2 ቆሮንቶሳ 6

1ኑኒ ፆሳራ እስፈ ኦያ አስ ግደይሳዳ፥ ህንተ ኤክዳ አ ኬሀተ ሀዳ ኦና መላ ኑ ህንተና ዎሶስ። 2ፆሳይ፥

“ታ ነና ስአና ዎደን ስአስ፤

አቶተ ጋላሳን ነና ማዳስ” ያጌስ። ሄኮ፥ ታ ስእያ ዎደይ ሀእ፤ አቶተ ጋላሳይ ሀች።1

3ኦንካ ኑ ኦሱዋ ቦራና መላነ ኑናን በታና መላ ኮዮኮ። 4ግዶሽን፥ ኑ ቱማ ፆሳ ኦሳንቾታ ግደይሳ ኑ ኦያ ኡባባን በስዳ። ዳሮ ገንጫን፥ ዋየን፥ መቶን፥ ኡንአን፥ 5ጋራፈተን፥ ቃሾን፥ እፆን ኩምዳ ዎጫማን፥ ዳቡራን፥ ስኮ ዮን፥ ፆማን፥2 6ጌሻተን፥ ኤራተን፥ ዳንዳአን፥ ኬሀተን፥ ጌሻ አያናን፥ ቱማ ሲቆን፥ 7ቱማ ኦዳንነ ፆሳ ዎልቃን ኑኒ እያ ኦሳንቾታ ግደይሳ በስዳ። ቃስ ፅሎተይ ኑስ ቶራነ ጎንዳለ። 8ኑኒ ቦንቸትዳነ ቶሸትዳ፤ ጫየትዳነ ጋላተትዳ። ቱማ ሃሳዮስ፥ ሽን አሳይ ኑና ዎርዳንቾ ግዶሶና። 9ኑ አሳን ኤረትዳ አስ፥ ሽን ኤረቶና አሳ መላ ግድዳ። ሀይቅዶሶና ያገትዳ፥ ሽን ፓፃ ደኦስ፤ ሾጨትዳ፥ ሽን ሀይቅቦኮ። 10ኑኒ አዛንኮካ ኡባ ዎደ ኡፋይቶስ። ኑ ማንቆ ዳኖስ፥ ሽን ዳሮ አሳ ዱረዮስ። ቃስ አይኮይካ ባይና አስ ዳኖስ፥ ሽን ኡባይ ኑባ።

11ቆሮንቶሳ አሳቶ፥ ኑ ህንተዉ ቆንጨን ኦድዳ፤ ኑ ኡሉዋ ህንተና በስዳ። 12ህንተ ኑና ህንተ ሲቁዋ በሶና ድግደታፐ አትሽን፥ ኑኒ ኑ ሲቁዋ ህንተና ድግቦኮ። 13አዉ ባ ናይታስ ኦደይሳዳ ታ ህንተዉ ኦዳይስ፤ ኑ ህንተና ኑ ኡሉዋ በስዳይሳዳ፥ ህንተካ ህንተ ኡሉዋ ኑና በስተ።

አማኖና አሳራ ደእያ ጋሄተ

14አማኖና አሳራ በሶና ኦገን ዋፀቶፍተ። ፅሎተስነ ናጋራስ አይብ ጋሄተ ደኢ? ፖኦስነ ማስ አይብ እስፈተ ደኢ? 15ክርስቶሳነ ፃላሄ እስፈ ጋያባይ አይቤ? ቃስ አማነይስነ አማኖናይስ እስፈ ኮፅያባይ አይቤ? 16ፆሳ ኬስ ኤቃታራ አይብ እስፈተ ደኢ? ፆሳይ፥

“ታኒ ኤንታ ግዶን ደአና፥

ኤንታ ግዶን ሄመታና።

ታኒ ኤንታ ፆሳ ግዳና፤

ኤንትካ ታ አሰ ግዳና”

ግዳይሳዳ፥ ኑኒ ደኦ ፆሳ ኬ።3 17ሄሳዳካ፥ ጎዳይ፥

“ኤንታ ግዶፈ ሻከትድ ከይተ፤

ቱና ግድዳባ ቦቾፍተ፤

ታ ህንተና ኤካና።4

18ታ ህንተዉ አዋ ግዳና፤

ህንተ ታዉ አደ ናይታነ ማጫ ናይታ ግዳና፤

ያጌስ ኡባፈ ዎልቃማ ጎዳይ” ያግስ።5