ዛረ 8

ጎዳ ዶጎፕተ

1ህንተ ደኦን ዳና መላ፥ ህንተ ታይቦይ ዳራና መላነ ጎዳይ ካሰ ህንተ ማይዛታስ እማና ግድ ጫቅዳ ቢታ ገልድ፥ ህንተ ላታና መላ ሀች ታ ህንተና ኪትያ ኪታ ኡባ ምንድ ናግተ። 2ጎዳይ፥ ነ ፆሳይ ነዉ እምዳ ኪታ ነ ናግያኮነ ናጎናኮ፥ ነ ዎዛና ቆፋ ኤራናዉ ነና ፓጫናዉነ ነና አዳ ኦናዉ ኦይታሙ ላይ ኩመ ነና መላ ቢታን ዋት ካለዳኮ አኬካ። 3አዳተ ኤርሳናዉ ነና ኮሻይስስ፤ ያትድ ነ ዎይኮ ነ ማይዛት ኤሮና ማና ነና ሙዝስ። ሄሳ እ ኦዳይ አስ ጎዳ ዶናፐ ከይያ ቃላ ኡባናፐ አትሽን፥ ካ ፃላላን ደኦናይሳ ነና ታማርሳናሳ። 4ሀ ኦይታሙ ላይታ ግዶን ነ ማእዳ ማኦይ ዉርቤና፤ ነ ቶሆይ ክፅቤና። 5አስ ባ ናአ ሴረይሳዳ ጎዳይ፥ ነ ፆሳይ ነና ሴሮይሳ አኬካ።

6እያዉ ያያሸነ እያ ቦንቻሸ ጎዳ ነ ፆሳ ኪታ ናጋ። 7ጎዳይ ነ ፆሳይ ነና ዛንጋራፐነ ደርያፐ ጎግያ ሻፋትነ ፑልቶት ደእያ ሎኦ ቢታ ገልሳናዉ ኤህስ። 8ሄ ቢታይ ግስተይነ ባንግ፥ ዎይነይነ ባላሰይ፥ ኦሮማነይ፥ ሻማሆ ዛይተይነ ኤስ ኩምዳ ቢታ። 9ሄ ቢታይ አይኮይካ ፓጮና ህንተ ካልድ ምያ ቢታ። ሄ ቢታይ ብራት ሹቻዳ ገላ ግድዳ ቢታ። ዙማፐ ማዳበ ብራታ ቦክድ ኤክያ ቢታ። 10ነ ማዳ ካልዳ ዎደ ነው እ እምዳ ሎኦ ቢታ ግሾ፥ ጎዳ ነ ፆሳ ጋላታ። 11ታ ሀች ነና ኪትያ እያ ኪታ፥ እያ ህግያነ እያ አዋጁዋ ናጎና እፃዳ፥ ጎዳ ነ ፆሳ ዶጎና መላ ናገታ። 12ነ ማዳ ካልያ ዎደ፥ ሎኦ ኬ ኬፃዳ እያን ደእያ ዎደ፥ 13ነ መሄይነ ዶርሳይ ዳርያ ዎደ፥ ነዉ ብርነ ዎርቅ ዳጋየትያ ዎደ፥ ነዉ ደእዳባይ ኡባይ ዳርያ ዎደ፥ 14ሄ ዎደ፥ ነ ዎዛናይ ኦቶርቶና መላ፥ ግብፀ አይለተ ኬፈ ነና ዎዝዳ ጎዳ፥ ነ ፆሳ ዶጎና መላ ናገታ። 15እ ነና ኢታ ሾሻይነ ኮርነይ ኩምዳ፥ ሃ ባይና፥ ግታነ ያሽያ መላ ቢታራ ነና ካለዳይሳ ዶጎፓ። እ ነዉ መላ ቢታን ዛላፈ ሃ ስስ። 16ነ ማይዛት ኤሮና ማና እ ነና መላ ቢታን ሙዝስ። ዉርሰን ነዉ ኡባባይ እንጀታና መላ ነና አዳ ኦናዉነ ፓጫናዉ ሄሳ ኦስ። 17ኔኒ፥ “ታ ዎልቃይነ ታ ኩሸ ምኖተይ ሀ ዱረተ ታዉ ኤህስ” ጎና መላ ናገታ። 18ሽን ነ ዱረታና መላ ነዉ ዎልቃ እምዳይ ጎዳ፥ ነ ፆሳ ግደይሳ አኬካ። እ ሄሳ ኦዳይ፥ ሀች ነ በኤይሳዳ፥ ነ ማይዛታራ ጫቅዳ ጫቁዋ ምንናሳ።

19ሽን ህንተ ጎዳ ህንተ ፆሳ አግድ፥ ሀራ ፆሳታ ካልኮ፥ ኤንታዉ ሆክኮነ ጎይንኮ፥ ህንተ ቱማ ያናይሳ ታ ሀች ማርካታይስ። 20ጎዳይ፥ ህንተ ፆሳይ ሀራ ካዎተታ ህንተ ስንፈ ይስዳይሳዳ ህንተ እያዉ ኪተቶና እፅኮ ህንተናካ ይሳና።