1 ሳሜላ 2

ሃን ዎሳ

1ሃና ሀይሳዳ ያጋዳ ዎሳሱ፤

“ታ ዎዛናይ ጎዳን ኡፋይቴስ፤

ታ ካጨይ1 ጎዳን ቁ ግስ።

ታ ሞርከታ ቦላ ታኒ ጬቀታይስ፤

ነ አሾይ ታና ኡፋይሴስ።

2ጎዳ መላ ጌሽ ባዋ፤

ነ መል ኦንካ ባዋ።

ኑ ፆሳፈ አትሽን፥

ሀራ ዛል ባዋ።

3ኦቶሮ ሃሳያ አግተ፤

ኦቶሮ ቃል ህንተ ዶናፐ ከዮፖ።

ጎዳ ፆሳይ ኡባ ኤሬስ፤

አሳ ኦሶ ይግድ ፄሌስ።

4ኦላንቾታ ዶንገይ መቅስ፤

ሽን ዳቡራንቾት ዎልቃ ደምዶሶና።

5ካልዳይሳት ኮሻትድ ኡነትዶሶና፤

ሽን ኮሻትዳይሳት ሀእ ካልዶሶና።

ማይንያ ላፑን ናይታ የላሱ፤

ሽን ዳሮ ናይታ የልዳራ ባርካ አታሱ2

6ጎዳይ ዎስ፥ ፓስ፤

ስኦለን የጌስ፥ ያፐ ከሴስ።

7ጎዳይ ዱረዬስ፤ ጎዳይ ማንቀስ፤

ካዉሼስ፤ ቁ ኦስ።

8እ ማንቆታ ባናፐ ደንስ፤

መቶታንቾታ ብዶፐ ደንስ።

ኤንታ ቦንቾ አሳራ ኡትሴስ፤

ቦንቾ አራታ ላትሴስ።

ቢታ ባሶት ጎዳሳ፤

ኤንታ ቦላ አላምያ ኤስስ።

9“እ ጌሻታ ቶሁዋ ናጌስ፤

ሽን ኢታታ ማን ስእ ኦና፤

አስ ባ ዎልቃን ፆነና፤

10ጎዳራ ኤቀተይሳት ሊቃና፤

ጎዳይ ሳሎፐ ኤንታ ቦላ ዳዳዳ ደቻና።

ጎዳይ ሳአን ደእያ ኡባ ፕርዳና፤

እ ባ ካዋስ ምኖተ እማና፤

እ ባ ትይዳይሳስ ፆኖ እማና።”

11ሄሳፈ ጉየ፥ ህልቃን ራማን ደእያ ባ ሶ ብስ፤ ሽን ናአይ ሳሜል ካህንያ ኤልፐ ጋርሳራ ጎዳስ ኦስ።

ኤል ናይታ ኢታተ

12ኤል አደ ናይት ኢታ፤ ኤንቲ ጎዳ ቦንቾኮና። 13ሄ ዎደ ካህነት አሳራ ደእያ ጋሄተን ኦያ ዎግ ደኤስ። ሄስካ አሳይ ያርሾ ያርሽያ ዎደ ካህንያ ኦሳንቾይ ሄ አቻራ ደእያ ቃጰ ኤክድ ቡሮ አሾይ ካፅሽን ዬስ። 14ዶይስያ ኦቱዋን ዎይኮ ድስትያን ዎይኮ ፃሩዋን ባ ቃጵያ የድድ፥ አይ ቆሞ አሾ ግድኮካ ከስ ኤፍድ ካህንያስ እሜስ። ያርሾ ያርሻናዉ ሴሎ ያ እስራኤለ አሳ ኡባ ቦላ ኤንቲ ሀይሳዳ ኦሶና። 15ቃስ ሞዋ ያርሾ በሳን ፁጋናፐ ስን ካህንያ ኦሳንቾይ ያርሾ ያርሽያ አድያኮ ብድ፥ “ካህነይ ቃየ አሾፐ አትሽን፥ ካፅዳ አሾ ኔፐ ኤኮና ግሾ፥ እያዉ ጫጫናዉ አሾ ሀማ” ያጌስ።

16አደይ ዛሪድ፥ “ኮይሮትድ ሞይ ፁገቶ፤ ሄሳፈ ጉየ፥ ነ ኮየይሳ ኤካ” ያጌስ፤ ሽን ካህንያ አይለይ፥ “አካይ፥ ታዉ ሀእ እማ፥ ነ ድግኮ፥ ታኒ ዎልቃን ኤካና” ያጌስ።

