ጌሻ ማፃፋ
1 ሳሜላ 1
ሳሜላ የለተ
ደረይ ዳርያ ኤፍሬማ ቢታን፥ ራማ ካታማን ደእያ፥ ኤፍሬማ ኮቸነ ዙፋ ኮቸ ግድዳ፥ ህልቃና ጌተትያ እስ አደይ ደኤስ። እ ይሮሃማ ናአ፤ ይሮሃም ኤልሁ ናአ፤ ኤልሁ ቶሁ ናአ፤ ቶሁይ ዙፋ ናኣ። ህልቃናስ ናምኡ ማቸት ደኦሶና፤ እስነ ሱንይ ሃኖ፤ ሀንኮር ሱንይ ፕናኖ። ፕናንስ ናይት ደኦሶና፥ ሽን ሃናስ ናእ ባዋ።
ህልቃን ላይን ላይን ኡባፈ ዎልቃማ ጎዳ ጎይናናዉነ እያዉ ያርሻናዉ ሴሎ ቤስ። ኤል ናይት ናምአይ፥ አፍናንነ ፍንሃስ ጎዳ ካህነ ግድድ ሴሎን ሀጋዞሶና። ህልቃን ያርሾ ያርሽያ ዎደ ኡባን አሹዋፐ እስ እስ ኩሸ ባ ማቸ ፕናንስ፥ ባ አደ ናይታስነ ማጫ ናይታስ ሁጰን ሁጰን እሜስ። ጎዳይ ሃኖ የሎ ድግኮካ፥ ህልቃን እዮ ዶስያ ግሾ፥ እዉ ናምኡ ኩሸ እሜስ። ጎዳይ ሃኖ የሎ ድግዳ ግሾ፥ እ ዳዉያ እዮ ቶቻዳ ይሎያዉሱ። ሄስ ላይን ላይን ኡባ ዎደ ሀንያባ። ሃና ጎዳ ኬ ብዳ ዎደ ኡባን እ ዳዉያ እያ ዬካና ጋካናዉነ ካ እፃና ጋካናዉ ይሎያዉሱ። እ አዝናይ ህልቃን፥ “ሃነ፥ ነ አይስ ዬካይ? አይስ ካ ሚኪ? ነ ዎዛናይ አይስ አዛኒ? ታኒ ነዉ ታሙ ናይታፐ አክናዬ?” ያጌስ።
እስ ጋላስ ኤንቲ ሴሎን ምዳፐነ ኡይዳፐ ጉየ፥ ሃና ደንዳ ኤቃሱ። ካህነይ ኤል ጎዳ ኬ ፐንግያ ማታን ባ ኡትያ በሳን ኡትስ። ሃና ዳሮ አዛንዳ ግሾ ጫመታዳ ዬካሸ ጎዳ ዎሳሱ። እያ ሀይሳዳ ያጋዳ ቃንገታሱ፤ “ኡባፈ ዎልቃማ ጎዳዉ፥ ታና ነ አይልዉ በአ። ታ መቱዋ በአዳ፥ ታና ሀሳያ፤ ታና ነ አይልዉ ዶጎፓ። ኔኒ ታዉ ነ አይሌስ አደ ናአ እምኮ፥ እያ ደኦ ላይ ኡባን ታኒ እያ ነዉ እማና፤ እያ ሁጰይ ፖሎ ሜደተና” ያጋሱ።
ሃና ጎዳ ዎሳ አዱስዳ ዎደ ኤል እ ዶና በኤስ። ሃና ባ ዎዛናን ፆሳ ዎስያ ዎደ እ መተርሻይ ቃፄስ፥ ሽን እ ቃላይ ስኤተና፤ ሄሳ ግሾ፥ ኤል እዮ ማትዳዳ ቆፕስ። እ፥ “ኔኒ አዉደ ጋካናዉ ማታይ? ዎይነ ኡሻ ኔፐ ድጋ” ያግስ።
