Mazmure 42

Nam7antho Maxaafaa

(Maz 42—72)

Goodetiya Asa Woosa

Qore Nayta Timirte

Akeekan xaafida mazmure

1Gaari pulto haathi laamoteysada,

Xoossaw, ta shempiya nena laamotawusu.

2“Ta shempiya Xoossaa,

de7o Xoossaa be7anaw saamotawusu;

awude gakada iya som7uwa be7o” yaagawusu.

3Asay, “Ne Xoossay awun de7ii?”

giya wode,

gallasinne qammi taw afuthi kathi gidis.

4Taani enta ba7aale bonchanaw shiiqida, daro asaa kaalethada,

galata yethaninne ililisan xoossa keethi beysa qopiya wode,

ta wozanay azzanon meqees.

5Ta shempe, ayis azzanay?

ayis un7etay?

Ne Xoossan ufaysi wotha;

tana ashshiya, ta Xoossaa taani buroo galatana.

6Ta wozanay azzanis;

hessa gisho taani Yordaanose biittan,

Armoona dhoqan, Mizaare zuman,

eqada nena qopana.

7Ne soossuwa guunthan ciimmoy ciimmuwa xeegees;

ne beetaynne ne zuley ta bollara aadhis.

8Goday ba siiquwa gallas taw kiittees;

qamma galata yethay taara de7ees;

ta de7o Xoossaa woossana.

9Xoossaa, ta zaallako,

“Tana ayis dogadii?

Ta morketi tana un7ethin,

yeekashe ayis hemeto” yaagana.

10Ta morketi, “Ne Xoossay awun de7ii?”

yaagidi cayiya wode ta meqethay meqees.

11Ta shempe ayis azzanay?

ayis un7etay?

Xoossan ufaysi wotha;

tana ashshiya, ta Xoossaa ta buroo galatana.