1 ታርከ 28

ፆሳ ኬ ሀልቹዋ

1እስራኤለ ሀላቃት ኡባይ የሩሳላመን ሺቃና መላ ካዎይ ዳዊቲ ኪትስ። ሄሳ ግሾ፥ እስ እስ ኮቻ ሀላቃት፥ ካዎ ሞርናት፥ ሻላቃት፥ ማቶ ሀላቃት፥ ካዋስነ ካዋ ናይታስ ደእያ ሻሉዋነ መህያ አይሰይሳት፥ ካዎ ጋን ኦይሳት፥ ኤረትዳነ ምኖ አሳት ኡባይ የሩሳላመን ሺቅዶሶና።

2ካዎይ ዳዊቲ ደንድ ኤቅድ ሀይሳዳ ያግስ፤ “ታ እሻቶ፥ ታ አሳዉ፥ ስእተ! ጎዳ ጫቆ ታቦትያ ዎያነ ኑ ፆሳ ቶሆይ ሸምፕያ ኬ ኬፃናዉ ታ ዎዛናን ቆፓስ፤ ኮሽያባ ኡባ ጊግሳስ። 3ሽን ፆሳይ፥ ‘ኔኒ ኦላንቾነ ሱ ጉስዳ አስ ግድያ ግሾ ታ ሱንስ ኬ ኬፃካ’ ያግስ። 4ታኒ እስራኤለ ቦላ መርናዉ ካዎታናዳ፥ ጎዳይ እስራኤለ ፆሳይ ታ አዋ ሶፐ ታና ዶርስ። ካለናዳ ኮይሮ ይሁዳ ኮቻ ዶርስ፤ ይሁዳ ኮቻፈ ታ አዋ ሶ አሳ ዶርስ፤ ታ አዋ ናይታ ግዶፈ ታና ዶርድ እስራኤለ ኡባ ቦላ ካዎያናዉ ዶስስ። 5ጎዳይ ታዉ ዳሮ ናይታ እሚስ፤ ታ ናይታ ኡባፈ ጎዳ ካዎተ አራታን ኡትድ እስራኤለ ቦላ ካዎታናዳ ታ ናኣ ሶሎሞነ ዶርስ።

6“ጎዳይ፥ ‘ታ ኬነ ታ ዳባባ ኬፃናይ ነ ናኣ ሶሎሞነ። እ ታዉ ናአ ግዳና መላ ታኒ እያ ዶራስ፤ ታኒ እያዉ አዋ ግዳና። 7እ ሀእ ኦይሳዳ ታ ኪታነ ታ ህግያ ምንድ ናግኮ ታኒ እያ ካዎተ መርናዉ ምንና’ ያግስ። 8ህዛ ጎዳ ሺቆ ግድዳ እስራኤለ አሳ ኡባይ በእሽን፥ ኑ ፆሳይ ስእሽን፥ ጎዳ ህንተ ፆሳ ኪታ ኡባ ህንተ ምንድ ናጋና መላ ታኒ ህንተዉ ኦዳይስ። ያትኮ፥ ህንተ ሀ ሎኦ ቢታ ላታና፤ ህንተ ናይታካ መርናዉ ላትሳና።

9“ሶሎሞነ፥ ታ ናአዉ፥ ፆሳይ አሳ ዎዛናነ ቆፋ ኡባ ኤርያ ግሾ ነ አዋ ፆሳ ኤራ፤ ኩመ ዎዛናንነ ሸነን እያዉ ኦ። ኔኒ እያ ኮይኮ እ ነዉ በንታና፤ ሽን ኔኒ እያ አግኮ እ ነና መርናዉ አጋና። 10ፆሳ ኬ ኬፃና መላ ጎዳይ ነና ዶርዳይሳ ዶጎፓ፤ ኦሶ ኡባ ምናዳ ኦ” ያግስ።

11ሄሳፈ ጉየ፥ ዳዊቲ ባ ናኣ ሶሎሞነስ ፆሳ ኬ፥ ባራንዳ፥ ቡቁራ ምንጅያ ኬ፥ ፖቅያነ ግዶ ክፍለታ፥ ሄሳዳካ ናጋራ አቶተ ካማ ዎያ ክፍልያ ሀልቹዋነ ቆፋ እሚስ። 12ዳዊቲ ጎዳ ኬ ዳባባ ኬፃናዉ ባ ዎዛናን ደእያ ቆፋ፥ እያ ዩሹዋን ደእያ ኡባ ክፍለታ ሀልቹዋነ ፆሳ ኬ ቡቁራ ዎያ ክፍልያነ ጎዳስ ዱማትዳ እሞታታ ዎያ ክፍለታ ኦሱዋ ቆፋ እሚስ።

13ሄሳዳካ ዳዊቲ ካህነታነ ሌወታ ኦሶ ማራ፥ ፆሳ ኬ ኦሶ ማራነ ፆሳ ኬ ሚሸታ ናግያ ማራ ኦድያ ቆፋ እያዉ እሚስ።

14ዱማ ዱማ ኦሶስ ጎኤትያ ሚሸታ ኦናዉ ማድያ ዎርቃነ ብራ ምዛነን ልክስድ ሶሎሞነስ እሚስ። 15ሄስካ ፆምፐ ዎያ ዎርቃ ኮጫታነ እያ ፆምፐታ፥ ፆምፐ ዎያ ብራ ኮጫታነ እያ ፆምፐታ፥ 16ጎዳ ስንን ኡይ ዎያ ዎርቃ ፃርጴዛታ፥ ብራ ፃርጴዛታ፥ 17ዎርቃ ቃጰታ፥ ዎርቃ ከረታ፥ ዎርቃ ዋንጫታ፥ ዎርቃ ፃሮታ፥ ብራ ፃሮታ 18እፃነ ጩይስያ ጌሻ ዎርቃ ሳፅነ፥ ጎዳ ጫቆ ታቦትያ ቦላ ባንታ ቀፍያ ምጭድ ካምያ ክሩበታ ዎያ ዎርቃ ጋርያ ጊግስያ ሀልቹዋ እያዉ እሚስ። 19ዳዊቲ፥ “ጎዳይ ባ ኩሽያ ታ ቦላ ዎድ ሀ ፃፈትዳ ቆፋ ኡባ ታና ኤርስስ” ያግስ።

20ዳዊቲ ባ ናኣ ሶሎሞነኮ፥ “ህዛ ምና! ኦሱዋ ኦ! ጎዳይ ታ ፆሳይ ኔራ ደእያ ግሾ ያዮፋ፤ ዳጋሞፋ! ፆሳ ኬ ኦሶይ ፖለታና ጋካናዉ ፆሳይ ነና የገናነ አገና። 21ፆሳ ኬን ደእያ ኦሶ ኡባስ ካህነትነ ሌወት ሹመትዶሶና። ኩሸ ሂል ደእያ አሳ ኡባይ ነና ኦሶ ኡባን ማዳና። ሀላቃትነ አሳ ኡባይ ነዉ ኪተታና” ያግስ።