ሃን ዛራዳ፥ “ታ ጎዳዉ፥ ግደና፤ ታኒ ዳሮ አዛንዳ ማጫስ፤ ታኒ ታ ሸምፑዋፈ ጎዳ ዎሳይስፐ አትሽን፥ ዎይነ ዎይኮ ማይያ ኡሹ ኡያብከ። ታኒ መቶይነ አዛኖይ ዳርዳ ግሾ ዎሳይስ። ታና ነ አይልዉ ፓና ማጫስ ኦዳ ቆፖፋ” ያጋሱ።
ኤል ዛሪድ፥ “ሳሮ ባ፤ ኔኒ ዎስያባ እስራኤለ ፆሳይ ነዉ እሞ” ያግስ።
ሃና፥ “ነ አይልያ ነ ስንን ሳባ ደሞ” ያጋሱ። ሄሳፈ ጉየ፥ እያ ባ ኦግያ ባዳ ካ ማሱ፤ ሄሳፈ ስማዳ እያ አዛናቡኩ።
ዎንተ ጋላስ ጉራ ደንድድ፥ ህልቃንነ እያ ሶ አሳይ ጎዳ ጎይንዳፐ ጉየ፥ ራማ ካታማን ደእያ ባንታ ሶ ስምዶሶና። ህልቃን ባ ማቸ ሃንራ አቅስ፤ ጎዳይ እዮ ቆፕስ። እያ ቃንታዳ አደ ናአ የላሱ። ሃና፥ “ታኒ ጎዳ ዎስን እ ታና ስእስ” ጋዳ እያ ሱን ሳሜላ ሱንሱ።
ህልቃን ባ ሶ አሳ ኡባራ ላይ ያርሾ ጎዳስ ያርሻናዉነ ቃንገ ጋናዉ ሴሎ ብስ። ሽን ሃና ባቡኩ። እያ ባ አዝናኮ፥ “ናአይ ን ዱዳፐ ጉየ፥ እያ ኤፋዳ፥ ጎዳስ እማና፤ እ መርናዉ ያን ዳና” ያጋሱ።
ህልቃን፥ “ነና ሎእዳባ ኦ፤ እ ን ዱና ጋካናዉ ሶን ጋምአናዉ ዳንዳኣሳ፤ ጎዳይ ባ ገልዳ ቃላ ነዉ ፖሎ” ያግስ። ሃና ባ ናኣ ን ዱና ጋካናዉ ሶን ጋምአሱ።
ሃና ናአይ ን ዱዳፐ ጉየ፥ ናኣነ ሄ ላይ ዎፋኖ1 ላታሙ ክሎ ግራመ ለነ ኦጎሮ ኩመ ዎይነ ኡሹ ኤካዳ ሴሎን ደእያ ጎዳ ኬ ባሱ፤ ሄ ዎደ ናአይ ጉ። ኤንቲ ዎፋኑዋ ሹክዳፐ ጉየ ናኣ ኤልኮ ኤፍዶሶና። ሃና፥ “ታ ጎዳዉ፥ ነ ሸምፖይ ኤሮ፤ ነ ስንን ኤቃዳ ጎዳ ዎስዳ ማጫስያ ታና። ሀ ናኣ እማና መላ ዎስን፥ ጎዳይ ታ ዎስዳባ እሚስ። ሄሳ ግሾ፥ ታኒ እያ ጎዳስ እማስ፤ እ ባ ደኦ ላይ ኡባን ጎዳስ እመትስ” ያጋሱ። ኤንቲ ያን ጎዳ ጎይንዶሶና።
Source notes (1)
- Footnote ሜ ላይ ዎፋኖ፦ እብራወ ብርሸይ ሄ ዎፋኖ ጌስ፤ ቃስ ግርከ ብርሸይ ሄ ላይ ዎፋኖ ጌስ።
ጌሻ ማፃፋ. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.