1 ጰፅሮሳ 3

አዝናባነ ማችባ

1-2ሄሳዳካ፥ ማቸቶ፥ ህንተ አዝናታፐ ፆሳ ቃላስ ኪተቶናይሳት ደእኮካ አይኮካ ኦደቶናሽን፥ ህንተ ያሻተነ ህንተ ጌሻ ደኡዋ በእድ አማናና መላ ኤንታዉ ሃረትተ።1 3ህንተ፥ ህንተ ሁጰ ፕፆንነ ዎርቃ አሌቆን ዎይኮ ሎኦ ማኦን ህንተ ቦላ አሳተ ሎይሶን ግዶፖ።2 4ሽን ህንተ ዎዛና ግዶን ደእያ የገልሳተይ ፆሳ ስንን ህንተዉ ዳሮ አልኦ ግድድ ዮና፥ አሽከነ ዎፑ ግዳ አያና ግዶ። 5ፆሳይ እማና ግዳይሳ አማንዳ ጌሻ ማጫሳት በን ዎደ ባንታ አዝናታስ ሃረትድ፥ ባንታና ሄሳዳ ዳሮ ሎይዶሶና። 6ሄሳዳ ሳራ አብራሃመ፥ “ታ ጎዳዉ” ያጋዳ ፄጋሸ፥ እያዉ ኪተታሱ፤ ህንተካ አይኮካ ያዮና ሎኦባ ኦኮ እ ናይታ።3

7አዝናቶ፥ ህንተ ማቸት ህንተፈ ዳቡራንቾ መታ ግደይሳ ኤርድ፥ ኤንታና ቦንችተ፤ ህንተ ዎሳ ቦና መላ ፆሳይ እምዳ ደኡዋ ኤንቲ ህንተራ እስፈ ላትያ ግሾ ኤንታ ቦንችተ።4

ሎኦ ኦድ መቶ ኤኮ

8ዉርሰን፥ ኡባይ እስ ቆፋን ደእተ። እሶይ እሱዋስ ቃትሸ፥ እሻዳ ሲቀትተ፤ ቃስ እሶይ እሱዋስ ኬሀታነ አሽከታ ግድተ። 9ኢታ ግሾ ኢታ ዎይኮ ጫሻ ግሾ ጫይድ ዛሮፕተ፤ ሄሳ አግድ፥ ፆሳይ ህንተዉ አንጁዋ እማናዉ ህንተና ፄግዳ ግሾ አንጅተ። 10አይስ ጊኮ፥ ጌሻ ማፃፋይ፥

“ደኦ ዶሰይነ ሎኦ ዎደ

በአናዉ ኮየይ ኦና ግድኮካ

ባ እንፃርሳን ኢታባነ ዎርዶ ኦደተይሳ አጎ።5

11ኢታባ ኦይሳ አግድ ሎኦባ ኦ፤

ሳሮተካ ኬህ ኮዮነ ካሎ።

12ጎዳ አይፈይ ፅሎታኮ ፄሌስ፤

ቃስ እ ኡባ ዎደ ኤንታ ዎሳ ሀይዜስ።

ሽን ጎዳይ ኢታባ ኦይሳታ ባ ሀንቆ ሶምኡዋን ፄሌስ”

ያጌስ።

13ህንተ ሎኦባ ኦናዉ አሞትኮ ህንተና ቆሀናይ ኦኔ? 14ሀር አቶሽን፥ ፅሎተ ግሾ ህንተ ዋየትኮ አንጀትዳይሳታ። አሳስ ያዮፍተነ ህርጎፍተ።6 15ክርስቶሳ ህንተ ዎዛናን ቦንችተነ ጎዳይተ። ፆሳይ ህንተዉ እምዳ ኡፋይሳስ ጋሶ ኦይችያ ኦደስካ ዛሮ እማናዉ ኡባ ዎደ ጊግድ ኡትተ፥ ሽን ሄሳ አሽከተንነ ያሻን ኦተ። 16ቃስ ክርስቶሳን ህንተ ደእያ ሎኦ ደኡዋ ኢታባ ኦዳባዳ፥ ህንተና ጫይያ አሳይ ዝግርያባን ዬላታና መላ ህንተ ካሀይ ጌሽ ግዶ። 17ፆሳይ ግዳባ ግድኮ ኢታባ ኦዳ ግሾ ዋየ ኤከይሳፈ ሎኦባ ኦዳ ግሾ ዋየ ኤከይስ ሎኦ። 18ክርስቶስ ኑና ፆሳኮ ሺሻናዉ ባዉ ፅሎ ግድድ ደእሸ፥ ናጋራንቾታ ግሾ እስ ቶሆ ናጋራ ኡባስ ሀይቅስ፤ እ ባ አሳተን ሀይቅስ፥ ሽን አያናን ፓፅስ። 19ቃስ ሄ አያናን እ ብድ ቃሾን ደእያ ሸምፖታስ ቃላ ኦድስ። 20ኖሄይ ማርካብያ ኬፅያ ዎደ ሄ ሸምፖት ፆሳስ ኪተቶና እፅዶሶና፥ ሽን ፆሳይ ኤንታና ዳንዳእ ጋምእስ። ሆስፑን አሳ ፃላል ማርካብያን ገልድ፥ ዮ ሃፈ አትዶሶና።7 21ሄ ዮ ሃይ ሀእ ህንተና አሽያ ፅንቃተ ሌምሶ ግድስ። ሀ ፅንቃተይ ቦላ ቅታ ሜጮ ግዶናሽን፥ ሎኦ ካሀ ፆሳፈ ኤካናዉ እያ ዎስያ ኦገ ግድድ፥ ክርስቶሳ ደንዱዋ ባጋራ ህንተና አሼስ። 22እ ሳሎ ብድ ፆሳ ኡሻቻን ኡትድ፥ ኪታንቾታ፥ ማታ አዋታነ ዎልቃማታ ሃሬስ።