Mazmure 56

Xoossa Bolla Zempa

Filisxeeme Asay Geete Kataman Dawita Oykida Wode Dawiti Zammaareta Halaqaas Xaafida Woosa.

“Haaho bessan wola bolla uttida hollees” geetetiya diitha cuudhethan yexetida woosa.

1Abeeti Xoossaw, asay tana un7ethiya gishonne

ubba wode ta morketi tana yedethiya gisho taw qadheta.

2Ta morketi kumetha gallas tana yedhoosona;

otoron tana oliya asay daro.

3Tana yashshiya wode

ta nenan ammanetayis.

4Taani Xoossan ammanetayis; yayyike;

iya qaala galatiya Xoossan ammanetayis;

asi tana ay oothanee?

5Kumetha gallasan ta morketi bala koyoosona;

tana qohanaw ubba wode tobboosona.

6Enti ta bolla maqetoosona;

tana qohanaw geeddosona.

Ta tango ubba kaalloosona;

tana wodhanaw koyoosona.

7Enti ay ogeraka kessi ekana mela oothofa;

ne hanquwan he kawotethata kawusha.

8Ta waayiya tayba;

ne ta afuthaa makadasa;

enti ne mazgabiyan de7okona?

9Ta nena xeegiya wode,

ta morketi guye simmana;

Xoossay ta bagga gideysa ta hessan erayis.

10Ta iya qaala galatiya Xoossan,

ta iya qaala galatiya Godan,

11ta he Xoossan ammanetayis; yayyike.

asi tana ay oothannee?

12Abeeti Xoossaw ta new qangidabay de7ees;

hessa galataa yarsho oothada ta new immana.

13De7on de7eyisata bolla poo7iya poo7uwan

Xoossaa sinthan simeretana mela,

ta shempuwa hayqope,

ta tohuwa dhubepe ashshadasa.