2 ታርከ 2

ፆሳ ኬ ኬፃናዉ ጊገተ

(1 ካዎ 5:1-18)

1ሶሎሞነይ ጎዳ ሱንስ ኬነ ባዉ ጋ ኬፃናዉ ሀልችስ። 2ሶሎሞነይ ቶሆስ ላፑን ታሙ ሙኩሉ አሳነ ገዘ ቢታን ሹቹ ቆአናዉ ሆስፑን ታሙ ሙኩሉ አሳ ዶርስ። ቃስ ኤንታ ዎችያ ሄ ሙኩሉነ ኡሱፑን ፄቱ አሳታ ኤንታ ቦላ ሹምስ።

3ሶሎሞነይ ፅሮሳ ካዋ ክራማስ ኪታ ኪትድ፥ “ታ አዋይ ዳዊቲ ባ ጋ ኬፃና መላ ኔኒ ዝጋ የድዳይሳዳ ታዉካ የዳ። 4ሄኮ፥ ሀእ ታ ጎዳ፥ ታ ፆሳ ሱንስ ኬ ኬፃናዉ ሀናይስ። ታ ያን ሳዎ ቶንኩ ግያ እፃነ ጩይሳናዉ፥ ኡባ ዎደ ጎዳ ስንን ኡይ ዎናዉነ ዎንታነ ኦማርስ፥ ሳምባታ ጋላሳን፥ አጌን ፄርያ ዎደነ ጎዳ ኑ ፆሳ ባኣለ ጋላሳታን ፁሳ ያርሾ ያርሻናዉ፥ ፆሳ ኬ ዱማያና። እስራኤለ አሳይ መርናዉ ኦና መላ ኪተትዳ ኦሶት ሀይሳታ።

5“ኑ ፆሳይ ሀራ ፆሳታ ኡባፈ ግታ ግድያ ግሾ፥ ታ ኬፃናዉ ሀንያ ፆሳ ኬይ ግታ። 6ሽን እያዉ ኬ ኬፃናዉ ዳንዳኤይ ኦኔ? ሳሎፐ ቃ ሳሎይ እያዉ ግደና! ያትን፥ ታ እያ ስንን እፃነ ጩይሳናዉነ ታ እያዉ ኬ ኬፃናዉ ኦኔ?

7“ህዛ አሌቆ ኦሶ፥ ዎርቃ፥ ብራ፥ ናሰነ ብራታ ሴርስያ ኦሱዋነ ዞኦ ማኡዋ፥ ኦቻ ቴራ ዳንያ ማኡዋነ ካሎሰ ማኡዋ ጊግስያ ኤራተ ደእያ አሰ ታዉ የዳ። ታ አዋይ ዳዊቲ ይሁዳንነ የሩሳላመን ደእያ ኩሸ ሂላንቾታ ዶር ዎስ፤ እ ኤንታራ እስፈ ኦና። 8ልባኖሰን ደእያ ነ አሳት ም ዋት ቃንፅያኮ ኤረይሳ ታ ኤራይስ። ሄሳ ግሾ፥ ኔኒ ታዉ ልባኖሰፐ ዝጋ፥ ፂዳነ ፃይ ም የዳ። ታ አሳት ነ አሳታራ ግድድ፥ 9ዳሮ ም ጊግሳና። ታኒ ኬፅያ ፆሳ ኬይ ግታነ ማላልስያባ። 10ም ቃንፅያ ነ አይለታ ታኒ ላታሙ ሙኩሉ ኩንታለ ግስተነ ላታሙ ሙኩሉ ኩንታለ ባንጋ፥ ኦይዱ ፄቱ ሙኩሉ ልትሮ ዎይነነ ኦይዱ ፄቱ ሙኩሉ ልትሮ ሻማሆ ዛይተ እማና” ያግስ።

11ፅሮሳ ካዎይ ክራም ሶሎሞነኮ ዳብዳበ የድሸ፥

“ጎዳይ ባ አሳ ዶስያ ግሾ፥ እ ነና ኤንታ ቦላ ካዎስ።”

12ክራም ጉጅድ፥ “ፆሳ ኬነ ባዉ ጋ ኬፃና መላ ጭንጫ፥ አኬካነ ሂላ ናኣ ካዋ ዳዊታስ እምዳ፥ ሳሎ ሳኣ መዳ ጎዳይ፥ እስራኤለ ፆሳይ ጋላተቶ።

13“ታኒ ክራም-አብ ጌተትያ ሂላንቾነ አኬካ አድያ ነዉ የዳስ። 14እያ አይያ ዳነ ኮቸ፤ እያ አዋይ ፅሮሳ ቢታ አሳ። እ ዎርቃ፥ ብራ፥ ናሰ ብራታ፥ ብራታ፥ ሹቹነ ም ኦያ አስ፤ ኦቻ ቴራ ዳንያ ማኦ፥ ካሎሰ ማኦ፥ ዞኦ ማኦነ ሊኖ ማኦ ጊግስያ ኦሶ ኤሬስ። እ ዱማ ዱማ አሌቆታ ከስድ፥ ኦደይሳዳ ኡባ ኦናዉ ዳንዳኤስ። እ ኩሸ ሂላን ሎህዳ ነ አሳራነ ካሰ ነ አዋ፥ ዳዊታስ ኦዳ አሳራ እያ ኦስሳ። 15ህዛ ነ ታ ጎዳይ እማና ግዳ ግስትያነ ባንጋ፥ ዛይትያነ ዎይንያ የዳ። 16ኔኒ ልባኖሰፐ ኮይዳ ም ኑ ቃንፅድ ቃችድ፥ አባ ቦላራ ቶከትድ፥ ኔኮ ዮጰ ባናዳ ኦና። ያፐ ኔኒ የሩሳላመ ጋካናዉ ኤፍሳና” ያግስ።

17እያ አዋይ ዳዊቲ ካሰ ታይብዳይሳዳ፥ ሶሎሞነይ እስራኤለ ቢታን ደእያ ካረ ቢታ አሳ ኡባ ታይብስ። ኤንቲ ፄታነ እሻታማነ ሄ ሙኩሉነ ኡሱፑን ፄታ ግድዶሶና። 18ሶሎሞነይ ሄ አሳፐ ላፑን ታሙ ሙኩሉ አሳ ቶሆስ፥ ሆስፑን ታሙ ሙኩሉ አሳ ገዘ ቢታን ሹቻ ቆአናዉ ዶርስ፤ ኤንታ ዎቻናው ሄ ሙኩሉነ ኡሱፑን ፄቱ አሳ ሹምስ።