Mazmure 115

Nu Xoossay Dumma

1Abeeti Godaw, nu gisho gidonashin,

ne siiquwanne ne ammanetetha gisho,

ne sunthaa boncha.

2Ayis kawotethati,

“Enta Xoossay awunee?” yaaganee?

3Nu Xoossay salon de7ees;

ba dosidaba ubbaa oothees.

4Shin enta eeqati ase kushen oosetidosona;

enti birapenne worqafe medhetidosona.

5Entaw dooni de7ees, shin haasayokona;

ayfey de7ees, shin xeellokona.

6Entaw haythi de7ees, shin si7okona;

siidhey de7ees, shin singokona.

7Entaw kushey de7ees, shin bochi erokona;

tohoy de7ees, shin hemetokona;

enta siixinathara kooshinchi keyenna.

8Enta medheysatinne

enta ammaneteysati enta mela gido.

9Isra7eele asaw, Godan ammanetite;

hintena maaddeynne hinte gondalley iya.

10Aarona keetha asaw, Godan ammanetite;

hintena maaddeynne hinte gondalley iya.

11Godaas yayyeysato, Godan ammanetite;

hintena maaddeynne hinte gondalley iya.

12Goday nuna qopees; I nuna anjana;

I Isra7eele asaa anjana;

I Aarona keetha asaa anjana.

13Godaas yayyeyisata,

guuthaa gita anjana.

14Goday hintena darso;

hintenanne hinte nayta anjo.

15Saluwanne sa7aa medhida

Goday hintena anjo.

16Saloy Xoossaba;

shin sa7a asas immis.

17Hayqidaysati Godaa galatokonna;

duufon zin7idaysati iya sabbokona.

18Shin nuuni, de7on de7eysati,

hachife merinaa gakanaw,

Godaa galatoos.

Godaa galatite.