ጌሻ ማፃፋ
ዛረ 7
ጎዳይ፥ ነ ፆሳይ ነ ላታናዉ ብያ ቢታ ነና ገልስያ ዎደነ ኔፐ ዎልቃማነ ምንያ ላፑን ካዎተታ፥ ሄሳትካ ህተታ፥ ገርገሰታ፥ አሞረታ፥ ካናነታ፥ ፓርዘታ፥ ህወታነ ያቡሰታ ነ ስንፈ ጎድያ ዎደ፥ ጎዳይ ነ ፆሳይ ነ ኩሸን አድ እምን፥ ነ ኤንታ ፆንያ ዎደ፥ ኤንታ ኩመ ይሳ። ኤንታራ አይብባካ ጫቆፋ፤ ኤንታዉ ቃቶፋ። ኤንታራ ኤከቶፋ፤ ገለቶፋ። ነ ማጫ ናይታ ኤንታ አደ ናይታስ እሞፋ ዎይኮ ኤንታ ማጫ ናይታ ነ አደ ናይታስ ኤኮፋ። ኤንቲ ነ ናይታ ታና ካለይሳ አግድ ሀራ ኤቃታ ጎይናና መላ ኦና። ሄ ዎደ ጎዳ ሀንቆይ ነ ቦላ ኤፃና፤ ነና ኤለስድ ይሳና። ሄሳ ግሾ፥ ኤንታ ያርሾ በሳ ላልተ፤ ጎይንያ ሹቻ ኤቃታ መንረተ። አሼራ ጌተትያ ኤቃ ምስልያ ትንቸረተ፤ ኩሸን ኦሰትዳ ምስለታ ታማን ፁግተ። ኔኒ፥ ነ ጎዳ ፆሳስ ጌሻ ደረ። ጎዳይ፥ ነ ፆሳይ ነና ባዉ ዱማ አስ ኦድ ቢታ ቦላ ደእያ አሳ ኡባፈ ነና ዶርስ።
ጎዳይ ህንተና ዶስዳይነ ዶርዳይ ህንተ ሀራ አሳፐ ታይቦን ዳርዳ ግሾ ግደና። ህንተ ሀራ አሳ ኡባፈ ታይቦን ጉ። ሽን ጎዳይ ህንተና ዶስዳ ግሾነ ህንተ ማይዛታስ ጫቅዳ ጫቁዋ ናግዳ ግሾ፥ እ ህንተና አይለተ ቢታፈ፥ ግብፀ ካዋ ኩሸፐ፥ ባ ዎልቃማ ኩሽያን ከስስነ ዎዝስ። ሄሳ ግሾ፥ ጎዳይ፥ ህንተ ፆሳይ ፆሴ ግደይሳ ኤርተ። እ ባና ዶሰይሳታስነ ባ ኪታ ናገይሳታስ ሙኩሉ የለተ ጋካናዉ፥ ባ ሲቁዋ ናግያ አማነትያ ፆሲ። ሽን እ ባና እፀይሳታ ሴራናዉነ ይሳናዉ ጉየ ጌና። ሄሳ ግሾ፥ ታኒ ሀች ነዉ እምያ ኪታ፥ አዋጁዋነ ህግያ ናጋ።
ነ ሀ ኪታ ስአዳ ምን ናግኮ፥ ጎዳይ፥ ነ ፆሳይ ህንተ ማይዛታስ ጫቅዳይሳዳ ባ ሲቆ ጫቁዋ ነዉ ናጋና። እ ነና ዶሳና፤ ነና አንጃና፤ ነ ታይቡዋ ዳርሳና። ቃስ እ ነዉ እማናዉ ነ ማይዛታስ ጫቅዳ ቢታን ነ ኡሎ አይፍያ፥ ቢታ አይፍያ፤ ካ፥ ዎይንያ፥ ዛይትያ፥ መሄ ማራታነ ዶርሳ ማራታ ዳርስድ ነና አንጃና። ነ ሀራ አሳፐ አዳ አንጀትዳይሳ ግዳና። አደይ ዎይኮ ማጭ ዎይኮ ነ መሄይ ማይነና። ጎዳይ ሀርገ ኡባፈ ነና ናጋና። ነኒ ግብፀ ቢታን ኤርያ ኢታ ሀርግያ ነ ቦላ ኤሄና፥ ሽን እ ነና እፅያ ኡባ ቦላ ሄ ሀርግያ ኤሀና። ጎዳይ፥ ነ ፆሳይ ነዉ አድ እምያ አሳ ኡባ ቃቶና ይሳ። ሄስ ነዉ ፅሄ ግዳና ግሾ፥ ኤንታ ፆሳታ ጎይኖፋ።
ኔኒ፥ ነ ዎዛናን፥ “ሀ ካዎተት ታፐ ምኖሶና፤ ያትን፥ ታ ኤንታ ዋታዳ ጎዳዳ ከሳኔ?” ጋናዉ ዳንዳኣሳ። ሽን ኤንታዉ ያዮፋ። ጎዳይ፥ ነ ፆሳይ፥ ግብፀ ካዋ ቦላነ ግብፀ ቢታ ኡባ ቦላ ኦዳይሳ አኬካ። ጎዳይ፥ ነ ፆሳይ ነና ግብፀፈ ከስያ ዎደ ኦዳ ግታ ጋዶታ፥ ማላታታ፥ ማላልስያባታ፥ እያ ዎልቃማ ኩሽያነ እያ ምጨትዳ ቀስያ ነ፥ ነ አይፈን በአዳሳ። ሀች ነ ያይያ አሳ ኡባ ቦላ ጎዳይ፥ ነ ፆሳይ ሄሳዳ ኦና። ቃስ ኔፐ ባቃትድ ቆሰትዳይሳት ያና ጋካናዉ ጎዳይ፥ ነ ፆሳይ ኤንታ ግዶን ካዠ የዳና። ሄሳ ግሾ፥ ነ ኤንታዉ ያዮፋ፤ ኔራ ደእያ ጎዳይ፥ ነ ፆሳይ፥ ግታነ ያሽያ ፆሲ። ጎዳይ፥ ነ ፆሳይ ሄ ካዎተታ ጉራ ጉራ ጎድድ፥ ነ ስንፈ ይሳና። ነ ኤንታ ኡባ እስ ቶሆ ይሳካ፤ ሄሳ ነ ኦኮ፥ ቢታን ደእያ ዶአት ዳርድ ነና ዋይሳና። ሽን ጎዳይ፥ ነ ፆሳይ ኤንታ ነ ኩሸን አድ እማና፤ ኤንቲ ያና ጋካናዉ እ ኤንታ ዳጋንና። ኤንታ ካዎታ ነ ኩሸን አድ እማና። ነ ኤንታ ሱን ሳሎፐ ጋርሳን ቁቻዳ ይሳና። ኦንካ ኔራ ኤቀትድ ዳንዳኤና፤ ነ ኤንታ ይሳና።
ኩሸን ኦሰትዳ ኤንታ ኤቃ ምስለታ ታማን ፁጋ። ሄ ምስለታ ቦላ ደእያ ብራ ዎይኮ ዎርቃ አሞቶፍተ፤ ነባ ኦዳ ኤኮፋ። ሄስ ጎዳስ፥ ነ ፆሳስ ቱና ግድያ ግሾ፥ እያፐ ነ ኤክኮ ነዉ ፅሄ ግዳና። ኤንቲ ባንታ ሁጰን ቃንገትዳይሳታ ግድያ ግሾ፥ ነ ሄ ቱና ኤቃታ ነ ሶ ገልሳዳ፥ ኤንታ መላ ባደትዳይሳታ ግዶፓ። ኤንታ ኩመ እፃ፤ ሻተታ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.