Mazmure 64

Iitatape Tana Ashsha

Zammaareta Halaqaas yexetida Dawita Mazmure.

1Abeeti Xoossaw, ta un7a woosa si7a;

ta morketa mandethafe; tana ashsha.

2Nagaranchota maqofenne

iitata duulataape tana gentha.

3Enti banta inxarsaa mashsha mela leefidosona;

iita qaalata donge toorada mallidi yeddoosona.

4Enti qosetidi xillo asi banta dongiyan qohoosona;

akeeki bayna dukoosona; yayyokona.

5Enti banta iita maquwas

issoy issuwa minthethoosona.

Banta xihiya wothana bessa koyoosona;

enti, “Nuna ooni be7anee?” yaagosona.

6Enti iitabaa maqetishe,

“Nuuni lo77o maqo maqetida” yaagosona;

Hessi asa wozana qofi ciimmo gideysa bessees.

7Shin Xoossay enta ba dongiyan dukana;

enti akeekona madunxana.

8Enta maquwa I enta bolla zaarana;

enta be7iya ubbay huuphe qaathana.

9He wode asa ubbay Xoossas yayyana;

iya oosuwa odananne zaari zaari qopana.

10Xilloti Godan ufayto;

iyako baqatidi atto;

wozana suureti ubbay iya galato.