ህዝቄላ 19

እስራኤለ ካዎታስ ከስዳ ዘለልስ

1ጎዳይ ህዝቄላኮ፥ እስራኤለ ሀላቃታስ ሀይሳዳ ያጋዳ ዘሌላ፦

2“ህንተ አይያ ጋሞታ ግዶን ዋንዳ ጋሞ!

ያላጋ ጋሞታ ግዶን ዝንአዳ፥ ባ ማራታ ድቻሱ።

3እያ ባ ማራታፐ እሱዋ ድችን፥

እ ዎዳላ ጋሞ ግድስ፤

ሻንካ ታማርስ፤ አሰ ሙሱ ዶምስ።

4ካዎተት ኡባይ እያባ ስእዶሶና፤

ኤንቲ ቦክዳ ኦላን ገልድ ኦይከትስ፤

ሲን ዎዶሮ አድ ግብፀ ቢታ ኤፍዶሶና።

5እያ አይያ ናግዳይስ ሀኖና እፅን፥

እ ኡፋይሳይ ይዳይሳ በእዳ ዎደ፥

ባ ማራታፐ እሱዋ ድቻዳ፥ ዎዳላ ጋሞ ከሳሱ።

6እ ዎዳላ ጋሞ ግድድ፥ ሀራ ጋሞታራ ስመረትስ፤

እ ሻንካ ታማርስ፤ አሰ ሙሱ ኦይክስ።

7እ ኤንታ ሚፃ መንረስ፤ ካታማታ ይስስ፤

እ ጉድያ ዎደ ቢታን ደእያ አሳ ኡባይ ዳጋሜስ።

8እያ ዩሹዋን ደእያ ካዎተት ኡባይ

እያ ኦይካናዉ ፅሄ ዎዶሶና፤

ባንታ ግትያ ምጭዶሶና፤ ኤንታ ኦላን እ ኦይከትስ፤

9ኤንቲ እያ ስን ዎዶሮ አድ ሆን የግድ፥

ባብሎነ ካዋኮ ኤፍዶሶና።

እ ጉደይስ ዛሪድ እስራኤለን ስኤቶና መላ

ኤንቲ እያ ቃሾ ኬን የግዶሶና።

10ነ አይያ ሃ ዶናን ቶከትዳ ዎይነ መላ፤

ዳሮ ሃ ደእያ ግሾ

ዎይነይ ዳሻንነ አይፈን ኩምድ ደኤስ።

11እያ ታሸት ምኖ ግድያ ግሾ

ካዎታ ፃምአ ግድዶሶና።

ዎይነይ ዎራን ደእያ ምታፐ አድ ድጭስ፤

ባ ታሽያ ዳሮተንነ አዱሳተን

ኡባፈ ቦላራ በንትስ።

12ሽን ሄ ዎይነይ ሀንቆን ሾደትድ ሳአን የገትስ፤

ዶሎሀ ጫርኮይ እያ አይፍያ መልስስ፤

እያ ምኖ ታሸይ መልን ታም ምስ።

13ሀእ እ ሃ ባይና

መላ ቢታን ቶከትስ።

14ታም እያ ኡባፈ ከይድ፥

እያ አይፍያነ ታሽያ ምስ።

ካዎታ ፃምአ ግዳና ምኖ ታሸይ፥

እያ ቦላ በንትቤና።

ሀይስ ዬሆ ዘለልስ፤ ሀይሳ ዘለልስ ከስያ ዎደ ጎኤታናዉ በሴስ” ያግስ።