Mazmure 16:11

Xoossay Ta Laata

Dawita Woosa.

1Abeeti Xoossaw,

ta neeko baqatiya gisho tana naaga.

2Taani Xoossaa, “Neeni ta Godaa;

neepe attishin, hari lo77obay taw baawa” yaagas.

3Sa7an de7iya geeshshati

ay mela bonchetidonaa!

Ta entara issife ufaytayis.

4Hara xoossata kaalleysati

banta bolla meto darsoosona.

Shin taani hara xoossatas suuthi yarshike;

taani enta sunthaa xeegike.

5Ta Godaw ta laatay nena;

taw koshshiya ubbaa taw immaasa;

ta de7uwa saamay nena.

6Tana gakida saamay ay mela lo77o!

Ee ta laatay tuma lo77o!

7Tana zorida Godaa galatayis;

qamma ta wozanay tana tamaarsees.

8Taani ubba wode Godaa ta sinthan be7ayis;

I ta ushachan de7iya gisho dagammike.

9Hessa gisho, ta wozanay ufaytees;

ta inxarsay galatees;

ta asatethay hirgi bayna de7ees.

10Ta shempiw si7oolen aggaka;

ne Geeshshaa wooqana mela oothaka.

11Tana de7o ogiya bessaasa;

ne sinthan kumetha ufaysi de7ees;

ne ushachan merinaa injey de7ees.