17ጎዳስ እምያ ያርሹዋ ኤል ናይት ካዳ ግሾ፥ ኤንታ ናጋራይ ጎዳ ስንን አድ ዳርስ።

18ሽን ሳሜል ናአ ደእሸ ሊኖፐ ኦሰትዳ ኤፉደ3 ማኦ ማእድ ጎዳ ስንን ኦስ። 19ሳሜላ አይያ ላይን ላይን ጉ ቆለ ጊግሳዳ፥ ላይ ያርሾ ያርሻናዉ ባ አዝናራ ባሸ እያዉ ኤካዳ ባዉሱ። 20ኤል ህልቃናነ እያ ማችዉ፥ “ህንተ ጎዳስ ዱማይድ እምዳ ሀ ናኣ በሳን ጎዳይ ነዉ ሀ ማቸፈ ሀራ ናይታ እሞ” ያግድ አንጄስ፤ ያትን፥ ኤንቲ ባንታ ሶ ስሞሶና። 21ጎዳይ ሃና አንጅን፥ ቃንታዳ ሄ አደ ናይታነ ናምኡ ማጫ ናይታ የላሱ። ናአይ ሳሜል ጎዳ ስንን ድጭስ።

22ኤል ዳሮ ጭምስ። እያ ናይት እስራኤለ አሳ ኡባ ቦላ ኦዳ ኢታባነ ጌሻ ዱንካንያ ፐንገን ጎዳስ ኦያ ማጫሳታራ ቱንዳይሳ ስእስ። 23ሄሳ ግሾ ኤንታኮ፥ “ህንተ ሀይሳ መላባ አይስ ኦቲ? ህንተ ኢታ ኦሱዋ ታኒ አሳ ኡባፈ ስአስ። 24ታ ናይቶ፥ ሄሳ አግተ፤ ጎዳ አሳይ ህንተና ግያባይ ሎኦ ግደና። 25እስ አስ አሰ ናቅኮ፥ ፆሳይ እያዉ ጋናታና፤ ሽን አስ ጎዳ ናቅኮ፥ እያዉ ጋናታናይ ኦኔ?” ያግስ።

ጎዳይ ኤንታና ዎናዉ ኮይዳ ግሾ ኤንቲ ባንታ አዋ ዞርያ ስኦና እፅዶሶና።

26ናአይ ሳሜል ጎዳ ስንንነ አሳ ስንን ድጭስነ ሳበትስ።

ኤል ኬ ቦላ ኦደትዳ ትንብተ

27እስ ጋላስ ናበይ ኤልኮ ይድ፥ “ጎዳይ ሀይሳዳ ያጌስ። ‘ነ አዋ ሶ አሳይ ግብፀ ቢታን ፓሮና ኩሸን ደእያ ዎደ ታ ኤንታዉ ቆንጫብክና? 28ነ አዋይ ካህነ ግድድ ታ ያርሾ በሳ ከያና መላ፥ እፃነ ጩይሳና መላነ ታ ስንን ኤፉደ ማእድ ኦና መላ እስራኤለ ዛረ ኡባፈ እያ ዶራስ። እስራኤለ አሳይ ታማን ያርሽያ ያርሾ ኡባ ታኒ ነ አዋ ኮቻስ እማስ። 29ታኒ ታ ደእያ በሳን ሺቃና መላ ኪትዳ ታ ያርሹዋነ እሙዋ ህንተ አይስ ካደቲ? ታ አሳ እስራኤለ፥ ታዉ ሺሽዳ ያርሾ ኡባፈ ዶረትዳይሳ ምድ ሞና መላ ኦዳ ነ ናይታ ታፐ አዳ አይስ ቦንቻዲ?’

30“ሄሳ ግሾ፥ ጎዳይ፥ እስራኤለ ፆሳይ ሀይሳዳ ያጌስ። ነ ኮቻይነ ነ አዋ ኮቻይ መርናዉ ታዉ ኦና። ሽን ሀእ ሄስ ታፐ ሃኮ፤ ታና ቦንቸይሳታ ቦንቻና፤ ታና ካይሳት ካታና። 31ነ ኮቻን አስ ጬጎና መላ ታኒ ነ ዎልቃነ ነ አዋ ሶ አሳ ዎልቃ ይስያ ዎደይ ያና። 32ኔኒ ታ ኬን መቶ በአና፤ ታኒ እስራኤለ አሳስ እምያ አንጁዋ ኔኒ በአዳ ቃናታና፤ ሽን ነ ሶ አሳን ጬጋና አስ ኦንካ ባዋ። 33ታኒ ታ ያርሾ በሳፈ ይሶና አስ ደእኮ፥ እያ ጋሶን ነ አይፈይ አፉፅሸ ቆቃና፤ ነ ዎዛናይ አዛኖን ፁገታና፤ ነ ኮቻ ኡባይ ናአተን ሀይቃና። 34ነ ናይት ናምአይ፥ አፍናንነ ፍንሃስ እስ ጋላስ ሀይቃና፤ ሄሳ ነዉ ማላ ግዳና። 35ታ ዎዛናዳነ ታ ቆፋዳ ኦያ ታዉ አማነትያ ካህነ ደንና። ታኒ እያዉ አማነትዳ ሶ አስ እማና፤ ታኒ ትይዳ ካዋ ስንን ኤንቲ ኡባ ዎደ ኦና። 36ነ ኮቻ ግዶፈ አትዳ ኡባይ ጉ ሚሸ ዎይኮ ባሶ ኡይ ዎሳናዉ ይድ፥ እያ ስንን ጉፋንድ፥ ‘ታኒ ምያባ ደማና መላ ካህነ ኦዳ ታና ሹማርክ’ ያጋና” ያግስ።