ ኤንታ ግዶን ደኤይሳ ኤንቲ ኤራና” ያግስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.