ጌሻ ማፃፋ
ዛረ 28
ኪተተ ኤህያ አንጆ
(ሌወ 26:3-13፤ ዛረ 7:12-24)
ኔኒ ጎዳ ነ ፆሳስ ፖሎ ኪተትኮ፥ ሀች ታ ነዉ እምያ ኪታ ኡባ ምንዳ ናግኮ፥ ጎዳይ፥ ነ ፆሳይ ቢታን ደእያ ካዎተታ ኡባፈ አድ ነና ቁ ቁ ኦና። ኔኒ ጎዳ፥ ነ ፆሳስ ኪተትኮ፥ ሀይሳፈ ካልድ ደእያ አንጆ ኡባይ ነባ ግዳና።
ነ ካታማንነ ነ ጎሻን አንጀትዳይሳ ግዳና።
ነ ኡሎ አይፈይ፥ ነ ካይ፥ ነ መሄይ፥ ነ ዶርሳትነ ነ ዴሻት አንጀትዳይሳታ ግዳና።
ነ ኬሸይነ ነ ሙናቃ ሚሸይ አንጀትዳይሳ ግዳና።
ነ ከሳይነ ነ ገሎይ አንጀትዳይሳ ግዳና።
ነ ቦላ ደንድያ ነ ሞርከታ፥ ጎዳይ ነ ስንን ፆነትዳይሳታ ኦና። ኤንቲ ነ ቦላ እስ ኦገራ ያና፥ ሽን ላፑን ኦገራ ነ ስንፈ ባቃታና።
ጎዳይ ነ ኩሸይ ኦይክያባነ ነ ሻልያ አንጃና፤ ጎዳይ፥ ነ ፆሳይ ነዉ እምያ ቢታን ነና አንጃና።
ኔኒ ጎዳ፥ ነ ፆሳ ኪታ ናግኮነ እያ ኦግያን ቢኮ፥ እ ነዉ ጫቅዳይሳዳ ጎዳይ ነና ባዉ ጌሻ ደረ ኦድ ኤሳና። ሄሳፈ ጉየ፥ ቢታን ደእያ አሳ ኡባይ ጎዳይ ባ ሱንን ነና ፄግዳይሳ በእድ ያያና። ጎዳይ ነዉ እማናዉ ነ ማይዛታስ ጫቅዳ ሄ ቢታን፥ ነ ኡሎ አይፍያ፥ ነ መህያ፥ ነ ጎሻ አይፍያ ዳርስድ አንጃና። ነ ኩሸ ኦሶ ኡባ አንጃናዉነ፥ ጎዳይ ነ ቢታስ እራ ዎደን ዎደን ቡክሳናዉ ባ ምንጃ ኬ፥ ሳሎ ፐንግያ ነዉ ዶያና። ኔኒ ዳሮ ካዎተታስ ገደ ታልአናፐ አትሽን፥ ኦደፈካ ሃ ታልአካ። ጎዳይ ነና ኡባስ ካጨ ከሳናፐ አትሽን፥ ጎይና ከሰና። ሀች ታ ነዉ እምያ፥ ጎዳ፥ ነ ፆሳ ኪታ ስአዳ፥ ምንዳ ናግኮ፥ ነ ቦላ ግዳናፐ አትሽን፥ ጋርሰ ግዳካ። ታ ነዉ ሀች እምዳ ኪታፐ ሀድርስ ዎይኮ ኡሻች ጋዳ፥ ሀራ ፆሳታ ካሎፋ፤ ኤንታ ጎይኖፋ።
ኪተቶና እፆይ ኤህያ ባደ
(ሌወ 26:14-46)
ሽን ኔኒ ጎዳ፥ ነ ፆሳስ ኪተቶና እፃዳ፥ ሀች ታ ነና ኪትያ ዎጋነ ህግያ ኡባ ናጎና እፅኮ፥ ሀይሳፈ ካልድ ደእያ ባደት ኡባይ ነ ቦላ ያናነ ነና ደማና።
ነ ካታማንነ ነ ጎሻን ባደትዳይሳ ግዳና።
ነ ኬሸይነ ሙናቃ ሚሸይ ባደትዳይሳ ግዳና።
ነ ኡሎ አይፈይ፥ ነ ካ አይፈይ፥ ነ መሄይ፥ ነ ዶርሳይነ ዴሻይ ባደትዳይሳ ግዳና።
