Mazmure 96

Xoossa Geeshshatethan Goyinnite

1Godaas ooratha mazmure yexite;

sa7an de7iya asa ubbay Godaas yexite.

2Godaas yexite; iya suntha sabbite;

Iya ashuwa gallas gallas odite.

3Kawotethata giddon iya bonchuwa,

asa ubbaa giddon iya malaalsiya oosuwa awaajite.

4Goday gita gidiya gisho iyaw gita galatii bessees;

xoossata ubbaafe aadhidi yayetanaw bessees.

5Hara kawotethata xoossati ubbay eeqata;

shin Goday salota medhida Xoossaa.

6Bonchoynne sabi iya yuushon de7ees;

minotethinne puulatethi iya keethan de7ees.

7Biittan de7iya asa zare ubbay Godaaba odite;

bonchoynne wolqi Godaaba giite.

8Iya sunthaas bessiya bonchuwa Godaas ehite;

Yarsho ekidi iya dabaaba gelite.

9Iya geeshshatetha teemuwan Godaa goyinnite;

biittan de7iya asaw ubbay iya sinthan kokorite.

10Kawotethata giddon, “Goday kawotis!

Sa7ay minnidi eqis; qaaxenna;

I asaa bolla suure pirdana” yaagite.

11Saloti ufayto; sa7ika hashshu go;

abbaynne iya giddon de7iya ubbay guummo.

12Goshshaynne iyan de7iya ubbay ufayto!

Woran de7iya mitha ubbay ufaysan yexo.

13Goday yaa gisho iya sinthan yexo;

I sa7a bolla pirdanaw yees.

I ha sa7aa bolla xillotethan,

asaa bolla tumatethan pirdana.