Mazmure 81

Shaqara Ba7aale Wode Yexiya Saba

Zammaareta halaqaas xaafetida Suusul7en yexetiya Asaafa Mazmure

1Nuus wolqa gidida Xoossaas ufaysan yexite;

Yayqooba Xoossaas ililite.

2Yethi doomite; karaabo baqite;

diithaninne maasinqon yexite.

3Ageeni xeeriya wode,

qassi dhuma uttiya wode,

ba7aale gallasan moyze punnite.

4Hessi Isra7eele biittan higge;

Yayqooba Xoossay immida woga.

5I Gibxe biitta shocida wode,

Yoosefa kochaas ha wogaa awaajis.

Eronna doonan haysada yaagishin si7as;

6“Hinte hashiya toohope,

hinte kushiya keeshepe shempisas.

7Hinte metuwan tana xeegideta; ta hintena ashshas;

taani dechiya shaara giddofe hintena allas;

Mariba pultuwa matan ta hintena paacas.” Salaha

8“Ta asaw, ta hintena seereysa si7ite;

Isra7eele asaw hinte tana si7iko aybee?

9Hinte giddon allaga xoossi de7opo;

hara xoosse goyinnofite.

10Gibxe biittafe hintena kessida,

taani Godaa hinte Xoossaa;

Ne doona loythada hakanka;

taani iyan kunthana.

11“Shin ta asay tana si7ibookona;

Isra7eeley taw kiitetibeenna.

12Hessa gisho, enti banta qofaa kaallana mela,

simmonna enta wozanaas aathada immas.

13Ta asay tana si7idaako aybe;

Isra7eeley ta ogiya kaallidaako aybi de7i;

14Taani enta morketa eeson xoonanashin;

enta ixeyisata bolla ta kushiya denthanashin.

15Godaa ixeysati iya sinthan hokana;

enta seeray merinaw gidana.

16Taani hintena lo77o giste muzana;

zaallafe keyiya eessan hintena kalsana.”