Geeshsha Maxaafa
Mazmure 53
Lo77o Oothiya Asi Baawa
Dawiti Zammaareta Halaqaas Xaafida Timirte
Akeekan xaafetida ginxo
Eeyati banta wozanan, “Xoossi baawa” yaagosona;
enta de7oy iitis; enti tunabaa oothosona;
lo77oba oothiya asi issoyka baawa.
Xoossaa koyiya cinca asi de7iyako be7anaw,
Goday salope asaa xeellees.
Enti ubbay Xoossaafe haakidosona;
ubbay issife tunidosona.
Lo77o oothiya asi deenna;
hari attoshin issi asika baawa.
Asi kathi meysada ta asaa meysati,
ha iita oothiya asati erokona?
enti Xoossaa xeegokona?
Enti dagammi eronna dagama dagammana;
Xoossay ba asaa morketa meqethaa laallana;
Xoossay enta kadhida gisho enti yeellatana.
Isra7eele atotethay Xiyoonepe yeerenne!
Xoossay ba asaa di7uwa zaariya wode,
Yayqooba zareti ufayto;
Isra7eele asay ufaysan hashshu go.
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.