ጌሻ ማፃፋ
ህዝቄላ 22
የሩሳላመ ናጋራ
ጎዳ ቃላይ ሀይሳዳ ያግሸ ታኮ ይስ። “አሳ ናአዉ፥ ሸምፖ ዎይሳት ኩምዳ ካታማ ቦላ ፕርዳናዉ ጊጋዲ? ያትኮ፥ እ ኦዳ ቱና ኦሶ ኡባ እያዉ ኦዳ። ኡባ ሃርያ ጎዳይ ሀይሳዳ ያጌስ ጋዳ ኦዳ፦ ነ ዳሮ አሳ ዎዳ ግሾነ ኤቃ ጎይኖን ነና ቱንስዳ ግሾ ነ ዮ ዎደይ ጋክስ። ነ ጉስዳ ሱን ባላ ግዳዳሳ፤ ነ ኦዳ ኤቃን ቱናዳሳ። ነ ፕርዳ ጋላሳይ ማታትስ፤ ነ ዮ ዎደይ ጋክስ። ሄሳ ግሾ፥ ታ ነና ካዎተታስ ሚቻስነ ሀራ ቢታታስ ቀልቅሴስ አጋና። ነኖ፥ ነ ሱንይ ኢትዳ ዳጋም ኩምዳ ካታማዉ፥ ማታንነ ሃሆን ደኤይሳት ነና ቀልቅሳና።
“ነ ግዶን ደእያ እስራኤለ ሀላቃት ኡባይ ሱ ጉሳናዉ ባንታ ዎልቃ አይ መላ ጎኤትያኮ በአ። ነ ግዶን ደኤይሳት ባንታ አዋነ ባንታ አይዉ ቦንቾኮና። ኤንቲ በተ አሳ ጭሞሶና፤ አምኤታነ አዉ አይያ ባይና ናይታ ናቆሶና። ኤንቲ ታ ጌሻ ሚሸታ ካኦሶና፤ ታ ሳምባታ ቱንሶሶና። ነ ግዶን እሶት እሶት ሀራታ ዎሳናዉ ዎርዶን ኦዶሶና፤ ሀራት ኤቃስ ያርሸትዳባ ሞሶና፤ ሀራት ላይማቶሶና። ነ ግዶን እሶት እሶት ባ አዋ ማቸራ ቱኖሶና፤ ሀራት ኩሸ መቶይ ደእያ ማጫሳራ ዎልቃን ቱንሶሶና። ነ ግዶን እሶት እሶት ባ ሾሩዋ ማቸራ ቱኖሶና፤ አዋይ ባ ናአ ማቸራ ቱኔስ፤ ባ አዋ ናእዉ፥ ባ ምችዉ ዎልቃን ኢስድ ዬላዬስ። ነ ግዶን እሶት እሶት ሚሸ ኤክድ፥ ሸምፖ ዎኦሶና፤ ሀራት ባንታ ሚሽያ ባንታ ያራ ግድዳ እስራኤለታስ የሎራ ታልኦሶና፤ ኤንታ ቦንቅድ ባንታዉ ዱረቶሶና፤ ታና ኩመ ዶግዶሶና” ያጌስ ኡባ ሃርያ ጎዳይ።
“አሳይ በሶና ሚሸ ኤክያ ግሾነ ሸምፖ ዎያ ግሾ፥ ታኒ ታ ኩሽያ ህንተ ቦላ ደንና። ታ ነና ሴርያ ዎደ ነ ጎባተይ ኔራ ዳኔ? ዎይኮ ነ ኩሸይ ምኖ ግዳኔ? ታኒ ጎዳይ ሀይሳ ኦዳስ፤ ታ ኦድዳይሳዳ ኦና። ታ ነና ካዎተታ ግዶንነ ቢታታ ግዶን ላላና፤ ነ ቱናተ ኔፐ ድጋና። ሀራ ካዎተታ ስንን ነ ካዉያና፤ ታኒ ጎዳ ግደይሳ ነ ኤራና” ያግስ።
