ጌሻ ማፃፋ
ከሳ 26
ጌሻ ዱንካነ
(ከሳ 36:8-38)
“ዱንካንያ ጋ ባጋስ አልኦ ሊኖፐ ኦሰትዳ፥ ታሙ ገሸ ጊግሳ። ኤንታ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ ክሩበታ ምስልያራ አሌቅሳ። ገሸት ኡባይ እስ ልከ ግዶ፤ አዱሳተይ ላታማነ ኦይዳ፥ ጎምፓይ ቃስ ኦይዱ ዋ ግዶ። እቻሹ ገሸታ እስፈ ጋዳ ስካ፤ ሀንኮ አትዳ እቻሻታ ሄሳዳ ኦ። እስፈ ጋሄትድ ስከትዳ ናምኡ ገሸታስ እሱዋ እሱዋ ጋፃን ካሎሰ አፍላፐ ኦሰትዳ ሳጋዮታ ኦ። እስፈ ስከትዳ ኮይሮ ማጋራጁዋ ቦላ ኮይሮ ማራን ካሎሰ አፍላፐ ኦሰትዳ እሻታሙ ሳጋዮታ ኦ፤ ሄሳዳካ ናምአን ማጋራጁዋ ቦላ ዉርሰ ጋፃን እሻታሙ ሳጋዮታ ኦ። ጌሻ ዱንካነይ እስኖ ግዳና መላ ናምኡን ሻከት ስከትዳ ገሸታ ዎል ጋድ ኦይሰናዉ፥ እሻታሙ ዎርቃፈ ኦሰትዳ ኦይክያባታ ኦ።
“ጌሻ ዱንካንያ ቦላራ ካማና መላ ታማነ እስ ገሸታ ዴሻ እክሰፐ ኦ። ታማነ እስ ገሸት እስ ግና ግዶ፤ እስ እስ ማጋራጁዋ አዱሳተይ ሀስታሙ ዋ፥ ጎምፓይ ኦይዱ ዋ ግዶ። እቻሹ ገሸታ እስ ባጋራ፥ ኡሱፑን ገሸታ ሀንኮ ባጋራ ጋዳ ስካ። ኡሱፑን ማጋራጆይ ዳኮየትድ፥ ዱንካንያስ ስን ባጋራ ዳቡለቶ። ዎል ጋ ስክዳ ገሸታፐ እስ ማጋራጁዋስ ማጫራ ቦላ እሻታሙ ሳጋዮታ ኦ፤ ቃስ ሀንኮ ማጋራጁዋስ ማጫራ ቦላ እሻታሙ ሳጋዮታ ኦ። ናምኡን ሻከት ስከትዳ ገሸት እስ ካማ ግዳና መላ እሻታሙ ናሰ ብራታፐ ኦሰትዳ ኦይክያባታ ኦ። ሄ ዱንካንያ ገሸታፐ ፓላህዳ ባጋ ኤካዳ ጌሻ ዱንካንያስ ጉየ ባጋራ ካቃ። ዱንካንያ ገሸታፐ አዱሳተ ባጋራ ፓላህዳ ጎምፓይ እስ እስ ዋ ግድዳ ገሸታ ጌሻ ዱንካንያስ ናምኡ ባጋራ ካቃ።
“ዱንካንያስ ቦላ ባጋራ ዳቡልድ ካማናዉ ዞኦ ቃላመን ትየትዳ ማራዘ እተነ ሎኦ ዶአ እተ ኦ። ጌሻ ዱንካንያ ቱቀታ ሶቃላ ምፈ ኦ። እስ እስ ቱቅያ አዱሳተይ ታሙ ዋ፥ ጎምፓይ እስ ዋነ ባጋ ግዶ። ናምኡ ቱቀት እስፈ ኦይከታና መላ እስ እስ ቱቅያስ ኦይሰያባይ ደኦ። ጌሻ ዱንካንያ ቱቀታ ኡባ ሄሳዳ ኦ። ጌሻ ዱንካንያ ዉሎሀ ባጋራ ላታሙ ቱቀታ ኦ። ኤንታና ኤሳናዉ ኤንታ ጋርሳን ብራ ብራታፐ ኦሰትዳ ኦይታሙ ሉሆይ ደእያ ቶሆታ ኦ። እስ እስ ቱቅያስ ናምኡ ናምኡ ቶሆ ከሳ። ጌሻ ዱንካንያ ፑደሀ ባጋራ ላታሙ ቱቀታ ኦ። ኤንታና ኤሳናዉ ኤንታ ጋርሳን ብራ ብራታፐ ኦሰትዳ ኦይታሙ ሉሆይ ደእያ ቶሆታ ኦ። እስ እስ ቱቅያስ ናምኡ ናምኡ ቶሆ ከሳ። ጌሻ ዱንካንያስ ጉየራ ዉሎሀ ባጋራ ኡሱፑን ቱቀታ ኦ። ጉየ ባጋራ ደእያ ማዛነታስ ናምኡ ቱቀታ ኦ። ሄ ማዛንያን ደእያ ቱቀት ቶሆፐ ሁጰ ጋካናዉ ኦይከቶ። ናምኡ ማዛነታ መያ ናምኡ ቱቀታ ሄሳ ኦሰታናዉ በሴስ። ሄሳዳካ ናምኡ ናምኡ ቶሆይ ደእያ ሆስፑን ቱቀታ ኦዳ፥ ኤንታዉ ብራ ብራታፐ ኦሰትዳ ታማነ ኡሱፑን ሉሆይ ደእያ ቶሆታ ኦ።
“ቱኡቀታ ሳድ ኦይያ ሶቃላ ምፈ ኦሰትዳ ታማነ እቻሹ ልዮታ ከሳ። ኤንታፈ እቻሻታ ጌሻ ዱንካንያስ እስ ባጋ ምየን ደእያ ቱቀታስ፥ ቃስ እቻሻታ ሀንኮ ባጋ ምየን ደእያ ቱቀታስ፥ ሄሳዳካ አትዳ እቻሻታ ዉሎሀ ባጋን ደእያ ቱቀታስ ኦ። ሀ ጋፃ ቱቅያፐነ ያ ጋፃ ቱቅያፐ ይያ ልዮት ግዶ ቱቅያራ ኦይከቶ። ቱኡቀታ ዎርቃን ላንፃ፤ ልዮታ ኦይካናዉ ማድያ ሳጋዮታ ዎርቃፈ ኦ፤ ቃስ ልዮታ ዎርቃን ላንፃ። ጌሻ ዱንካንያ ዙማ ቦላ ታ ነና በስዳይሳዳ ኦ።
“አልኦ ሊኖፐ እስ ማጋራጆ ኦዳ፥ እያ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ ክሩበታ ምስለን አሌቅሳ። እያ ሶቃላ ምፈ ኦዳ፥ ዎርቃን ሜሸትዳ ኮጫታንነ ብራ ብራታፐ ኦሰትዳ ኦይዱ ቶሆይ ደእያ ቱሳታ ቦላ ካቃ። ሄ ማጋራጁዋ ጌሻ ዱንካንያስ ካራን ደእያ ቃጰታፐ ጋርሳን ካቃ። ያታዳ ህገይ ፃፈትዳ ናምኡ ሎቸ ሹቻታ ኦይክዳ ጫቆ ታቦትያ ማጋራጁዋስ ጉየ ባጋን ዎ። ሄ ገሸይ፥ ጌሻ በሳነ ኡባፈ ጌሻ በሳፈ ሻኬስ። ናጋራ አቶተ ካማን ጫቆ ታቦትያ ካማ። ፃርጴዛ፥ ኡባፈ ጌሻ በሳፈ ካረራ፥ ጌሻ ዱንካንያፐ ፑደሀ ባጋን ዎ፤ ፆምፐ ዎያ ኮጫ ዱገሀ ባጋራ ዎ።
“ዱንካንያ ፐንገ ማጋራጁዋ፥ አልኦ ሊኖፐ ጊግሳዳ፥ ካሎሰ፥ ኦቻ ቴራ ዳነይሳንነ ዞኦ ቃጭናን ዳዳዳ አሌቅሳ። ማጋራጁዋስ እቻሹ ቱሳታ ሶቃላ ምፈ ኦዳ ዎርቃን ላንፃ፤ ኮጫትካ ዎርቃፈ ኦሰትዳይሳታ ግዶ። ቱሳታስ ናሰ ብራታፐ እቻሹ ቶሆታ ጊግሳ።”
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.