ዛረ 20

ኦላባ

1ነኒ ሞርከታራ ኦለታናዉ ብያ ዎደ፥ ኤንታ ፓራት፥ ፓራ ጋረትነ ኤንታ ኦላንቾት ኔፐ ዳርን በአዳ፥ ኤንታዉ ያዮፋ፤ ነና ግብፀፈ ከስዳ ጎዳይ፥ ነ ፆሳይ ኔራ ደኤስ። 2ህንተ ኦላ ዶማናፐ ኮይሮ፥ ካህነይ ኦላንቾታ ስን አድ ሀይሳዳ ያጎ፤ 3“እስራኤለ አሳዉ፥ ስእተ፤ ሀች ህንተ፥ ህንተ ሞርከታራ ኦለታናዉ ሀኔታ። ህዛ ህንተ ዎዛናይ ዳጋሞፎ፤ ያዮፍተ፤ ኤንታ ስንን ኮኮሮፕተ፤ ህርጎፍተ። 4ጎዳይ፥ ህንተ ፆሳይ ህንተራ ብያ ግሾ፥ ህንተ ሞርከታ ኦልድ፥ ህንተዉ ፆኖ እማና” ያጎ።

5ቶራ ሞጮናት ኦላንቾታኮ፥ “ኦራ ኬ ኬፅድ ገልቦና አስ ደእኮ፥ እ ኦላን ሀይቅን፥ ሀራ አስ እያ ኬን ገሎና መላ እ ሶ ስሞ። 6ዎይኮ ዎይነ ቶክድ፥ አይፈ ሞና አስ ደእኮ፥ እ ኦላን ሀይቅን፥ ሀራ አስ እያ ዎይነ አይፍያ ሞና መላ እ ሶ ስሞ። 7ማቾ ኦይችድ ኤክቦና አስ ደእኮ፥ እ ኦላን ሀይቅን፥ ሀራ አስ እያ ማችዉ ኤኮና መላ እ ሶ ስሞ” ያጎ። 8ቶራ ሞጮናት ጉጅድ ሀይሳዳ ያጎ፤ “ሀ አሳ ግዶን ያያነ ህርግያ ኦንካ ደእኮ፥ እ ባ ላገታ ዎዛና ያሻን ትልእሳናፐ ሶ ስሞ” ያጎ። 9ቶራ ሞጮናት ሄሳ አሳስ ኦድ ዉርስያ ዎደ ጩጋስ ጩጋስ ቶራ ሞጮናታ ዶሮ።

10እስ ካታማ ኦላናዉ ባዳ ነ እያኮ ማትያ ዎደ፥ ኮይሮትድ ሳሮራ ኤንቲ ኩሸ እማና መላ ኦይቻ። 11ኤንቲ ሳሮራ ባንታ ኩሽያ እምድ፥ ባንታ ግምበ ፐንግያ ዶይድ ነና ገልስኮ፥ ሄ ካታማን ደእያ አሳ ኡባይ ነዉ ዴፆ ኦሶ ኦድ ሀጋዞ። 12ሄ ካታማ አሳይ ነዉ ሳሮራ ኩሸ እሞና እፅድ፥ ኦላስ ጊገትኮ፥ ነ ሄ ካታማ ዩሹዋ ተቃ። 13ጎዳይ፥ ነ ፆሳይ ኤንታ ነዉ አድ እምያ ዎደ ሄ ካታማን ደእያ አደ ኡባ ማሻን ዉርሳ። 14ግዶሽን፥ ማጫሳ፥ ናይታ፥ መህያነ ካታማን ደእያ ኡባባ ነዉ ድአ። ጎዳይ፥ ነ ፆሳይ ነዉ እምያ ነ ሞርከታ ሻሉዋ ጎኤታ። 15ነ ደእያ በሳፈ ሃክድ ደእያ ካታማታ ነ ኦይክያ ዎደ ሄሳዳ ኦ።

16ሽን ጎዳይ፥ ነ ፆሳይ ነዉ ላታ ኦድ እምያ ቢታን ሸምፖራ ደእያባ እሱዋካ አሾና ዎ። 17ጎዳይ፥ ነ ፆሳይ ኪትዳይሳዳ ህተታ፥ አሞረታ፥ ካናነታ፥ ፓርዘታ፥ ህወታነ ያቡሰታ ዉርሳዳ ዎ። 18ሄስ ሀኖና እፅኮ፥ ኤንቲ ባንታ ፆሳታ ጎይንሸ ኦያ እፀትዳ ኦሶታ ህንተ ኦና መላ ህንተና ታማርስድ፥ ጎዳ ህንተ ፆሳ ቦላ ህንተ ናጋራ ኦና መላ ደንና።

19እስ ካታማ ኦይካናዉ ዩሹዋ ነ ተቃዳ፥ ዳሮ ጋላስ ኦለታሸ ጋምእያ ዎደ፥ እያን ደእያ አይፈ እምያ ም አይፍያ ማፐ አትሽን፥ ቃንፆፋ። ነ ዩሹዋ ተቅድ ኦለይ አሰፐ አትሽን፥ ደንባን ደእያ ም ግደና። 20ግዶሽን፥ ነ አይፈ እሞና ሀራ ምታ ቃንፃዳ፥ ኔራ ኦለትያ ካታማይ ኩንዳና ጋካናዉ ያን ሚፃ ኬፃ።