ጌሻ ማፃፋ
ከሳ 7
ጎዳይ ሙሰኮ፥ “ሄኮ ታኒ ነና ግብፀ ካዋስ ፆሳ መላ ኦስ። ነ እሻ አሮን ነ ናበ ግድድ እያዉ ኦዳና። ታኒ ነና ኪትዳ ኪታ ኡባ አሮናስ ኦዳ። እ፥ እስራኤለታ ባ ቢታፈ ከስ የዳና መላ ካዋስ ኦዳና። ሽን ታኒ ካዉዋ ዎዛና ሙምሳና። ታኒ ግብፀ ቢታን ማላታታነ ማላልስያባታ ኦኮካ፥ እ ህንተ ኦድያባ ስኤና። ሄ ዎደ ታኒ ግብፀታ ፕርዳና፤ ታ ደርያ እስራኤለ ግብፀፈ ከሳና። ሄስ ሀንያ ዎደ ታኒ ጎዳ ግድዳይሳ ግብፀት ኤራና” ያግስ።
ሙሰይነ አሮን ጎዳይ ኪትዳይሳዳ ኦዶሶና። ኤንቲ ካዋስ ኦድያ ዎደ፥ ሙሰስ ሆስፑን ታሙ ላይ፤ አሮናስ ቃስ ሆስፑን ታማነ ሄ ላይ።
አሮና ፃምአ
ጎዳይ ሙሰነ አሮና፥ “ካዎይ ህንተና፥ ማላታ ኦድ ታና በስተ ጊኮ፥ አሮን ባ ፃምአ ኤክድ ካዉዋ ስንን የጋና መላ እያዉ ኦዳ፤ ሄ ፃምአይ ሾሽ ግዳና” ያግስ። ሙሰይነ አሮን ካዋኮ ብድ ጎዳይ ኤንታ ኪትዳይሳዳ ኦዶሶና። አሮን ባ ፃምኣ ካዉዋ ስንንነ እያ ሞርናታ ስንን የግን ፃምአይ ሾሹ ግድስ። ሄሳፈ ጉየ ካዎይ ማሮታነ ብታንቾታ ፄግስስ። ኤንትካ ባንታ ብታን ሄሳዳ ኦዶሶና። ኤንቲ ኡባይ ባንታ ፃምኣ ሳአን የግዳ ዎደ ፃምአት ሾሽ ግድዶሶና። ሽን አሮና ፃምአይ ኤንታ ፃምአታ ምትስ ግዶሽን ጎዳይ ግዳይሳ መላ ካዋ ዎዛናይ ሙምስ። እ ኤንቲ ገይሳ ስኦና እፅስ።
ሃ ሱ ላመተ
ጎዳይ ሙሰ፥ “ካዋ ዎዛናይ ሙምስ፤ እ አሳ የዶና እፅስ። ዎንቶ ዎንታ ጉራ ሾሽ ላመትዳ ፃምኣ ኤካዳ፥ ናይለ ሻፋ ማታን ኤቃዳ፥ ካዉዋራ ጋሄታናዉ ናጋ። እያኮ፥ ‘ጎዳይ፥ እብራወታ ፆሳይ ታ አሳይ መላ ቢታን ታዉ ጎይናና መላ የዳ’ ያግድ ታና ኔኮ ኪትስ። ሽን ኔኒ ሀኖ ጋካናዉ እፃዳሳ። ጎዳይ፥ እ፥ ጎዳ ግደይሳ እ ኦያባን ኔኒ ኤራና። ታኒ ናይለ ሻፋ ሃ ታ ኩሸን ደእያ ፃምአን ሾጭኮ ሃይ ሱ ላመታና። ናይለ ሻፋን ደእያ ሞሎይ ሀይቃና፤ ሻፋይካ ፅንቃና። ግብፀት ሄ ሻፋ ሃ ኡያናዉ ዳንዳኦኮና” ያጋዳ ኦዳ።
ጎዳይ ሙሰኮ፥ “አሮን ግብፀን ደእያ ሃታ ቦላ፥ ሻፋታ ቦላ፥ ዛራ ሃታ ቦላ፥ ተቀ ሃ ቦላነ ዱቀትዳ ሃ ኡባ ቦላ ባ ፃምኣ ደንና መላ ኦዳ። ሄ ዎደ ሃ ኡባይ ሱ ላመታና። ሀር አቶሽን ግብፀ ቢታን ምፈነ ሹቻፈ ኦሰትዳ ሃ ትክያ ሚሸታን ደእያ ሃይ ኡባይ ሱ ላመታና ያጋ” ያግስ።
ሙሰይነ አሮን ጎዳይ ኪትዳይሳዳ ኦዶሶና። ካዉዋ ስንንነ እያ ሞርናታ ስንን ባ ፃምኣ ደንድ፥ ናይለ ሻፋ ሃ ሾጭስ። ሃ ኡባይ ሱ ላመትስ። ሄ ሻፋ ሃን ደእያ ሞሎት ሀይቅዶሶና። ሻፋ ሃይ ኢታ ፅንቅዳ ግሾ፥ ግብፀ አሳይ ኡያናዉ ዳንዳእቦኮና። ግብፀ ቢታ ኡባን ሱ ኩምስ። ሽን ግብፀ ብታንቾት ባንታ ብታን ሄሳዳ ኦዶሶና። ጎዳይ ግዳይሳዳ ካዉዋ ዎዛናይ ሙምን፥ ሙሰይነ አሮን ኦድዳይሳ ስኦና እፅስ። ካዎይ ሄ ሀንዳባ አይብንካ ታይቦና የግ አግድ ባ ጋ ስሚድ ብስ። ግብፀ አሳይ ናይለ ሻፋ ሃ ኡያናዉ ዳንዳእቦና ግሾ፥ ኡይያ ሃ ደማናዉ ሻፋ ጋፃን ኦላ ቦክዶሶና።
ጎዳይ ሃ ሾጭ ስምን ላፑን ጋላስ ግድስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.