Mazmure 118

Iya Siiqoy Merinaasa

1Goday keeha gidiya gisho galatite;

iya siiqoy merinaasa.

2Isra7eele asay,

“Iya siiqoy merinaasa” yaago.

3Aarona keetha asay,

“Iya siiqoy merinaasa” yaago.

4Godaas yayiya ubbay,

“Iya siiqoy merinaasa” yaago.

5Ta un7etida wode Godaako waassas;

I ta waasuwa si7idi tana la77a kessis.

6Goday taara de7iya gisho ta yayyike;

asi tana ay oothanee?

7Goday tana maaddanaw taara de7ees;

ta morketa xoonetethaa ta be7ana.

8Asan ammanetanape

Godan geemmidi atteysi lo77o.

9Gita asan ammanetanape

Godan geemmidi atteysi lo77o.

10Kawotethati ubbay tana teqidi oykidosona;

shin Godaa sunthan ta enta xoonas.

11Enti ta yuushuwa teqidosona;

shin Godaa sunthan ta enta xoonas.

12Enti ta yuushuwa mathada teqidosona;

Shin buurey taman eexeysada eexidi dhayidosona;

Godaa sunthan ta enta dhaysas.

13Taani sugetada kundanaw gakas;

shin Goday tana maaddis.

14Goday ta minotethaanne yethaa;

I tana ashsheysa gidis.

15Xillota dunkaaniyan ola xoonidi,

simmiya asaa ufaysas giyaba si7ite;

Godaa ushacha kushey gitaba oothis.

16Godaa ushacha kushey xoono immis;

Godaa ushacha kushey gitaba oothis.

17Taani hayqike; de7on daana;

Goday oothidaba awaajana.

18Goday tana iita seera seeris;

shin hayqos aathidi immibeenna.

19Taani gido gelada Godaa galatana mela,

xillotetha pengeta taw dooyite.

20Haysi Godaa penge;

xilloti iyara geloosona.

21Godaw, ne tana si7ida gishonne

taw xoono immida gisho ta nena galatayis.

22Gimbeysati kadhidi yeggida shuchay,

godaa xaphuwa minthiya shuchu gidis.

23Haysi Godaa ooso;

nu ayfiyas malaalsiyaba.

24Haysi gallasay Goday oothida gallas;

ane nuuni iyan ufaytoosinne ililoos.

25Godaw, ha77i nuna ashsha;

Godaw, ha77i nuus injeya.

26Godaa sunthan yaa asi anjetidaysa gido;

nuuni Xoossa keethaafe hintena anjoos.

27Goday Xoossaa; I nu bolla poo7isis;

yarsho bessan de7iya kaciyako keyite;

irxa tashe oykidi ba7aale bonchite.

28Neeni ta Xoossaa; ta nena galatana;

neeni ta Xoossaa; ta nena sabbana.

29Goday keeha gidiya gisho iya galatite;

iya siiqoy merinaasa.