Iyyoba 7

1Asa de7oy sa7a bolla wolqaama baaxe gidenneyee?

Iya laythay une oothiya asa de7o mela gidenneyee?

2Wulliya awa amotiya gaacha mela,

woyko ba damooziya ekanaw naagiya oosanchoda,

3hessada taw mela ageenati

meto qammati imetidosona.

4Taani zin7iya wode awude barkandinasha gayis;

Shin qammay taw aduqees;

sa7i wontana gakanaw hiixan shireta shireta wodhayis.

5Ta asatethay guxuntis;

ta madunthay giishshi goggees.

6Ta laythay dorze mooqepe aadhidi ellesees;

ufaysi baynashin ta laythay wurees.

7Abeeti Xoossaw, ta laythay issi shempo mela gideysa qopa!

Ta ayfey zaaridi keehaba be7enna.

8Ha77i be7ey zaaridi be7enna;

tana koyana shin zaari demmenna.

9Shaari laaletidi dhayeysada,

duufo wodhiya asi simmidi keyenna.

10Ba soo simmidi yeenna;

iya eriya asayka dogees.

11“Hessa gisho, ta si77i giike;

ta ayyaana un7etetha odana;

ta shempuwa cametethaa gisho zuuzumana.

12Hessa mela neeni tana ayis naagay?

Ta new abba woyko abban de7iya iita do7a gadiyee?

13‘Ta hiixay tana minthethana;

ta arsay tana zuuzunthafe shempisana!’ gada qopas;

14Shin neeni tana amuhon yashisaasa;

qoncethan tana daganthaasa.

15Taani ha waayey kumida asatethaa tookada daanape,

suletada hayqiyako dosayis.

16Taani ta de7uwa shaatettas; daanaw koyke;

ta laythay issi shempo mela gidiya gisho tana aggarki.

17Ne iya gitayada xeellanaw asi aybee?

Ne iyaw qopanaw asi aybee?

18Wonta wonta ne iya xomoosasa;

woden woden ne iya paacasa.

19Ne ta bolla ayfe wotheysa aggikii?

Cuchu mittiya wode taw immikii?

20Abeeti ase kaalleyso,

ta nagaraa oothin nena ay qohidee?

Ne ayis tana cadda oykay?

New ta tooho gidadinaayee?

21Ta naaquwa ayis aggikii?

Ta nagara ayis atto giikii?

Ta duufo geliya wodey gakis;

ne tana koyana, shin hizape demmaka” yaagis.