Geeshsha Maxaafa

Qon 8

Laapuntha Maatamey Dooyetis

Dorsay laapuntha maatamiya dooyida wode bagga saate gideysa mela saloy si77i gis.

Hessafe guye, taani laapun moyzeti imetida laapun kiitanchota Xoossaa sinthan eqidaysata be7as.

Ixaane cuyisiya worqa shaate oykida hara kiitanchoy yidi, yarsho bessa matan eqis. I araata sinthan de7iya worqa yarsho bessa bolla geeshshata ubbaa woosaara gujidi yarshana mela iyaw daro ixaaney imetis. Ixaaniya cuyay geeshshata woosaara issife kiitanchuwa kushepe pude Xoossaako keyis. Hessafe guye, kiitanchoy ixaane cuyisiya shaatiya ekidi, iyan yarsho bessaafe bonqo tama kunthidi sa7a duge holis. Yaatin deshoy, wol7anthi, girsinne biitta qaaxoy hanis.1

Laapun Moyzeta

Hessafe guye, laapun kiitanchoti banta moyziya punnanaw giigetidosona.

Koyro kiitanchoy ba moyziya punniya wode shachinne suuthara walaketida tami salope bukis. Sa7aape sikoy xuugetis; mithafe sikoy xuugetis; cil7o maata ubbay xuugetis.2

Nam7antho kiitanchoy ba moyziya punnida wode wolqaama zuma daaniyabay taman eexishe abban yegetis. Yaatin, abbaafe sikoy suuthu gidis. Abban de7on de7iya medhetethaafe sikoy hayqis; markabetape sikoy dhayis.

Heedzantho kiitanchoy ba moyziya punnida wode xompeda eexiya wolqaama xoolintoy shaafape sikuwa bollanne pultota bolla salope wodhis.3 He xoolintuwa sunthay Camo geetetees. Haathaafe sikuwa camisis; haathay cammida gisho, daro asay he haatha uyidi hayqidosona.4

Oyddantho kiitanchoy ba moyziya punnis. Awape, ageenapenne xoolintotape sikuwa dechis; enta poo7uwape sikoy dhumis. Gallasaape sikoy, qammaafeka sikoy dhumis.5

Issi arganthi salo dhoqu gidi, piradhishin be7as. He arganthay ba qaala dhoqu oothidi, “Attida heedzu kiitanchoti banta moyziya punnanaw de7iya gisho, sa7an de7iya asaa ayye! Ayye! Ayye!” yaagishin si7as.

Source notes (5)

Cross-reference Leewe 16:12; Hiz 10:2; Kessa 19:16; Qon 11:19; 16:18.
Cross-reference Kessa 9:23-25; Hiz 38:22.
Cross-reference Isa 14:12.
Cross-reference Ermi 9:15.
Cross-reference Isa 13:10; Hiz 32:7; Iyyu 2:10.

Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.