ነ ከሳይነ ነ ገሎይ ባደትዳይሳ ግዳና።
ኔኒ ኢታ ኦሶ ኦዳ ታና አግዳ ግሾ፥ ኔኒ ኤሶን ያና ጋካናዉ ነ ኦያ ኦሶ ኡባን ጎዳይ ባደ፥ ዳጋማነ ካዉሻተ የዳና። ኔኒ ላታናዉ ብያ ቢታፈ ያና ጋካናዉ ጎዳይ፥ ጋዶይ ኔፐ ዱፆና መላ ኦና። ጎዳይ ነና ግልቃተን፥ ምሻን፥ ማዱንን፥ ፁግያ አዋን፥ ኮሻን፥ ዎልኦንነ ካ ይስያ ሀርመን ነ ያና ጋካናዉ ሾጫና። ኔፐ ቦላራ ደእያ ሳሎይ ናሰ ብራታ ግዳና፤ ኔፐ ጋርሳራ ደእያ ቢታይ ብራታ ግዳና። ጎዳይ ነ ቢታን ቡክያ እራ ብዶነ ባና ከሳና፤ ኔኒ ያና ጋካናዉ ሳሎፐ ባን ቡካና።
ጎዳይ ነና ነ ሞርከታን ፆንሳና። ነኒ ኤንታ ኦላናዉ እስ ኦገራ ከያና፤ ሽን ላፑን ኦገራ ነ ኤንታ ስንፈ ባቃታና። ቢታን ደእያ ካዎተ ኡባይ ነ ቦላ ጋክዳባ በእድ፥ ያሻን ኮኮራና። ነ አሀይ ሳሎ ካፎታስነ ባዞ ዶአታስ ካ ግዳና፤ ኤንታ የደያ ኦንካ ዴና።
ጎዳይ ነና ፓፆይ ባይና ግብፀ ጋዶን፥ ክፃን፥ ማዱንንነ ፑሶ ሄርገን ሾጫና። ጎዳይ ነና ጎሻተን፥ ቆቀተንነ ዳጋማን ሾጫና። ሴታ ጋላስ ኔኒ ቆቀይ ታታፈይሳዳ ታታፋና፤ ነ ኦያባ ኡባይ ነዉ ጊጎና እፃና። ነ ደኦ ላይ ኡባን ነ ኡንኤታናነ ቦንቀታዳ ዳና። ነና ማድያ አስ ደማካ።
ነ ማቾ ኦይቻ ጊግሳና፥ ሽን እዮ ሀር ዳፍ ኤክድ ኢሳና። ኔኒ ኬ ኬፃና፥ ሽን እያን ደአካ። ዎይነ ቶካና፥ ሽን እያ አይፍያ ማካ። ነ ቦራይ ነ ስንን ሹከታና፥ ሽን እያ አሹዋ ማካ። ነ ሀረይ ኔፐ ዎልቃን ኤከታና፥ ሽን ነዉ ጉየ ስመና። ነ ዶርሳት ነ ሞርከታስ እመታና፥ ኤንታ አሻናዉ ነና ማድያ አስ ዴና። ነ አይፈይ በእሽን ነ አደ ናይትነ ማጫ ናይት ሀራ ካዎተስ እመታና። ኤንቲ ስምን በአና ጋዳ ፄልሽን፥ ነ አይፈይ ቶሉ ግድ አታና፤ ሄሳ ድጋናዉ ነዉ ዎልቅ ዴና። ነ ቢታ አይፍያነ ነ ጫዋ ኡባ ነ ኤሮና አስ ማና፤ ነ ደኦ ላይ ኡባን ኡንኤትዳይሳነ ናቀትዳይሳ ግዳና። ነ በእያ ኢታት ነና ጎሻና። ጎዳይ ፓፆይ ባይና ኢታ ማዱንን ነ ጉልባታነ ነ ዎድርያ ሀርግሳና፤ ቶሆፐ ሁጰ ጋካናዉ፥ ነና ሄ ማዱንን ሾጫና።
