Gofa New Testament
2Qoronttoosa 6
Nuuni Xoossaara issife oothiya asi gideyssada, hintte ekkida aadho keehatethaa hada oothonna mela nu hinttena woossos. Xoossay,
“Ta nena si7ana woden si7as;
atotetha gallasan nena maaddas” yaagees. Hekko, ta si7iya wodey ha77i; atotetha gallasay hachchi.1
Oonikka nu oosuwa borana melanne nunan dhubettana mela koyokko. Gidoshin, nu tuma Xoossaa oosanchchota gideyssa nu oothiya ubbaban bessida. Daro genccan, waayen, meton, un77an, garaafetethan, qashon, ixon kumida wocaman, daaburan, dhiskko dhayon, xooman,2 geeshshatethan, eratethan, dandda7an, keehatethan, Geeshsha Ayyaanan, tuma siiqon, tumaa haasayaninne Xoossaa wolqqan nuuni iya oosanchchota gideyssa bessida. Qassi xillotethay nuus tooranne gonddalle. Nuuni bonchchettidanne tooshettida; cayettidanne galatettida. Tumaa haasayos, shin asay nuna worddanchcho gidosona. Nu asan erettida asi, shin erettonna asa mela gidida. Hayqqidosona yaagettida, shin paxa de7oos; shocettida, shin hayqqibookko. Nuuni azzanikkoka ubba wode ufayttoos. Nu manqo daanos, shin daro asaa dureyoos. Qassi aykkoyka baynna asi daanos, shin ubbay nubaa.
Qoronttoosa asato, nu hinttew qonccen odida; nu uluwaa hinttena bessida. Hintte nuna hintte siiquwa bessonna diggidetappe attin nu nu siiquwa hinttena diggibookko. Aawu ba naytas odeyssada ta hinttew odays; nu hinttena nu uluwaa bessidayssada, hintteka hintte uluwaa nuna bessite.
Ammanonna asaara de7iya issifetethaa aggo
Ammanonna asaara bessonna ogen waaxettofite. Xillotethasinne nagaras aybi gaytethi de7ii? Poo7osinne dhumas aybi issifetethi de7ii? Kiristtoosanne Xalahe issife gathiyabay aybe? Qassi ammaneysinne ammanonnayssi issife koxiyabay aybe? Xoossaa Keethas eeqatara aybi issifetethi de7ii? Xoossay,
“Taani entta giddon de7ana,
entta giddon hamuttana.
Taani entta Xoossaa gidana;
enttika ta ase gidana”
gidayssada, nuuni de7o Xoossaa keethi.3 Hessadakka, Goday,
“Entta giddofe shaakettidi keyite;
tuna gididabaa bochchofite;
ta hinttena ekkana.4
Ta hinttew aawa gidana;
hintte taw adde naytanne macca nayta gidana;
yaagees Ubbaafe Wolqqaama Goday” yaagis.5
Source notes (5)
- Cross-reference Isa 49:8
- Cross-reference Ha@O 16:23
- Cross-reference Leewe 26:12; Hiz 37:27; 1Qoro 3:16; 6:19
- Cross-reference Isa 52:11
- Cross-reference 2Saamu 7:14; 1Taari 17:13; Isa 43:6; Er 31:9
Gofa New Testament. Copyright © 2011-2013 The Word for the World International. Licensed under CC BY 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY 4.0 · SourceEdition imported 2026-10-25.