Mazmure 20

Xoossan Ammaneta

Zammaareta Halaqaas Xaafetida Dawita Mazmure.

1Meto wode Goday nena si7o;

Yayqooba Xoossaa sunthay nena naago.

2Ba keethaafe new maado kiitto;

Xiyoonepe nena katiso.

3I ne yarsho ubbaa hassayo;

ne xuussa yarshuwan ufayto. Salaha

4Ne wozanaa amuwa new immo;

ne qofaa ubbaa polo.

5Ne xoonuwan nuna ufayso;

nu Xoossa sunthan nu bandira dhoqu oothana;

ne woosa ubbaa Goday new zaaro.

6Goday ba doorida kawas,

xoono immidaysa taani buroo erayis.

I ba geeshsha saluwan si7ana;

ba ushacha kushen gita xoono iyaw immana.

7Issoti issoti banta ola para gaariyan,

harati banta paran ceeqetoosona;

shin nuuni Godaa nu Xoossaa wolqan ceeqetoos.

8Enti dhubetidi kundana;

shin nuuni dendidi minni eqana.

9Abeeti Godaw, kawas xoono imma;

nuuni nena xeegiya wode si7a.