Mazmure 24

Boncho Kawa

Dawita Mazmure

1Sa7aynne sa7an de7iya ubbay Godaaba;

alameynne iyan de7iya asa ubbay iyassa.

2I sa7aa gita abba bolla hiixis;

ciimmo haatha bolla minthidi essis.

3Godaa zuma bolla keyanaw danda7ey oonee?

Iya geeshsha bessan eqanay oonee?

4Iya kusheynne iya wozanay geeshshi gididaysa;

eeqa goyinnonnaysa,

wordo caaqonnaysa.

5I Godaape anjo ekana;

ashshiya Xoossaafe xillo pirdaa demmana.

6Xoossaako xeelliya asinne

Yayqooba Xoossaa som7uwa

koyiya asi hessa mela ase. Salaha

7Boncho kawoy gelana mela,

hinteno pengeto dooyetite;

beni pengeti iya ufaysan mokite.

8He boncho kawoy oonee?

Minonne wolqaama gidida Godaa;

olan wolqaama gidida Godaa.

9Boncho kawoy gelana mela,

hinteno pengeto dooyetite;

beni pengeti iya ufaysan mokite.

10Ha boncho kawoy oonee?

Ha boncho kawoy salo medhetethata Godaa! Salaha.