Mazmure 18

Xoono Mazmure

Zammaareta Halaqaas Xaafetida Dawita Mazmure

Goday iya morketapenne Saa7ola kushepe ashshida wode Dawiti Godaas yexida mazmure.

1Abeeti Godaw, ta wolqaw,

taani nena dosayis.

2Goday ta zaalla; ta miixa; tana ashsheysa;

ta Xoossay ta iyako baqatiya ta zaalla.

I taw gondalle; tana ashshiya wolqa;

taani qosetada attiya besse.

3Galata bessiya Godaa ta xeegayis;

ta morketape taani attana.

4Hayqo wodoroy tana cuullis;

dhayo di7oy tana daganthis.

5Duufo wodoroy ta bolla xaaxetis;

hayqo xihey tana oykis.

6Ta un7an Godaa xeegas;

tana maaddana mela ta Xoossaako waassas.

Ba keethan gididi ta girsaa si7is;

ta waasoy iya haythan wodhis.

7Xoossay hanqetida gisho,

biittay qaaxis;

dereta xaphoy kokoris.

8Iya siidhiyape hanqo cuyay keyis;

iya doonape miya tama lacoy keyis;

I xuuggiya bonqo cuttis.

9Saluwa phalqidi wodhis;

iya tohuwape garsan dhuma shaari de7ees.

10Kiruubeta bolla uttidi paallis;

carko qefen pude dendis.

11Bana dhuman kammis;

iya dunkaaney iran kumida shaara.

12Iya sinthan de7iya gita poo7uwape

shachinne tama lacoy keyidi

dhuma shaara kanthidi bis.

13Goday dadada salope guummis;

Ubbaafe Dhoqa Xoossay ba girsaa sissis;

wol7anthaninne tama lacon qoncis.

14Ba dongiya dukidi ba morketa laallis;

wol7antha poo7o kiittidi enta yedethis.

15Abeeti Godaw, neeni seerida wode,

shenetada peenuqida wode,

Abbay zin7ida biittay bentis;

sa7a baasoy qoncis.

16Goday bollafe kushiya yeddidi tana oykis;

ciimmo haathaafe tana dafidi kessis.

17Ta bolla daro wolqaamida

ta morketapenne

tana ixeysatape ashshis.

18Ta metootida wode enti ta bolla dendidosona;

shin Goday tana katisis.

19I tana dalga bessi kessis;

tanan ufaytida gisho tana ashshis.

20Ta xillotethaada Goday taw qanxis;

ta kushe geeshshatethaada I taw zaaris.

21Taani Godaa ogiya kaallas;

ta Xoossaa aggada kare keyabike.

22Taani iya higgiya ubbaa naagas;

iya kiitaa polo aggabike.

23Taani iya sinthan suure de7as;

tana nagarape naagas.

24Goday ta xillotethaadanne

ta kushe geeshshatethaada taw zaaris.

25Ammaneteysatas ne ammanetaasa;

suuretas ne suure.

26Geeshshatas ne geeshshi;

shin geellatas ne geella.

27Ashketa ashshaasa;

shin otoranchota kawushaasa.

28Abeeti Godaw, ne taw xompaasa;

ta Xoossay ta dhumaa poo7isaasa.

29Ne maaduwan ta morke toora bolla dendayis;

ta Xoossan miixaa xeerara gupada aadhayis.

30Xoossaa ogey polo;

Godaa qaalay geeshshi;

iyako baqatiya ubbaas I gondalle.

31Godaape attishin, hara xoossi oonee?

nu Xoossaafe attishin, hara zaalli oonee?

32Taw wolqa immeynne

ta ogiya saro oothey Xoossaa.

33I ta tohuwa gen7e tohoda minthees;

dhoqa bessan hirgi bayna essees.

34Ta kushiya ola tamaarsees;

naase birata dongiya dukana mela

ta qessiya minthees.

35Tana ashshiya ne gondalliya taw immadasa;

ne ushacha kushey tana zempisees;

ne lo77o oykethay tana gitayees.

36Ta hemetiya bessaa dalgisadasa;

ta tohuwa harchuchi ekibeenna.

37Ta morketa yedethada oykas;

enta dhaysona guye simmike.

38Enti zaari dendonnaada shocas;

enti ta tohuwa garsan kundidosona.

39Olas tana dancisadasa;

taara gaaddeteyisata taw gulbatisadasa.

40Ta morketa ta sinthafe guye zaaradasa;

tana ixeyisata dhaysas.

41Maade koyidi waassidosona,

shin oonika enta ashshibeenna.

Godaa enti xeegidosona,

shin I entaw koybeenna.

42Carkoy pitidi efiya baanada enta liiqisas;

oge urqada enta yedhas.

43Gene asape tana ashshadasa;

tana kawotethata bolla shuumadasa;

ta eronna asay taw haaretidosona.

44Enti tabaa si7idi taw kiitetoosona;

allaga derey ta sinthan ziggees.

45Enti kaha dhayidosona;

banta miixape kokorishe yoosona.

46Goday de7ees!

Xoossay, ta zaallay galatetto!

Tana ashshiya Xoossay dhoqu dhoqu go!

47I taw halo kessiya Xoossaa;

kawotethata ta garsan haariseysa.

48Ta morketape tana ashsheysa;

tana ixeyisata bolla dhoqu dhoqu oothaasa;

iitatape tana ashshaasa.

49Hessa gisho, Godaw

kawotethata giddon taani nena galatana;

ne sunthaa sabbana.

50I ba kawas xoono immees;

ba tiyidaysas, Dawitasinne iya kochaas,

ba keehatetha bessees.