Iyyoba 18

Baldadoosa Haasaya

1Hessafe guye, Shuuha biittafe yida Beldadoosi zaaridi,

2“Iyyoba, ne odaas wursethi baawee?

Ane akeeka; nu odiyaba si7a.

3Ne nuna ayis miizi oothay?

Ayis nuna tulle kessay?

4Ne hanqetada nena qohaasa;

Ne hanquwan biittay kallo attanee?

Woyko zaallay ba bessaafe qaaxennee?

5Nagaranchota xompey to7ana;

iya tama lacoy dhayana.

6Enta keethan de7iya xompey dhayana;

enta poo7oyka dhumana.

7I tangiya tangoy qaammees;

iya iita qofay iya zaaridi mees.

8Iya hemethay iya xihen gelsees;

iya tohoti gitetana.

9Xihey iya ginde oykana;

diizi iya qaaxo diggana.

10Yurde wodoroy sa7an iyaw geemmi uttees;

I hemetiya ogiyan gitey de7ees.

11Dagami iya teqidi oykees;

iya guyera kaallidi iya yedethees.

12Iya wolqaa koshi wursis;

dhayoy iya miyen naagees.

13Hargey iya laafethees;

hayqoy iya mokidi ekees.

14Hirgi bayna de7iya ba keethaafe goodetees;

enti iya hayqo geetetiya kawako efoosona.

15Iya keethay taman oyketana;

I de7iyasuwan diinney laaletana.

16Garsara xaphoy melana;

bollara haythi qoqofetana.

17Iya qopiya asi biittafe dhayana;

iya sunthay sa7an hassayetonna attana.

18I poo7ope dhuman goodettana;

alamiyape dhayana.

19Iyaw na7i woyko kochi dhayana;

I de7ida bessan issi asi paxa attenna.

20Wuloha bagga asay, iya gakida metuwan dagammidosona;

doloha bagga asay yashshan kokoridosona.

21Iita asaa wursethay awudeka hessa mela;

Xoossaa eronna asaa qaaday hessa mela” yaagis.