ጎዳይ ነናነ ነ ካዋ፥ ነናነ ነ ማይዛታ ኤሮና አሳ ቢታ ኤፋና። ሄሳን ኔኒ ምፈነ ሹቻፈ ኦሰትዳ ሀራ ፆሳታ ጎይናና። ጎዳይ ነና ላልያ ሀራ ካዎተታ ግዶን ኔኒ ሚቻስነ ካሳስ አታና።
ኔኒ ዳሮ ካ ነ ጎሻን ዘራና፤ ሽን ቦለይ ምድግን፥ ጉ ካ ሺሻና። ዎይነ ቶካዳ እያ ሀርማና፥ ሽን ጉፁነይ እያ ምድግን፥ እያፐ አይፈ ደማካ ዎይኮ እያፐ ኡያካ። ነ ቢታ ኡባን ሻማሆይ ዶላና፥ ሽን አይፈይ ቆቆፈትድ ዉርያ ግሾ፥ ሻማሆ ዛይተ ደማካ። ነ አደነ ማጫ የላና፥ ሽን ኦል ድእድ ኤፍያ ግሾ ኤንቲ ኔራ ዶኮና። ነ ምነ ነ ቢታ አይፍያ ቦለይ ዉርሳና።
ነ ግዶን ደእያ በተ አሳይ ነ ቦላ ቁ ቁ ጋና፥ ሽን ነ ጉየ አታዳ ዝቅ ዝቅ ጋና። እ ነዉ ታልአናፐ አትሽን፥ ነ እያዉ ታልአካ፤ እ ሁጰ ግዳና፤ ኔኒ ጎይና ግዳና።
ጎዳ፥ ነ ፆሳ፥ ነ ኪተቶና እፅዳ ግሾነ እያ ዎጋነ ህግያ ናጎና እፅዳ ግሾ፥ ነ ያና ጋካናዉ ሀ ባደት ኡባይ ነ ቦላ ዎና፤ ነና ኤንቲ የደና። ሀ ባደት ነ ቦላነ ነ ኮቻ ቦላ መርናዉ ማላታነ ማላልስያባ ግዳና። ነዉ ሳእ እንጀትዳ ዎደ ጎዳ፥ ነ ፆሳ ኡፋይሳንነ ጋላታን ጎይኖና ግሾ፥ ነና ኮሻን፥ ሳሞን፥ ካሎተንነ መቶን ኡባባ ያዳ፥ ጎዳይ ነ ቦላ የድያ ነ ሞርከታስ ሃረታና። ጎዳይ ነና ይሳና ጋካናዉ ነ ሞርገን ብራታ ቃምባራ ዎና።
ጎዳይ ነ ኤንታ ቃላ ኤሮና ካዎተታ፥ ቢታ ጋፃፐ አንኮይ ፕራድ ዎይሳዳ ነ ቦላ ኤሀና። ኤንቲ ዎዛና ምኖታ፤ ጭማ ቦንቾናይሳታ፤ ናይታስ ቃቶናይሳታ። ነ ያና ጋካናዉ ኤንቲ ነ መህያነ ጎሻ አይፍያ ማና። ኔኒ ያና ጋካናዉ ነ ካ፥ ነ ዎይንያ፥ ነ ዛይትያ፥ ነ ሚዛነ ነ ዶርሳ ዉድያ ማሮኮና። ጎዳይ፥ ነ ፆሳይ ነዉ እምያ ቢታን ደእያ ነ አማነትያ አዱሰነ ምኖ ድርሳት ላለታና ጋካናዉ ነ ካታማ ዩሹዋ ተቅድ ነና ኡንኤና።
