Mazmure 48

Xiyooney Nu Xoossa Zuma

Qore Nayta Mazmure

1Goday gita; nu Xoossaa kataman

iya geeshsha zumaa bolla gita galati iyaw bessees.

2Biitta ubbaa ufaysi gidida,

pudeha baggara de7iya Xiyoone derey,

dhoqanne lo77o;

I gita kawa katama.

3Xoossay he gimbiya giddona;

ika iyaw geshe gideysa erisis.

4Kawoti banta tooranchotara shiiqidosona;

Xiyoone olanaw yidosona.

5Iya be7idi dagammidosona;

guye simmidi baqatidosona.

6Enti yan de7ishe yashshan kokoridosona;

iqethi oykida maccasada inxaxidosona.

7Doloha bagga wolqaama carkon

meqiya Tarsesa markabeta mela gididosona.

8Nu si7idaysada,

Ubbaafe Wolqaama Godaa kataman,

nu Xoossaa kataman I oothidaba be7ida;

Xoossay he katamaa merinaw minthidi naagees. Salaha

9Abeeti Xoossaw, ne keethan

merinaa ne siiquwa qopoos.

10Abeeti Xoossaw, ne sunthada

ne galatay sa7aa gaxaa gakis;

ne ushacha kushey xillotethan kumidaysa.

11Ne pirdaa gaason Xiyoone asay ufayto;

Yihuda kumethay ufaysan ililo.

12Xiyoone yuushuwan hemetite;

I dirsa yuuyite; I shakota taybite.

13Yaa yeletas odana mela

iya gimbiya akeekite; miixata wochite.

14Hinte, “Merinaw Xoossay nu Xoossaa;

I nuna hayqana gakanaw kaalethana” yaagidi odite.