1 ሳሜላ 22

ዳዊቲ አዱላማንነ ምፅጳን

1ዳዊቲ ጋተፐ ባቃትድ፥ አዱላማ ማታን ደእያ ጎንጎሉዋ ብስ። እያ እሻትነ እያ አዋ ሶ አሳ ኡባይ ሄሳ ስእዳ ዎደ ያ እያኮ ብዶሶና። 2መቶትዳይ፥ አጮትዳይነ ሳእ ኢትዳ ኡባይ ዳዊታኮ ሺቅን፥ ኤንታ ታይቦይ ኦይዱ ፄቱ ግድስ፤ እ ኤንታ ሀላቃ ግድስ።

3ዳዊቲ ያፐ ደንድድ ሞአበን ደእያ ምፅጳ ብድ ሞአበ ካዋ፥ “ፆሳይ ታዉ ኦናባ ታ ኤራና ጋካናዉ ታ አዋነ አይዉ ነ ማታን ዎርክ” ያግድ ዎስስ። 4ዳዊቲ ኤንታ ሞአበ ካዋ ማታን ዎስ፤ ዳዊቲ ቆሰትዳ በሳን ደእያ ዎደ ኡባን ኤንቲ ካዋ ማታን ደእዶሶና።

5ሄሳፈ ጉየ፥ ናበይ ጋድ ዳዊታኮ ይድ፥ “ቆሰትዳ በሳን ጋምኦፋ፤ ሀይሳፈ ደንዳዳ ይሁዳ ቢታ ባ” ያግስ፤ ዳዊቲ ያፐ ከይድ ሄረታ ዎራ ብስ።

6ዳዊቲነ እያ አሳይ በንትዳይሳ ሳኦል ስእስ። ሳኦል ግብአ ማታን ደእያ ደረ ቦላ፥ ታማርስከ ም ጋርሳን ቶራ ኦይክድ ኡትስ፤ እያ ሞርናት እያ ዩሹዋን ኤቅዶሶና። 7ሳኦል ኤንታኮ፥ “ህንተኖ፥ ብንያመ አሳዉ፥ ስእተ፤ እሰየ ናአይ ጋደነ ዎይነ ቶክያ በሲ ህንተ ኡባስ እማኔ? ሻላቃታነ ማቶ ሀላቃታ ኦድ ህንተና ሹማኔ? 8ህንተ ኡባይ ታ ቦላ ማቀትደታ፤ ታ ናአይ እሰየ ናኣራ ጫቅዳባ ታዉ ኦንካ ኦድቤና። ህንተፈ እስ አስካ ታዉ ቃተና፤ ሀች ሀንዳይሳዳ ታ ናአይ ታ አይልያን ታና ዎሳናዉ ደንዳይሳ ታዉ ኦንካ ኦድቤና” ያግስ።

9ሳኦላ ሞርናታራ ኤቅዳ ኤዶመ አደይ ዶይቅ፥ “እሰየ ናአይ አክፁባ ናኣ አብመለከኮ ኖባ ብዳይሳ ታኒ በአስ። 10ዳዊቲ አይ ኦነኮ አብመለከይ ጎዳ ኦይችስ፤ ያትድ ዳዊታስ ሽንቀነ ፍልስፄመ አድያ ጎልያዳ ማሻ እያዉ እሚስ” ያግድ ሳኦላስ ኦድስ።

11ሄሳፈ ጉየ፥ አክፁባ ናኣ ካህንያ አብመለከነ ኖባን ካህነ ግድድ ደእያ እያ አዋ ሶ አሳ ኡባ ካዎይ ፄግስን፥ ኤንቲ ካዋኮ ይዶሶና። 12ሳኦል፥ “አክፁባ ናአዉ፥ ስአ” ያግስ።

አብመለከይ፥ “ኤሮ ታ ጎዳዉ” ያግስ።

13ሳኦል፥ “ኔራ እሰየ ናኣራ ታ ቦላ አይስ ማቀትደቲ? ኔኒ እያዉ ኡይነ ማሸ እማዳ፥ እ ታና ዎናዉ ደንዳና መላ እያ ግሾ ፆሳ አይስ ኦይቻዲ?” ያግስ።

14አብመለከይ፥ “ነ ኦሳንቾታ ኡባ ግዶን ዳዊቲ መላ አማነተይ፥ ካዋ ቦሎይ፥ ነና ናገይሳታ ኪተይነ ነ ሶ አሳ ግዶን ዳሮ ቦንቸተይ እያ መል ኦኔ? 15ታኒ እያ ግሾ ፆሳ ኦይችሽን፥ ሀይስ ታዉ ኮይሮ? ግደና፥ ካዋዉ፥ ታና ነ አይልያ ዎይኮ ታ አዋ ሶ አሳ ኡባ አይኮካ ሞቶፓ። ታኒ ነ አይለይ ሀ ኦዳባ ጉ ግድን ዎይኮ ግታ ግድን ኤርከ” ያግስ።

16ካዎይ፥ “አብመለከ፥ ነነ ነ አዋ ሶ አሳ ኡባይ ሀይቃና” ያግስ። 17ሳኦል ባ ማታን ኤቅድ ናገይሳታ፥ “ጎዳ ካህነታ ዎተ፤ ኤንቲ ዳዊታ ማድዶሶና። ዳዊቲ ባቃትዳይሳ ኤርሸ ታዉ ኦድቦኮና” ያግስ። ሽን ካዋ ናገይሳት ጎዳ ካህነታ ቦላ ባንታ ኩሽያ ደንና እፅዶሶና።

18ካዎይ ዶይቃ፥ “ኤንታ ነ ዎ” ያግድ ኪትስ። ኤዶመ አደይ ዶይቅ ካህነታ ሾጭድ፥ ሄ ጋላስ ኤፉደ ማእዳ ሆስፑን ታማነ እቻሹ ካህነታ ዎስ። 19ቃስ ዶይቅ ካህነታ ካታማ፥ ኖባ ማሻን ዉርስስ፤ ሄ ካታማን ደእያ አደነ ማጫ፥ ናይታነ ዮጋ ናይታ፥ መሄታ፥ ሀረታነ ዶርሳታ ማሻን ዎስ።

20ሽን አክፁባ ናኣ አብመለከ ናይታፐ አብያታራ ጌተትያ እስ ናአይ ከስ ኤክድ፥ ዳዊታኮ ባቃትስ። 21እ፥ ሳኦል ጎዳ ካህነታ ዎዳይሳ ዳዊታስ ኦድስ። 22ዳዊቲ አብያታራ፥ “ኤዶመ አደይ ዶይቅ ሄ በሳን ደኤይሳ ታኒ በእዳ ዎደ እ ሳኦላስ ኦዳናይሳ ሄ ጋላስ ኤራስ። ነ አዋ ሶ አሳ ኡባ ሀይቆስ ጋዳይ ታና። 23ህዛ ኔኒ ታራ ደአ፤ ያዮፋ። ነና ዎናዉ ኮይያ ኡራይ ታና ዎናዉ ኮዬስ፤ ኔኒ ታ ማታን ሳሮ ዳና” ያግስ።