ጎዳይ ታኮ ሀይሳዳ ያግስ፦ “አሳ ናአዉ፥ እስራኤለ አሳይ አይኮካ ፓኮና፤ ኤንቲ ኡባይ ብራ ሼሽያ ዎደ ናሰ ብራታፐ፥ ቆርቆሮፐ፥ ብራታፐነ እርሳሰፐ ከያ ሻአ መላ። ሄሳ ግሾ፥ ኡባ ሃርያ ጎዳይ ሀይሳዳ ያጌስ፤ ‘ህንተ ኡባይ አታላ መላ ግድዳ ግሾ ታ ህንተና ኡባ የሩሳላመ ሺሻና። ብራ፥ ናሰ ብራታ፥ ብራታ፥ እርሳሰነ ቆርቆሮ ታማን ሁብድ ሼሸይሳዳ ታ ህንተና ሺሻዳ ታ ሀንቁዋና ትልእሳና። ታ ህንተና የሩሳላመ ሺሻዳ፥ ታ ሀንቆ ታማ ህንተ ቦላ ኤዳ ህንተና ያን ትልእሳና። ብር ጮጨን ሼኤይሳዳ ህንተ የሩሳላመን ትልአና። ሄ ዎደ ታኒ ጎዳይ ታ ሀንቁዋ ህንተ ቦላ ጉስዳይሳ ህንተ ኤራና’ ” ያጌስ።
ዛሪድ ጎዳ ቃላይ ሀይሳዳ ያግሸ ታኮ ይስ። “አሳ ናአዉ፥ ኤንታ ቢታይ ቱንዳ ግሾ፥ ታ ሀንቁዋን እር ቡኮና መላ ድጋዳ ኤንታ ሴራ ዶምዳሳ እስራኤለ አሳስ ኦዳ። ነ ግዶን ኤንታ ሀላቃት ዎዳባ ጉድሸ መንረያ ጋሞ መላ፤ ኤንቲ ዎኦሶና፤ ሚሸ ግድን፥ ሀራ ቡቁራ ግድን፥ ኡባ ባንታዉ ኤኮሶና፤ ዳሮ ማጫሳታ አምኦ ኦዶሶና። ካህነት ታ ህግያ መንዶሶና፤ ታ ጌሻባታ ቦንችቦኮና። ጌሽነ ጌሽ ግዶና ባ ሻኮኮና፤ ቱናነ ቱና ግዶና ባ ሻክድ ታማርሶኮና፤ ታ ሳምባታ የግ አግደታ። ሄሳ ጋሶን ታ እስራኤለ አሳ ግዶን ቦንቸታብከ። ሀላቃት ባንታ ዎዳባ ዱሰረያ ሱመ መላ፤ ኤንቲ ባንታዉ በሶና ዱረተ ደማናዉ ሸምፖ ዎኦሶና። ናበት ጎዳ ቦቅንተ ትይያ አሳዳ፥ ዎርዶ ቆንጨ በእድ፥ ዎርዶ ትንብተ ኦድድ ኤንታ ናጋራ ገንሶና። ጎዳይ ኦዶና ደእሽን፥ ‘ኡባ ሃርያ ጎዳይ ሀይሳዳ ያጌስ’ ያጎሶና። ቢታን ደእያ አሳይ ቦንቆሶና፤ ማንቆታነ መቶታንቾታ ኡንኤሶና፤ ኤንቲ ሱረ ፕርዳ ድግድ በተ አሳ ጌላዮሶና።
“ታኒ ቢታ ይሶና መላ ድርሳ ግምብያ ኬፀይ፥ ላለትዳ ድርሳ ግምብያ ባጋራ ታ ስንን ኤቅድ ናግያ እስ አስ ኮያስ፤ ሽን ኦናካ ደማብከ። ሄሳ ግሾ፥ ታ ሀንቁዋ ኤንታ ቦላ ጉሳና፤ ታኒ ታ ይሉዋን ኤንታ ይሳና፤ ኤንቲ ኦሱዋ ኤንታ ቦላ ዛራና” ያጌስ ኡባ ሃርያ ጎዳይ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.