Tito 3

Go77iya Oosota

1Asay deriya haareysatas, aawatethay de7eysatas haaretanaw, kiitetanawunne lo77o ooso ubbaa oothanaw giigetidaysata gidana mela akeekisa. 2Qassi enti oodde bollaka iita odetonna mela, saro asi gidana mela, ashketanne asa ubbaas qadheteyisata gidana mela zora. 3Nuuni kase eeyata, kiitetonayisata, baletidaysata, dumma dumma asho ufaysasinne amos aylletidaysata. Nuuni iitatethaninne qanaaten kumidaysata; nu ase ixeyisata, asika nuna ixeyisata. 4Shin ashshiya Xoossaa keehatethaynne siiqoy qoncida wode, 5nu oothida xillo oosuwa gisho gidonashin, ba maarotethaa gisho nuna ashshis. Nuna I ashshiday, nam7antho yeletethaa meechaninne Geeshsha Ayyaana baggara immida ooratha de7uwana. 6He Ayyaana, Xoossay nuna ashshiya Yesuus Kiristoosa baggara nu bolla darsidi gussis. 7Ba aadho keehatetha baggara nuna xillisidi merinaa de7uwa laata ufaysaa oykana mela hessa oothis. 8Ha qaalay ammanetida qaala. Xoossaa ammaneysati lo77o ooso oothanaw giigidaysata gidana mela ne ha qaala minthada odana mela ta koyayis. Haysati ase ubbaas lo77onne go77eyisata. 9Shin eeyatetha palamape, kocha taybope, kachafenne higge gaason dendiya ooshshafe naageta. Hessi go77inne wodhey baynaba. 10Shaahetethi medhiya uraa koyro zora; nam7antho hanqeta, hessafe guye, iyape haaka. 11Hessa mela asi geellanne nagarancho; I ba bolla pirdeysa era.

Wursetha Zore

12Taani balgo yan shaacanaw qopida gisho, Arxemaasa woyko Tikiqoosa neeko kiittiya wode ne taako Niqophilyoona yaanaw minna.1 13Higge eriya Zeemasinne Aphiloosi oge biya wode entaw koshshiyabay paconna mela enta maadda. 14Nu asayka pathonna asi gididi attonna mela bantaw koshshiyaba demmana mela lo77o ooso oothanaw minnidi tamaaro.

15Taara de7iya ubbay nena saro goosona; ammanon nuna siiqiya asaa saro ga.

Xoossaa aadho keehatethay hinte ubbaara gido. Amin7i.