ጌሻ ማፃፋ
2 ሳሜላ 12
ናታን ዳዊታ ሀንቀትስ
ጎዳይ ናብያ ናታና ዳዊታኮ ኪትን፥ ናታን እያኮ ይድ፥ “እስ ካታማን ናምኡ አሳት ደኦሶና፤ ኤንታፈ እሶይ ዱረ፤ ቃስ ሀንኮይ ማንቆ። ዱረ አድያስ ዳሮ ዶርስነ መሄይ ደኤስ። ሽን ማንቆ አድያስ ሻምድ ሄምያ እስ ዶርሳ ማሬፐ አትሽን፥ ሀር ባዋ። ሄ ዶርስያ እያ ሶን እያ ናይታራ እስፈ ድጫሱ። እ ባ ምያ ካፈ ሙዜስ፤ ባ ኡያ ኡሻፈ ኡሼስ፤ እያ እያ ክኦነ ዝንአዉሱ። ሄ ዶርስያ እያዉ ማጫ ናአ መላ።
“እስ ጋላስ እስ እማ ዱርያ ሶ ይስ። ዱረይ ባ ዶርሳፈ ዎይኮ ባ መሄፐ ሹክድ፥ እማ ሞካናዉ ኮይቤና። ሽን እ ሄ ማንቆ አድያ ዶርስዉ ኤክድ፥ ሄ እማስ ምያባ ጊግስስ” ያግስ።
ዳዊቲ ሄ ዱረ አድያ ቦላ ሸነ ኤፅድ፥ “ደኦ ጎዳይ ኤርያ መላ፥ ሀይሳ ኦዳ አደይ ሀይቃናዉ በሴስ። ቃስ ቃይ ባይና እ ሄሳ ኦዳ ግሾ፥ ሄ ዶርሳ ማረ ግሾ ኦይዱ ኩሸ ዛራናዉ ኮሼስ” ያግስ።
ናታን ዳዊታኮ፥ “ሄ አደይ ነና! ጎዳይ እስራኤለ ፆሳይ ሀይሳዳ ያጌስ፤ ‘ታኒ ነና እስራኤለ ቦላ ትያዳ ካዎስ፤ ሳኦላ ኩሽያፐ ነና አሻስ። ታኒ ነ ጎዳ፥ ሳኦላ ኬ ነዉ እማስ፤ ነ ጎዳ ማቸታ ነ ክኦን የጋስ። እስራኤለ አሳነ ይሁዳ አሳ ታኒ ነዉ እማስ። ሀ ኡባይ ጉፅስ ጊኮ፥ ታኒ ነዉ ሀራ ጉጃ እማናሽን። ሀይሳ መላ ኢታባ ጎዳ ስንን ኦዳ፥ አይስ ጎዳ ቃላ ካዲ? ህተ አድያ ኦርዮና ማሻን ዎዳሳ፤ እያ ማችዉ ነው ኤካዳሳ። አሞነ አሳታ ማሻን እያ ዎዳሳ። ኔኒ ታና ካዳ፥ ህተ አድያ ኦርዮና ማችዉ ኤክዳ ግሾ ነ ሶ አሳፐ ማሽ ሻከተና’ ” ያጌስ።
ጎዳይ ሀይሳዳ ያጌስ፤ “ታኒ ነ ሶ አሳ ግዶፈ ነ ቦላ ኢታ ኤሀና፤ ነ ማቸታ ኔኒ ፄልሽን ደንዳ፥ ነዉ ማትያ አድያስ እማና፤ ሴታ ጋላስ ሄ አደይ ነ ማቸታራ ዝንአና። ኔኒ ሄሳ ጌማን ኦዳሳ፤ ሽን ታኒ ሴታ ጋላስ እስራኤለ አሳ ኡባ ስንን ኦና” ያግስ።
ያትን፥ ዳዊቲ፥ “ታኒ ጎዳ ቦላ ናጋራ ኦስ” ያግስ።
ናታን፥ “ጎዳይ ነ ናጋራ አቶ ግስ፤ ኔኒ ሀይቃካ። ሽን ነ ሀይሳ ኦዳ፥ ጎዳ ሞርከት እያ ካና መላ ኦዳ ግሾ የለትዳ ናአይ ቱማ ሀይቃና” ያግስ።
ናታን ባ ሶ ብዳፐ ጉየ፥ ኦርዮና ማችያ ዳዊታስ የልዳ ናኣ ጎዳይ ሾጭን እ ሀርግስ። ዳዊቲ ባ ናኣ ግሾ ፆሳ ዎስስ፤ ዳዊቲ ፆምስ፤ ባ ክፍልያ ገልድ ቃማ ቃማ ሳአን ዝንእ አቄስ። እያ ሶ ጭማት እያ ሳአፐ ደንዳና መላ እያ ማታን ኤቅድ ዎስዶሶና፤ ሽን እ ደንዶና እፅስ፤ እ ኤንታራ ካ ምቤና።
