Mazmure 26

Xillo Asa Woosa

Dawita Mazmure

1Abeeti Godaw, ta suuretethan hemetida gishonne

sidhey bayna nenan ammanetida gisho,

taw pirda.

2Abeeti Godaw, tana paaca;

tana pilgada be7a;

ta wozanaa xomoosa.

3Ne siiqoy ta sinthan de7iya gisho,

ta ubba wode ne tuma ogiyan hemetayis.

4Cimmiya asaara ta uttike;

cubbota maabaran gelike.

5Iitata duulata ta ixayis;

makallachotara issife uttike.

6Abeeti Godaw, ta xillotethaa bessanaw

ta kushiya meeccayis;

ne yarsho bessa yuuyayis.

7Galata mazmure yexashe

ne malaalsiya ooso ubba odana.

8Abeeti Godaw, ne keethaanne,

ne bonchoy aqiya bessaa ta dosayis.

9Tana nagaranchotara issife pittofa;

asa suuthu gusseysatara ta shempuwa dhaysofa.

10Enta kushen iita halchoy de7ees;

enta ushacha kushen wodhaafey kumis.

11Shin ta suuretethan hemetana;

tana woza; taw qadheta.

12Ta tohoy demba bessan eqis;

gita shiiquwan Godaa galatana.