1 ሳሜላ 8

እስራኤለት ካዎ ኮይዶሶና

1ሳሜል ጭምዳ ዎደ ባ ናይታ እስራኤለ ቦላ ዳይና ኦድ ሹምስ። 2እያ ባይራ ናኣ ሱንይ እዩኤላ፤ ካሎ ናአ ሱንይ አብያ፤ ኤንቲ በርሳበን ፕርዶሶና። 3ሽን እያ ናይት ባንታ አዋ ኦግያ ካልቦኮና። ኤንቲ በሶና ጎአ ደማናዉ ጉየ ስምዶሶና፤ ዎፈ ኤክዶሶና፥ ሱረ ፕርዳ ዎቢስዶሶና።

4ሄሳ ግሾ፥ እስራኤለ ጭማት እስፈ ሺቅድ፥ ሳሜላኮ ራማ ይድ፥ 5“ሄኮ ኔኒ ጭማዳሳ፤ ነ ናይት ነ ኦግያ ካሎኮና፤ ሀራ ካዎተት ኦይሳዳ ኑና አይስያ ካዎ ሀእ ኑስ ሹማ” ያግዶሶና።

6ኤንቲ፥ “ኑና አይስያ ካዎ ኑስ እማ” ግድ ኦይችዳይስ ሳሜላ ኡፋይስቤና። ሄሳ ግሾ፥ ሳሜል ጎዳ ዎስስ። 7ጎዳይ ሳሜላ፥ “ታኒ ኤንታ ቦላ ካዎቶናዳ ነና ግዶናሽን ታና እፅዳ ግሾ አሳይ ኔኮ ግያባ ኡባ ስአ። 8ኤንታ ታኒ ግብፀፈ ከስዳ ዎድያፐ ዶምድ ሀች ጋካናዉ ታና አግድ፥ ሀራ ፆሳታ ጎይንሸ ደእዶሶና። ሀእ ኤንቲ ታ ቦላ ኦዳ ኡባ ነ ቦላ ኦሶና። 9ሀእ ኤንቲ ግያባ ስአ፤ ሽን ኤንታ ቦላ ካዎታና ካዋ ዎጋ ኤንታዉ ምንዳ ኦዳ” ያግስ።

10ካዎ ኦይችዳ ደርያስ ጎዳይ ኦድዳ ቃላ ኡባ ሳሜል ያግድ ኦድስ። 11“ህንተ ቦላ ካዎታና ካዎይ ኦናባይ ሀይሳ፤ እ ህንተ አደ ናይታ ኤክድ፥ ፓራ ጋረ አሳታነ ፓራ አሳታ ኦና፤ ኤንቲ እያ ጋርያ ስንን ዎፃና። 12ኤንታፈ አትዳይሳታ ሻላቃታነ ሀምሳላቃታ፥ ሀራታ እያ ቢታ ጎየይሳታ እያ ካ ጫከይሳታ፥ ቃስ ሀራታ እያ ኦላ ሚሸነ ፓራ ጋረ ሚሸ ኦይሳታ ከሳና። 13ህንተ ማጫ ናይታካ ኤፍድ፥ ባዉ ሽቶ ጊግሰይሳታ፥ ካይሳታነ ኡከይሳታ ኦና። 14ህንተ ጎሻፈ፥ ዎይነ ጋደፐነ ሻማሆ ጋደፐ ሎኦ በሳታ ኤክድ፥ ባ ሞርናታስ እማና። 15ካፈነ ዎይንያፐ ታማፈ እስ ኩሽያ ኤክድ ባ ሹማታስነ ባ ሞርናታስ እማና። 16ህንተ አደ አይለታፐ፥ ማጫ አይለታፐ፥ ህንተ ናአተታፈነ ህንተ ሀርያፐ ሎኤይሳ ባዉ ጎኤታናዉ ኤካና። 17ህንተ ዶርሳፈነ ዴሻፐ ታማፈ እስ ኩሸ ኤካና፤ ህንተ እያ ኦሳንቾ ግዳና። 18ሄ ጋላሳይ ጋክዳ ዎደ ህንተ ዶርዳ ካዎይ ጋያ ቆሁዋ ግሾ ዋሳና፤ ሽን ሄ ጋላስ ጎዳይ ህንተ ዋሱዋ ስኤና” ያግስ።

19ግዶሽን፥ አሳይ ሳሜላ ቃላ ስኦና እፅድ፥ “አካይ፥ ኑስ ካዎይ ደኦ። 20ሀራ ካዎተታ መላ ኑና ካለያ፥ ኑ ስንን ብያነ ኑ ኦላ ኦለትያ ካዎይ ደኦ።”

21ሳሜል አሳ ቃላ ኡባ ስእድ፥ ጎዳስ ኦድስ። 22ጎዳይ ሳሜላኮ፥ “ኤንታ ቃላ ስአ፤ ኤንታ ቦላ ካዎ ካዎ” ያግስ።

ሳሜል እስራኤለ አሳኮ፥ “ህንተ ሶ ሶ ስምተ” ያግስ።