Mazmure 135

Xoossa Sunthay Merinaw Eretees

1Godaa galatite!

Hinteno, Godaa aylleto,

Godaa sunthaa galatite!

2Hinteno, Godaa keethan,

nu Xoossa keethaa dabaaban eqeysato,

Godaa galatite!

3I keeha gidiya gisho Godaa galatite!

I lo77o gidiya gisho iya sunthaa sabbite!

4Goday Yayqooba babaa,

Isra7eele baw buzo oothidi dooris.

5Goday gita gideysanne

nu Goday, xoossata ubbaafe aadheysa

taani erayis.

6Salon sa7an, abbaninne iya giddon

Goday ba dosidaba ubbaa oothees.

7Shaara sa7aa gaxape denthees;

wol7anthi irara kiittees;

carko ba minja keethaafe kessees.

8Gibxe biittan asape mehe gakanaw,

bayra yeletida ubbaa wodhis.

9Neno Gibxe,

Paaronanne iya aylleta ubbaa seeranaw

malaatatanne malaalsiyabata kiittis.

10I daro kawotethata dhaysis;

wolqaama kawota wodhis.

11Amoore kawa Sihoona

Baasane kawa Oogenne

Kanaane kawota ubbaa wodhis.

12Enta biitta ba asaa,

Isra7eele laatisis.

13Godaw, ne sunthay merinaw daana;

yeletaape yeleta gakanaw ne hassayetana.

14Goday ba asaas pirdana;

I ba aylletas qadhetana.

15Kawotethata eeqati asa kushe oosota;

birapenne worqafe medhetidaysata.

16Entaw dooni de7ees, shin haasayokona;

ayfey de7ees, shin xeellokona.

17Haythi de7ees, shin si7okona;

enta siidhen shempoy baawa.

18Enta medhidaysatinne

entan ammaneteysati

ubbay entada hano.

19Isra7eele asaw Godaa galatite;

Aarona soo asaw Godaa galatite.

20Leewe soo asaw Godaa galatite;

Godaa yayyeysato ubbay Godaa galatite.

21Yerusalaamen de7iya Goday

Xiyoonen galatetto!

Godaa galatite!