ላፑን ጋላስ ናአይ ሀይቅስ። ዳዊታ አይለት ናኣ ሀይቁዋ ኦዳናዉ ያይድ፥ “ናአይ ፓፃ ደእሽን ኑኒ ዳዊታስ ኦድን፥ ስኦና እፅስ። ያትን፥ ናአይ ሀይቅዳይሳ ኑኒ ዋትድ እያዉ ኦዳኔ? ኦን ኤር፥ እ ባና ቆሀነኮሺ?” ያግዶሶና።
ባ አይለት እሶይ እሱዋራ ካልካሸይሳ ዳዊቲ ስእዳ ዎደ ናአይ ሀይቅዳይሳ ኤርስ። ዳዊቲ፥ “ናአይ ሀይቅዴ?” ያግድ ኦይችስ።
ኤንቲ፥ “ኤ ሀይቅስ” ያግዶሶና።
ያትን፥ ዳዊቲ ሳአፐ ደንድድ ሜጨትስ፤ ቅባተ ትየትስ፤ ባ ማኡዋ ላምድ፥ ጎዳ ኬ ገልድ ጎይንስ። ሄሳፈ ጉየ ባ ሶ ብድ፥ ካ ኦይችን፥ ኤንቲ እያ ስን አን ምስ።
እያ አይለት፥ “ኔኒ ሀይሳዳ አይስ ሀናዲ? ናአይ ፓፃ ደእሽን ፆማዳሳነ ዬካዳሳ፤ ሽን ናአይ ሀይቅን ደንዳዳ፥ ካ ማዳሳ” ያግዶሶና።
ዳዊቲ፥ “ናአይ ፓፃ ደእሽን ታኒ ፆማስነ ዬካስ፤ ጎዳይ ታና ማርን፥ ናአይ ፓፃነኮነ” ጋዳ ቆፓስ። ሽን፥ “ናአይ ሀይቅን፥ ታኒ አይስ ፆሞ? ታኒ ናኣ ጉየ ዛራናዉ ዳንዳእያና? ታኒ እያኮ ባናፐ አትን፥ እ ታኮ ዬና” ያግስ።
ሄሳፈ ጉየ፥ ዳዊቲ ባ ማችዉ በርሳቦ ምንስ። ዳዊቲ ኢኮ ገልድ ኢራ አቅስ፤ እያ እያዉ አደ ናአ የላሱ። ናኣ ሶሎሞነ ግድ ሱንስ፤ ጎዳይ ሄ ናኣ ዶስስ። ጎዳይ ናኣ ዶስዳ ግሾ፥ እያ ሱን “ይድድያ” ግድ ሱንና መላ ናብያ ናታና ኪትስ።
ሄ ዎደ እዮኣብ አሞነታ ካታማ ራባ ኦልድ ካዎ ሚፃ ኦይክስ። እዮኣብ ዳዊታኮ፥ “ታኒ ራባ ካታማ ኦላዳ፥ ሃ ዱቅያ በሳ ኦይካስ። ሀእ አትዳ ኦላንቾታ ሺሻዳ ካታማ ኦላዳ ኦይካ። ሄስ ሀኖና እፅኮ፥ ታኒ ካታማ ኦይካዳ ታ ሱንን ፄገታና መላ ኦና” ያግስ።
ዳዊቲ ባ ኦላንቾታ ኡባ ሺሽድ፥ ራባ ካታማ ብድ፥ ኦልድ ኦይክስ። ኤንታ ካዋ ካላቻ እያ ሁጰፐ ኤክስ። ሄ ዎርቃ ካላቻይ ሀስታማነ እቻሹ ክሎ ግራመ ዴፄስ። እያ ግዶን እንቆ ጌተትያ አልኦ ሹች ደኤስ። ሄ ካላቻ ዳዊቲ ባ ሁጰን ዎስ። ዳዊቲ ካታማፐ ዳሮ ድኦ ድእስ። ሄ ካታማን ደእያ አሳ ከስድ፥ ማጋዘን፥ ብራታ ኮንተንነ ብራታ ካልታን ኦና መላ ኦስ። ቃስ ኤንቲ ፁበ መና መላ ኦስ። አሞነ ካታማ ኡባን ደእያ አሳ እ ሀይሳዳ ኦስ። ሄሳፈ ጉየ፥ ዳዊቲነ እያ ኦላንቾት የሩሳላመ ስምዶሶና።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.