1 ሳሜላ 29

አንኩስ ዳዊታ ፅቅላጋ ዛርስ

1ፍልስፄመት ባንታ ኦላንቾታ ኡባ አፌቃን ሺሽዶሶና። እስራኤለት እዝራኤለን ደእያ ፑልቶ ሃ ማታን ዱንካንዶሶና። 2ፍልስፄመ ሀላቃት ባንታ ኦላንቾታ ፄታንነ ሙኩሉ ጩጋን ሳልፕስዶሶና፤ ዳዊቲነ እያ አሳይ አንኩሳራ እስፈ ግድድ ጉየ ባጋራ ሳልፕዶሶና። 3ፍልስፄመ ሀላቃት ኤንታ በእድ፥ “ሀ እብራወት ሀይሳን አይ ኦና?” ያግዶሶና።

አንኩስ፥ “ሀይስ እስራኤለ ካዋ ሳኦላ አይልያ ዳዊታ ግደኔ? እ ዳሮ ዎደ ታራ አስ፤ እ ሳኦላ ካድድ ከዮደፐ ሀች ጋካናዉ ታኒ እያፐ ባላ ደማብከ” ያግስ።

4ሽን ፍልስፄመ ሀላቃት አንኩሳ ቦላ ሀንቀትድ፥ “ሀ አድያ ኔኒ እያዉ እምዳ ካታማ ጉየ ዛራ። ኦላይ ጎብያ ዎደ እ ኑ ቦላ ስሚድ ደንዶና መላ እ ኑራ ኦላ ቦፖ። እ ባ ጎዳራ ስገታናዉ ኑ አሳታ ቆያ ቃንፆፈ አትሽን፥ ሀራ አይ ኦኔ? 5ሀይሳፈ ካሰ ማጫሳይ፥ ‘ሳኦል ሙኩላታ ዎስ፤ ዳዊቲ ታሙ ሙኩላታ ዎስ’ ያግድ ዱርሸነ የፅሸ ሳቢዳይ ዳዊታ ግደኔ?” ያግዶሶና።

6ሄሳ ግሾ፥ አንኩስ ዳዊታ ፄግድ፥ “ደኦ ጎዳይ ኤርያ መላ፥ ኔኒ አማንያ አስ፤ ኔኒ ታራ ኦላስ በይሳ ታ ዶሳይስ። ኔኒ ታኮ ዮሳፐ ሀች ጋካናዉ ታኒ ነ ቦላ ባላ ደማብከ። ሽን ሀላቃት ኔኒ ኦላስ በይሳ ዶሶኮና። 7ኔኒ ጉየ ስማዳ ሳሮ ባ፤ ፍልስፄመ ሀላቃታ ኡፋይሶናባ አይኮካ ኦፋ” ያግስ።

8ዳዊቲ፥ “ታኒ አይ ኦድና? ታኒ ኔራ ደኦደፐ ሀች ጋካናዉ ነ ታፐ አይ ባላ ደማዲ? ያትን፥ ካዋ፥ ታ ጎዳ ሞርከታራ አይስ ኦለትክና?” ያግስ።

9አንኩስ፥ “ፆሳ ኪታንቾዳ ኔኒ ታዉ ሎኦ ግደይሳ ታኒ ኤራይስ። ሽን ፍልስፄመ ሀላቃት፥ ‘እ ኑራ ኦላ ቦፖ’ ያግዶሶና። 10ነነ ኔራ ይዳ ነ ጎዳ አይለታራ ዎንቶ ጉራ ደንድድ ቢተ” ያግስ።

11ሄሳ ግሾ ዳዊቲነ እያ አሳት ፍልስፄመ ስማናዉ ዎንታ ጉራ ደንድዶሶና፤ ፍልስፄመት እዝራኤለ ብዶሶና።