ጌሻ ማፃፋ
ህዝቄላ 10
ቦንቾይ ፆሳ ኬፈ ሻከትስ
ታኒ ክሩበታ ሁጰፐ ቦላ ባጋራ ደእያ ሳሎ ጉፋን ዳነይሳ በአስ። ክሩቤላ ቦላ ሳንፓረ አልኦ ሹቻፈ ኦሰትዳ አራታ በአስ። ጎዳይ ሊኖ ማእዳ አድያኮ፥ “ክሩቤላፐ ጋርሳ ባጋራ ገርቶታ ግዶራ ካንዳ ባ። ፂፋ ቦንቆ ነ ኩሸን ኮጰታ ኤካዳ፥ ካታማ ቦላ ላላ” ያግስ።
ታ ፄልሽን ታማ ኤካናዉ ገልስ። አደይ ሶ ገልያ ዎደ ክሩቤቲ ፆሳ ኬፈ ጋርሳ ባጋራ ኤቅዶሶና፤ ግዶ ዳባባን ሻር ኩምስ። ጎዳ ቦንቾይ ክሩቤላ ቦላፈ ደንድድ፥ ፆሳ ኬ ፐንገ ብስ። ሻር ኬ ኩምስ፤ ዳባባይ ጎዳ ቦንቾ ጶለን ኩምስ። ክሩቤላ ቀፍያ ግርሳይ ኡባ ሃርያ ጎዳ ግርሳዳ ካረ ዳባባን ስኤቴስ።
ጎዳይ ሊኖ ማእዳ አድያ፥ “ክሩቤላ ጋርሳ ባጋን ደእያ ገርቶታ ግዶፈ ታማ ኤካ” ያግድ ኪትን፥ እ ገልድ እስ ገርቱዋ ማታን ኤቅስ። ክሩቤላፐ እሶይ ባንታ ግዶን ደእያ ታማን ባ ኩሽያ የድድ፥ እያፐ ጉራ ኤክድ፥ ሊኖ ማእዳ አድያ ኩሸን ዎን፥ እ ኤክድ ከይስ። ክሩቤላ ቀፍያፐ ጋርሳ ባጋራ አሳ ኩሸ ዳንያባይ ደኤስ።
ታ ፄልያ ዎደ ክሩቤላ ማታን ኦይዱ ገርቶይ ደኤስ። እስ እስ ክሩብያ ማታን እስ እስ ገርቶይ ደኤይሳ በአስ፤ ሄ ገርቶይ አልኦ ሹቻዳ ጶሌስ። ኤንቲ ኦይዳይ እሶይ እሱዋ ዳኖሶና፤ እስ እስ ገርቶይ ሀራ ገርቶ ግዶራ ካን አድ መትዳ ዳኔስ። ክሩቤቲ ብያ ዎደ ኦይዱ ባጋ ያ ሃ ስሞና ቦሶና፤ እስ ገርቶት ብዳ ግንደ ሀንኮ ገርቶይ ያ ሃ ስሞና ስት ግድ ቦሶና። ኤንታ ኩመ ቦላ፥ ሄስካ ኤንታ ዞኩዋን፥ ኤንታ ኩሽያን፥ ኤንታ ቀፍያንነ ኤንታ ኦይዱ ገርቶታን ፄልያ አይፈይ ኩምስ። ታ ስእሽን፥ ገርቶት ዩይያ ገርቶታ ጌተትድ ፄገትዶሶና። እስ እስ ክሩብያስ ኦይዱ ሶምኦይ ደኤስ። ኮይሮ ሶምኦይ ክሩበ ሶምኦ፥ ናምአንይ አሳ ሶምኦ፥ ሄንይ ጋሞ ሶምኦ፤ ኦይዳንይ አርጋን ሶምኦ።
ክሩበት ፑደ ደንድዶሶና። ኤንቲ ታኒ ኮቦራ ሻፋ ማታን በእዳ ደኦን ደእያ መታታ። ክሩበት ብያ ዎደ፥ ኤንታ ምየን ደእያ ገርቶት ቦሶና፤ ክሩበት ቢታፈ ፑደ ደንዳናዉ ባንታ ቀፍያ ምጭያ ዎደ ገርቶት ኤንታ ምየፐ ሻከቶኮና። ደኦን ደእያ መተታ አያናይ ገርቶታ ግዶን ደእያ ግሾ፥ ኤንቲ ኤቅያ ዎደ ገርቶት ኤቆሶና፤ ኤንቲ ቢታፈ ፑደ ደንድያ ዎደ ኤንቲ ደንዶሶና።
ሄሳፈ ጉየ፥ ጎዳ ቦንቾይ ፆሳ ኬ ፐንገፈ ደንድድ፥ ክሩበታፐ ቦላ ባጋን ኤቅስ። ታ ፄልሽን፥ ክሩበት ባንታ ቀፍያ ምጭድ፥ ክርክሮታራ እስፈ ቢታፈ ፑደ ደንድዶሶና። ኤንቲ ፆሳ ኬፈ ዶሎሀ ባጋ ፐንግያ ማታን ኤቅዶሶና። እስራኤለ ፆሳ ቦንቾይ ኤንታፈ ቦላ ባጋራ ደኤስ።
ኤንቲ ኮቦራ ሻፋን እስራኤለ ፆሳፈ ጋርሳ ባጋራ በእዳ ደኦን ደእያ መታታ። ኤንቲ ክሩበታ ግደይሳ ታ ኤራስ። ኤንታ ኡባስ ኦይዱ ሶምኦትነ፥ ኦይዱ ቀፈት ደኦሶና፤ ኤንታ ቀፈታፐ ጋርሳ ባጋራ አሳ ኩሸ ዳንያባይ ደኤስ። ኤንታ ሶምኦት ኮቦራ ሻፋ ማታን ታ በእዳ ሶምኦታ ዳኖሶና። ኤንቲ ኡባይ ስት ግድ ስን ቦሶና።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.