1 ሳሜላ 11

ሳኦል አሞነታ ፆንስ

1እስ አጌናፐ ጉየ፥1 አሞነ ካዎይ ናኦስ ደንድድ፥ ጋላዳን ደእያ ያበሳ ካታማ ተቅስ። ያበሳ አሳይ፥ “ኔኒ ኑራ ጫቃ፤ ኑኒ ነዉ ሃረታና” ያግዶሶና።

2ናኦስ፥ “ታኒ ህንተራ ጫቃናይ ህንተ ኡሻቻ አይፍያ ዎጫ ከሳዳ እስራኤለ ካዉሽዳፐ ጉየና” ያግስ።

3ያበሳ ጭማት ናኦሳኮ፥ “እስራኤለ ቢታ ኡባ ኑኒ ኪታ የዳና መላ ላፑን ጋላስ ታካ፤ ኑና አሽያ አስ ይኮ ኑኒ ነዉ ኩሸ እማና” ያግዶሶና።

4ኪተትዳ አሳይ ሳኦል ደእያ በሳ ግብአ ጋክድ ሀ ኦዳ አሳስ ኦድዶሶና፤ አሳ ኡባይ ባንታ ቃላ ቁ ኦድ ዬክዶሶና። 5ሄ ዎደ ሳኦል ባ ቦራታ ላግድ ጎሻፈ ይሸ፥ “አሳይ ዋንዴ? አይስ ዬኮና?” ያግድ ኦይችስ። ኤንቲ ያበሳ አሳይ ግዳባ እያዉ ኦድዶሶና።

6ሀ ቃላ ሳኦል ስእዳ ዎደ ፆሳ አያናይ እያ ቦላ ዎልቃን ዎስ፤ ሳኦል ሸነ ኤፅስ። 7ሳኦል ዋፃ ቦራታ ሙፀረድ፥ “ሳኦላነ ሳሜላ ካልድ፥ ከዮና አሳ ቦራት ሀይሳዳ ሙፀታና” ያግድ ኪተትዳ አሳታ ቦላ እስራኤለ ቢታ ኡባ የድስ።

ሄ ዎደ አሳ ኡባይ ጎዳስ ያይዶሶና፤ ኤንቲ እስ አሳዳ ሀንድ ከይዶሶና። 8ሳኦል ቤዘቃን ኤንታ ሺሽድ ታይብዳ ዎደ እስራኤለ አሳይ ሄ ፄቱ ሙኩሉ፤ ይሁዳ አሳይ ሀስታሙ ሙኩሉ ግድስ። 9ኪተትዳ አሳይ፥ “ብድ ያበሳ ጋላዳ አሳስ፥ ‘ዎንቶ ፃልቀይ ምችያ ዎደ ኑኒ ህንተና አሻና ያግድ ኦድተ’ ” ያግዶሶና። ኪተትዳ አሳይ ብድ፥ ያበሳ አሳስ ሄሳ ኦድን፥ ኤንቲ ዳሮ ኡፋይትዶሶና።

10ያበሳ አሳይ አሞነታኮ፥ “ኑኒ ዎንቶ ህንተዉ ኩሸ እማና፤ ህንተ ኑ ቦላ ዶስዳባ ኦተ” ያግዶሶና።

11ዎንተ ጋላስ ሳኦል ባ አሳ ሄ ጩጋን ሻክስ። ኤንቲ ሳእ ዎንትያ ዎደ አሞነ አሳይ ዱንካንዳ ጉታ ገልድ፥ ፃልቀይ ምቻና ጋካናዉ አሞነታ ጎይርዶሶና። ጎይረተፈ አትዳይሳት ናምኡ አስ እስፈ ዶናዳ ባዉ ባዉ ባቃቲስ።

12እስራኤለ አሳይ ሳሜላኮ፥ “ሳኦል ኑ ቦላ ካዎታነ ያግዳ አሳት ኦናንቴ? ኤንቲ ኦነኮ ከስተ፤ ኑ ኤንታ ዎና” ያግስ።

13ሽን ሳኦል፥ “ሀች ጎዳይ እስራኤለ አሽዳ ግሾ እስ አስካ ሀይቀና” ያግድ ዛርስ።

14ሳሜል፥ “ሃይተ፤ ጋልጋላ ብድ፥ ያን ሳኦል ካዎ ግደይሳ ዛሪድ ኤርሶስ” ያግስ። 15ሄሳ ግሾ፥ አሳ ኡባይ ጋልጋላ ብድ፥ ጎዳ ስንን ሳኦል ካዎ ግደይሳ ኤርስዶሶና። ያን እስፈተ ያርሾ ጎዳ ስንን ያርሽዶሶና። ሳኦልነ እስራኤለ አሳ ኡባይ ሄ በሳን ባኣለ ኡፋይሳን ቦንችዶሶና።