ነ ሞርከት ካታማ ተቅድ ነና ኡንኤያ ዎደ ምያባ ያዳ፥ ጎዳይ ነ ፆሳይ ነዉ እምዳ ነ ኡሎ አይፈ ግድዳ ነ አደ ናይታነ ነ ማጫ ናይታ ማና። ነ ግዶን ሀር አቶሽን ካሰ እንጀን ደእዳ አስካ ባ እሻስ፥ ባ ዶስያ ማቸስነ ባ የልዳ ናይታስ ባ ካፈ ሻከና። ሞርከት ካታማ ተቅድ ኡንኤያ ዎደ ማናባይ ሀር ባይና ግሾ፥ ምያ ባ ናይታ አሹዋፐ ሀራ ኦደስካ እመና። ነ ግዶን ካሰ እንጀን ደእዳ፥ ባ እንጅያፈ ደንዶይሳን ሳአ የናዉ ሻተትያ ማጫስያ፥ ባ ዶስያ አዝናስነ ባ የልዳ ናይታስ ኡዘታና። ሞርከት እያ ደእያ ካታማ ተቅድ እዮ ኡንኤዳ ግሾነ ዋይስዳ ግሾ፥ እዉ ሀር ምያባይ ይን፥ ባ የልዳ ናኣነ ዶኣ ኤንታ ጋና ጌማን ባርካ ማና።
ሀ ማፃፋን ፃፈትዳ ህገታ ነ ናጎና እፅኮ፥ ማላልስያነ ያሽያ ጎዳ፥ ነ ፆሳ ሱን ቦንቾና እፅኮ፥ ነ ቦላነ ነ ኮቻ ቦላ ጎዳይ፥ ያሽያ ጋዶ፥ ዳሮ ዎደ ጋምእያ፥ ፓፆይ ባይና ኢታ ሀርገ የዳና።
ካሰ ግብፀ አሳ ቦላ በአዳ፥ ነ ያይዳ ግብፀ ሀርገ ኡባ ዛሪድ ነ ቦላ ኤሀና፤ ሄ ሀርገይ ነና የደና። ጉጅድካ፥ ሀ ህገ ማፃፋን ፃፈትቦና ሀርገታነ ጋዶታ ኡባ ነ ያና ጋካናዉ ጎዳይ ነ ቦላ ኤሀና። ጎዳ፥ ህንተ ፆሳ ህንተ ስኦና እፅዳ ግሾ፥ ሳሎ ፆልንቶዳ ዳርዳ ህንተፈ ጉ አታና። ጎዳይ፥ ህንተዉ ሎኦባ ኦያ ዎደነ ህንተ ታይቦይ ዳርያ ዎደ ኡፋይትዳይሳዳ ሀእ ህንተ ቦላ ጋዶ ኤህያ ዎደነ ህንተና ይስያ ዎደ ኡፋይታና፤ ህንተ ላታናዉ ብያ ቢታፈ ሾደትድ ያና።
ጎዳይ ነና ሀ ጋፃፐ ያ ጋፃ ጋካናዉ ካዎተታ ኡባ ግዶን ላላና። ያን ነኒ ዎይኮ ነ ማይዛት ኤሮና ሀራ ምነ ሹቻ ፆሳታ ጎይናና። ሄ ካዎተታ ግዶን ህንተ ሸምፖ ደመከታ፤ ቶሆይ የያ በስካ ነዉ ዴና። ያን ጎዳይ ነዉ ቆፋን ኩምዳ ጉገ፥ አሞን አርጋጭዳ አይፈነ ኡፋይስ ቃንፅዳ ዎዛና እማና። ነ ደኦይ ህርጋን ኩማና፤ ጋላስነ ቃማ ዳጋማንነ ሀይቆ ያሻን ኡንኤታዳ ዳና። ነ ዎዛናን ኩምዳ ያሻፈነ ነ አይፈይ በእያ ፓላባፐ ደንዶይሳን፥ ዎንትያ ዎደ ነኒ፥ “አዉደ ቃማንዴሻ” ቃስ ቃምያ ዎደ፥ “አዉደ ዎንታንደሻ” ያጋና። ታ ነና፥ “ዛራዳ ሀ ኦግያራ ባካ” ግዳ ኦግያራ ጎዳይ ነና ዛሪድ ማርካበን ጉየ ግብፀ የዳና። ያን ነኒ አይለ ግዳናዉ ነ ሞርከታስ ነና ባይዛናዉ ኮያና፥ ሽን ህንተና አይለያናዉ ሻምያ አስ ደመከታ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.