Mazmure 34

Xoossay Keeha Gideysa Be7ite

Dawiti gooshshu daanidi shiiqida gisho, Abimeleke sinthafe goodetidi keyda wode yexida mazmure.

1Taani ubba wode Godaa galatana;

iya galatay ta doonape pacenna.

2Taani Godan ceeqetayis;

aadati hessa si7idi ufayto.

3Taara Godaa bonchite;

iya sunthaa issife dhoqu dhoqu oothoos.

4Taani Godaa koyin, I taw zaaris;

ta yayyiyaba ubbaafe tana ashshis.

5Iyako xeelliya ubbay poo7osona;

enta som7oy yeellatenna.

6Ha manqoy waassis;

Goday iya waasuwa si7is;

iya meto ubbaafe iya ashshis.

7Godaa kiitanchoy iyaw yayyeyisata naagees;

enta yuushon gididi enta ashshees.

8Goday keeha gideysa laacidi be7ite;

iyako baqatiya asi anjetidaysa.

9Hinteno, geeshsha asaw, Godaas yayyite;

iyaw yayyeysatas aykoyka pacenna.

10Gaammoti miyaba dhayidi koshatoosona;

shin Godaa koyeysatas lo77obay pacenna.

11Nayto, haa yiite; si7ite;

ta hintena Godaa yashshi tamaarsana.

12Lo77o de7o daanawunne

keehaba be7anaw adussa laythi daanaw,

amottey oonee?

13Ne inxarsay iitabaa odetonaada,

ne doonay cimmonnaada teqa.

14Iitape haaka; lo77oba ootha;

sarotethi koya; kaalla.

15Godaa ayfey xillota xeellees;

iya haythay enta waasuwa si7ees.

16Enta qofisiyaba biittafe dhaysanaw,

Goday iita ootheyisata ba hanqo ayfen xeellees.

17Xilloti waassoosona;

Goday enta waasuwa si7ees;

I enta meto ubbaafe ashshees.

18Wozani meqidaysatas Goday matana;

I ufaysi qanxidaysata ashshees.

19Xillo asas metoy daro;

shin Goday iya he ubbaafe ashshees.

20Goday iya meqethata naagiya gisho,

entafe issoyka meqenna.

21Iitata enta iitatethay wodhana;

xillota ixeysati pirdetana.

22Goday ba aylleta wozees;

iyako baqatiya oonika pirdetenna.