Gofa New Testament
Qolaasiyasa 4
Godato, hinttewuka qassi salon Goday de7eyssa eridi, hintte aylletas xillotethaninne issuwa issuwafe shaakkonna koshshiyabaa oothite.1
Xoossaa barkkidi galatishe qanxonna woossite. Xoossay ba qaalas pengge dooyana melanne taani hessa gaason qashon de7iya Kiristtoosa xuuraa awaajjana mela nuuskka woossite. Qassi takka besseyssada qaala qonccisada odana mela taw Xoossaa woossite.
Injjetiya wode ubbaa go7ettishe ammanonna asaa matan cinccatethan de7ite.2 Hintte asa ubbaas koshshiya zaaro imo erana mela hintte oday ubba wode aadho keehatethan kumidayssanne maxineda mal7iyabaa gidanaw bessees.
Wurssetha sarotaa
Nu siiqo ishay Tikiqoosi, taara issife Godaa oosuwan aylle gidida, ammanettiya oosanchchoy, ta de7uwabaa hinttew odana.34 Taani iya hintteko kiittiday, nu waanidi de7iyakko hinttew odidi hinttena minthethana melassa. Anasmoosi, ammanettiya siiqo ishay, hintte baggay, iyara hintteko bees. Entti hayssan haniyaba ubbaa hinttew odana.5
Taara qashettida Arisxirokoosinne Barnnabaasa ishaa na7ay Marqqoosi, hinttena saro yaagosona. Ta hinttew kase odidayssada Marqqoosi hintteko biikko iya mokkite.6 Yesuusa giya Yasxxoosi hinttena saro saro yaagees. Xoossaa kawotethaa gisho taara oothiya asata giddofe Ayhude gididayssati ha heedzata; entti tana daro minthethidosona.
Hintte baggay, Kiristtoos Yesuusa aylley, Ephphaafiri hinttena saro saro yaagees. I hintte Xoossaa sinthan minnidi eqqanaadanne Xoossaa sheniya eridi polana mela ubba wode Xoossaa hintte gisho woossees.7 I hintte gishonne Loodoqiyaninne Hirapoolisa kataman de7iya asaa gisho daro daaburidayssa ta markkattays.
Nu siiqo ishay dottorey Luuqaasinne Deemasi, hinttena saro saro yaagosona.8 Loodoqiyan de7iya nu ishatas, Nimfaasinne I keethan shiiqiya asaas nu sarothuwa odite.
Ha dabddaabbiya hintte nabbabidaappe guye, Loodoqiya woosa keethan nabbabisite. Hintteka Loodoqiya woosa keethay hinttew yeddiya dabddaabbiya nabbabite. Qassi Arkkiphphaasa, “Goday new immida oosuwa polanayssa dogoppa” yaagidi qofisite.9
Taani, Phawuloosi, ha sarothuwa ta kushen xaafas. Ta qashuwa qoppite.
Xoossaa aadho keehatethay hinttera gido.
Source notes (9)
- Cross-reference Efe 6:9
- Cross-reference Efe 5:16
- Cross-reference Ha@O 20:4; 2Ximo 4:12
- Cross-reference Efe 6:21-22
- Cross-reference Filmo 10-12
- Cross-reference Ha@O 19:29; 27:2; Filmo 24; Ha@O 12:12, 25; 13:13; 15:37-39
- Cross-reference Qola 1:7; Filmo 23
- Cross-reference 2Ximo 4:10-11; Filmo 24
- Cross-reference Filmo 2
Gofa New Testament. Copyright © 2011-2013 The Word for the World International. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.