Geeshsha Maxaafa
Isayaasa 34
Kawotethati Pirdetana
Hinteno, kawotethato, shiiqidi si7ite! Hinteno, asaw akeekite! Biittaynne biittan de7iyaba ubbay, sa7inne sa7ape keyaaba ubbay si7o. Goday kawotethata ubbaa bolla hanqetis; enta tooranchota ubbaa bolla yilotis. I, enta ubbaa dhaysana; enta shukeysatas aathidi immana. Enta ahay holetidi, attidi xinqana; dereti enta suuthan kametana. Salo xoolintoti ubbay seerana; saloti saleenada xaaxetana. Woyne haythinne balase ayfey qoqofeteysada xoolintoti ubbay qoqofetana.1
Ta mashshay salotan alana gakanaw uyis; Heko Edoome bolla, taani dhaysida asaa bolla pirdanaw wodhana.2 Godaa mashshay suuthan muuketis. Yarshos shuketiya dorsatanne deeshata suuthan mashshi muuketeysadanne enta kilaho modhuwan kameteysada Godaa mashshay suuthan muuketis; modhuwan kametis. Goday Baasora kataman yarsho, Edoome biittan gita shuka giigisis. Menthati, wofaanotinne boorati entara kundana. Enta gadey suutha xalaala gidana; enta biittay modhon munuqetana. Goday halo keyana gallasinne Xiyoone olida morketa bolla kushe zaariya laythi giigisis.
Edoome shaafati melidi made gidis; iya baanay diinne laametana; iya biittay eexiya made gidana. Qammanne gallas tamay to77enna; iya cuyay merinaw cuyana. Edoome biittay yeletethaafe yeletethaa gakanaw baysa gidana; oonika merinaw yaara kanthenna.3 Shin xiloynne quxarey iya laattana; guttoynne quuroy yan daana. Xoossay Edoome bolla laaletha wadha wodoronne baysatetha tumbe yeddana. He biitta aysiya kawoy deenna; halaqati yaape kichana. Kawo keethata agunthi, miixata ohi ma7ana; workanati allatiya bessinne yanchoti de7iya soo gidana. Bazzo do7ati godaretara gahetana; tuna ayyaanati issoy issuwara xeegetana; qamma qoolleti wodhidi yan daana. Guttoti yan keethe keexidi, phuuphullidi qoxana. Banta nayta banta qefeta garsan haphana; phircoti banta laggetara yan shiiqana.
Godaa maxaafan koyidi nabbabite. Godaa doonay odida gishonne iya ayyaanay shiishida gisho, haysatape issoyka pacenna; qassi issoyka ba laggey bayna deenna. I, entaw saama kessis; iya kushey biitta entaw wodoron shaakis; enti iya merinaw laattana; yeletethaafe yeletethaa gakanaw enti yan daana.
Source notes (3)
- Cross-reference Maato 24:29; Mar 13:25; Luqa 21:26; Qon 6:13-14.
- Cross-reference Isa 63:1-6; Ermi 49:7-22; Hiz 25:12-14; 35:1-15; Amo 1:11-12; Abdi 1-14; Milki 1:2-5.
- Cross-reference Qon 14:11; 19:3.
Geeshsha Maxaafa. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.