1 ቆሮንቶሳ 10

ኤቃ ጎይኖፍተ

1ታ እሻቶ፥ ታኒ ህንተ ሀይሳ አኬካና መላ ኮያይስ። ኑ ማይዛት ኡባይ ሻራፐ ጋርሳራ ሄመትዶሶና፤ ኡባይ አባ ፕንዶሶና።1 2ኤንቲ ሙሰራ እስፋናዉ ሻራንነ አባን ፃማቀትዶሶና። 3ኤንቲ ኡባይ እስ አያና ካ ምዶሶና።2 4ቃስ ኡባይ እስ አያና ኡሻ ኡይዶሶና። ኤንቲ ባንታና ካልያ አያና ዛላፈ ፑልትዳ ኡሻ ኡይዶሶና፤ ሄ ዛላይካ ክርስቶሳ።3 5ሽን ፆሳይ ኤንታፈ ዳሮታን ኡፋይትቦና ግሾ፥ ኤንታ አሀይ መላ ቢታን ዎድ አትስ።4

6ኤንቲ ኢታባ አሞትዳይሳዳ፥ ኑካ ኢታባ አሞቶና መላ ሄ ኡባይ ኑስ ሌምሶ ግድስ።5 7ጌሻ ማፃፋን፥ “አሳይ ማናዉነ ኡያናዉ ኡትዶሶና፤ ቃስ የፃናዉ ደንድዶሶና” ጌተትዳይሳዳ ኤንታፈ እሶት እሶት ኤቃ ጎይንዳይሳ መላ ህንተ ኤቃ ጎይኖፍተ።6 8ኤንታፈ እሶት እሶት ላይማትዳይሳዳ ኑ ላይማታናዉ በሰና። ሄሳ ጋሶን ኤንታፈ እስ ጋላስ ላታማነ ሄ ሙኩላይ ሀይቅስ።7 9ኤንታፈ እሶት እሶት ጎዳ ፓጭድ ሾሻን ዱከትድ ሀይቅዳይሳዳ ኑ ጎዳ ፓጫናዉ በሰና።8 10ኤንታፈ እሶት እሶት ዙዙምድ ሀይቆ ኤህያ ኪታንቹዋን ይዳይሳዳ ህንተካ ዙዙሞፍተ።9

11ሀ ኤንታ ቦላ ጋክዳ ኡባይ ኑ ናገታና መላ ኑስ ሌምሶ ግድስ። ቃስ ዎደ ዉርሰ ቦላ ደእያ ኑስ ትምርተ ግዳና መላ ሀ ኡባይ ፃፈትስ።

12ሄሳ ግሾ፥ ታ ኤቃስ ግያ ኦንካ ኩንዶና መላ ባና ናጎ። 13አሰ ኡባ ጋክያ ፓጨፐ አትሽን፥ ዱማ ፓጨይ ህንተና ጋክቤና። ህንተ ዎልቃይ ዳንዳኤይሳፈ አያ ፓጨን ህንተ ፓጨቶና መላ አድ እሞና ፆሳይ አማነትዳይሳ። ህንተና ፓጨይ ጋክያ ዎደ ሄ ፓጭያ እ ህንተና ዳንዳእሳና። ቃስ ሄ ፓጭያፐ ህንተ ከያና ኦግያ እ ጊግሳና።

14ህዛ፥ ታ አልኦ እሻቶ፥ ኤቃ ጎይኖፈ ሃክተ። 15ህንተ ዎዛናማ አስ ግድዳ ግሾ ታ ሀይሳ ኦዳይስ። ታኒ ገይስ ቱማ ግደይሳ ህንተ ህንተ ሁጰን ፕርድተ። 16ኑኒ ፆሳ ጋላትድ ሻከትያ አንጆ ፁአይ ክርስቶሳ ሱራ እስፈተ ደኤይሳ ግደነዬ? ቃስ ኑኒ ባያ ኡይይ ክርስቶሳ አሹዋራ እስፈተ ደኤይሳ ግደነዬ?10 17ኑኒ ዳሮ ግድኮካ ኡይይ እስኖ፥ ኑ ሄ እስ ኡይ ሻከትያ ግሾ እስ አሳተ።

18አነ እስራኤለ አሳይ ኦዳይሳ አኬክተ። ያርሸትዳ ያርሹዋ መይሳት ያርሾ በሳራ እስፈተ ባወዬ?11 19ታኒ አይ ጋናዉ ኮያዳ ጋይና? ኤቃስ ያርሸትዳ ካይ ዎይኮ ኤቃይ ፓያባ ጉሰዬ? 20ግደና፥ ኤንቲ ያርሸይ ፆሳስ ግዶናሽን፥ ቱና አያናታሳ። ሄሳ ግሾ፥ ህንተዉ ቱና አያናታራ እስፈተ ዳና መላ ኮይከ።12 21ህንተ ጎዳ ፁአፐ ኡይሸ፥ ቃስ ቱና አያናታ ፁአፐ ኡያናዉ ዳንዳኤከታ። ጎዳ ጋይታፐ ምሸ ቃስ ቱና አያናታ ጋይታፐ ማናዉ ዳንዳኤከታ። 22ኑኒ ሄሳ ኦድ ጎዳ ይሎይኖ? ኑኒ እያፐ አያ ምኖዬ?13

23ህንተ፥ “ኡባባ ኦና መላ ድግያባይ ባዋ” ጌታ፥ ሽን ኡባይ ማደና። ህንተ፥ “ኡባባ ኦና መላ ድግያባይ ባዋ” ጌታ፥ ሽን ኡባይ ድቸና።14 24እስ እስ አስ፥ ሀራ አስ ማድያባ ቆፓናዉ በሴስፐ አትሽን፥ ባና ማድያባ ፃላላ ቆፖፎ።

25ህንተ ካሀ ስን ገልስያ ኦይሻ ደንና ግያን ባይዘትያ አሹዋ ጮ ሚተ። 26አይስ ጊኮ፥ ሳእነ ሳአን ደእያ ኡባይ ጎዳባ።15

27እስ አማኖና አስ ህንተና እማታናዉ ኮይድ ፄግኮ ባናዉ ኮይኮ ቢተ። ህንተ ካሀን መትያ ኦይሻን ስና ህንተ ስን አያባ ኡባ ሚተ። 28ሽን እስ አስ፥ “ሀይስ ኤቃስ ያርሸትዳባ” ጊኮ፥ ሄ ህንተዉ ኦድዳ አድያ ግሾነ ካሀ ግሾ ሄ ካ ሞፕተ። 29ታኒ፥ ካሀ ግሾ ገይ፥ ሄ ህንተዉ ኦድዳ ኡራ ካሀ ጉሱፈ አትሽን፥ ህንተ ካሀ ግደና።

ሀራ አሳ ካሀ ግሾ ጋዳ ታኒ ታ ላአተ ቦላ አይስ ፕርዶ? 30ታኒ ምያ ካ ፆሳ ጋላታዳ ሚኮ ባልዳዳ አይስ ቦረትያና?

31ህዛ፥ ህንተ አይ ሚኮ አይ ኡይኮ፥ ዎይኮ አይ ኦኮካ ኡባባ ፆሳ ቦንቾስ ኦተ። 32አይሁደታ ግድን ግርከታ ግድን ዎይኮ ፆሳ ዎሳ ኬ ግድን ኦደስካ በ ግዶፕተ። 33ታኒ ኡባ ዎደ ዳሮታ አሻናዉ ኤንቲ ማደትያ ኦገ ኮያይስፐ አትሽን ታና ማድያ ኦገ ኮይከ።