Isayaasa 24

Biitta Ubbay Seeretana

1Heko, Goday biitta laallananne baysa kessana; I, biitta dhaysidi iyan de7iya asaa laallana. 2Asi ubbay issino gidana; kahiney asaara issino gidana; aylley godaara issino gidana; gadhindiya godatera issino gidana; shammeysi bayzeysara issino gidana; tal7e immeysi tal7e ekeysara issino gidana; aco acheysi aco ciggeysara issino gidana. 3Biitta ubbay bonqetidi baysa gidana; Goday ha qaala odis.

4Biittay melana, iya aacay shullana; alamey argaacana, daaburana; biittan de7iya wolqaama asay daaburana. 5Biittay banan de7iya asaa gaason tunis. Enti higgiyas kiitetibookona; wogaa naagibookona; merinaa caaquwa menthidosona. 6Hessa gisho, baadethay biitta mees; asay banta nagaraa gaason pirdetanaw bessees. Sa7an de7iya asay xuugetidosona; guutha asi attis. 7Woyney xaphora melis, mal7anto woyney wuris; kase ufaytiya ubbay azzanis. 8Karaabo baqoy attis; yetha waasoy si77i gis; ufaysiya diitha dursay eqis. 9Hizape yexishe woyne ushsha uyokona; ushshayka entaw camo gidana. 10Laaletida katamay baysa gidana; oonika gelonnaada keetha ubbay gordetis. 11Woyne ushshi dhayida gisho asay dabaaban waassees; ufaysi azzanon laametis; ufaysiyabay sa7ape dhayis. 12Katamay laaletis; katamaa pengeti meqeretidosona. 13Shamaho teera qoqofeysada, woyne maxi simmin, poshiley atteysada, biitta bolla de7iya kawotethata bolla hessada hanana.

14Enti banta qaala dhoqu oothidi, ufaysan yexoosona; wuloha baggara de7iya ubbay Godaa gitatetha odana. 15Hessa gisho, doloha baggara de7eysati, Godaas boncho immana; yuushoy abban teqetida biittati Godaas, Isra7eele Xoossaas boncho immana. 16Nuuni, “Xilluwas bonchoy gido” giya mazmure biitta gaxape si7ida.

Shin, “Taani gilqas! Taani laafas! Tana ayye! Aathi immeysi aathidi immees; kaddeysati gujidi aathidi immoosona” yaagas. 17Hinteno, sa7an de7iya asaw, dagami aafoynne xihey hintena naagees. 18Daganthiya girsaafe baqateysi ollan kundana; ollafe keyeysa xihey oykana; salo maskooteti dooyetidosona; biitta baasoti qaaxidosona. 19Biitti za77is; biitti shaaketis; biitti qaaxis. 20Biitti matho asada gandigarees; carkoy sugiya gaabbada yuuyees. Geellata balay daro deexida gisho zaari dendonna mela kundisis.

21He gallas Goday salo wolqata salon, sa7aa kawota sa7an pirdana. 22Ollan de7iya qasho asada enta issife shiishana; qasho keethan enti gordetidi uttana. Daro gallasape guye enti seeretana. 23Ubbaafe Wolqaama Goday Xiyoone zumaaninne Yerusalaamen kawotana; Yerusalaame cimata sinthan ba bonchuwa qoncisana. He wode ageenay dhumana, away yeellatana.