ዛረ 6

ግታ ኪታ

1ህንተ ላታናዉ ብያ ቢታን ህንተ ኦና መላ ታ ህንተና ታማርሳና መላ ጎዳይ፥ ህንተ ፆሳይ ታና ኪትዳ ኪታይ፥ አዋጆይነ ህገይ ሀይሳ። 2ነ ላይይ አዱቃና መላ ነ፥ ነ ናይትነ ነ ናይታ ናይት ጎዳ ነ ፆሳ ያይተ፤ ታ ሀች ነዉ እምያ ጎዳ አዋጅያነ ህግያ ነ ላይ ኡባን ናጋ። 3ነኖ፥ እስራኤለ ስአ፤ ኡባባይ ነዉ እንጀታና መላነ ጎዳይ ነ አዋታ ፆሳይ፥ ነዉ ግዳይሳዳ ማነ ኤስ ጎግያ ቢታን ነ ዳራና መላ ሀ ህገታ ስአ፤ ምንዳ ናጋ።

4ነኖ፥ እስራኤለ ስአ፤ ጎዳይ ኑ ፆሳይ እስ ፆሲ። 5ነ ጎዳ፥ ነ ፆሳ ነ ኩመ ዎዛናፐ፥ ነ ኩመ ሸምፑዋፈነ ነ ኩመ ዎልቃፈ ዶሳ። 6ሀች ታ ነና ኪትያ ሀ ኪታ ነ ዎዛናን ዎ። 7ኤንታ ኔኒ ነ ናይታ ታማርሳ፤ ኔኒ ነ ሶን ኡትያ ዎደ፥ ኦገ ሄመትያ ዎደ፥ ዝንእያ ዎደነ ደንድያ ዎደ ኤንታባ ሃሳያ። 8ማላ ኦዳ ነ ኩሸን ኤንታ ቃቻ፤ ቃስ ነ ሶምኦን ማላዳ ዎ። 9ነ ፐንገ ዝዝገታ ቦላነ ነ ድርሳ ፐንግያ ቦላ ኤንታ ፃፋ።

10ጎዳይ፥ ነ ፆሳይ ነዉ እማና ግድ ነ አዋታስ አብራሃመስ፥ ይሳቃስነ ያይቆባስ ጫቅዳ፥ ነ ኬፃቦና ግታነ ሎኦ ካታማት ኩምዳ ቢታ ነዉ እማና። 11ኔኒ ሺሻቦና ዱረተን ኩምዳ ኬታ፥ ነ ቦካቦና ሃ ኦላታ፥ ነ ቶካቦና ዎይነነ ሻማሆ ነዉ እምያ ዎደ፥ ኔኒ ማዳ ካልዳ ዎደ፥ 12ነና ግብፀ አይለተ ቢታፈ ከስዳ፥ ጎዳ ዶጎና መላ ናገታ። 13ጎዳ፥ ነ ፆሳ ያያ፤ እያ ፃላላ ጎይና፤ እያ ሱንን ጫቃ። 14ነ ዩሾን ደእያ አሳይ ጎይንያ ሀራ ፆሳታ ጎይኖፋ። 15ነ ግዶን ደእያ ጎዳይ፥ ነ ፆሳይ ቃናትያ ፆሱ። እያ ሀንቆይ ነ ቦላ ኤፃና፤ እ ነና ቢታ ቦላፈ ፕትድ ይሳና። 16ማሳሀን ህንተ እያ ፓጭዳይሳዳ ጎዳ ህንተ ፆሳ ፓጮፕተ። 17ጎዳይ፥ ህንተ ፆሳይ ህንተና ኪትዳ እያ ኪታ፥ እያ ዎጋነ እያ አዋጁዋ ምንድ ናግተ። 18ነዉ ኡባባይ እንጀታና መላ ጎዳ ስንን ነ ሱረባነ ሎኦባ ኦ። ሄሳ ኦኮ፥ ነዉ እማናዉ ጎዳይ ነ አዋታስ ጫቅዳ፥ ሄ ሎኦ ቢታ ነ ላታና። 19ጎዳይ ግዳይሳዳ ኔኒ፥ ነ ሞርከታ ኡባ ነ ስንፈ ጎዳና።

20ዎደፐ ነ ናይት፥ “ጎዳይ፥ ኑ ፆሳይ ህንተና ኪትዳ ሀ ዎጋ፥ አዋጅያነ ህግያ ብርሸይ አይቤ?” ያግድ ህንተና ኦይችያ ዎደ፥ 21ነ ኤንታዉ ሀይሳዳ ያጋዳ ዛራና፤ “ኑኒ ግብፀ ቢታን ግብፀ ካዋ አይለታ፥ ሽን ጎዳይ ባ ምኖ ኩሽያን ኑና ግብፀፈ ከስስ። 22ጎዳይ ኑ ፄልሽን፥ ግብፀ ቢታ ቦላ፥ ግብፀ ካዋ ቦላነ እያ ሹማታ ኡባ ቦላ ግታነ ያሽያ ማላታታነ ማላልስያባታ ኦስ። 23ሽን እ ኑ ማይዛስ እማና ግድ ጫቅዳ ቢታ ኑስ እማናዉ ኑና ግብፀፈ ከስስ። 24ያትድ ሀች ህንተ በኤይሳዳ ኑስ ኡባ ዎደ ሎኦ ግዳና መላነ ኑኒ ደኦን ዳና መላ፥ ጎዳይ፥ ሀ አዋጆታ ኡባ ኑን ናጋና መላነ ጎዳስ ኑ ፆሳስ ያያና መላ ኪትስ። 25እ ኑና ኪትዳይሳዳ፥ ጎዳ፥ ኑ ፆሳ ስንን ሀ ኪታ ኡባ ምንድ ናግኮ፥ ሄስ ኑስ ፅሎተ ግዳና” ያግተ።